بيىل بيداي القابى 884,6 مىڭ گەكتارعا قىسقارىپ, 12,3 ملن گەكتاردى قۇرادى, ال مايلى داقىلداردىڭ كولەمى 1 ملن گەكتارعا ۇلعايىپ, 4 ملن گەكتارعا جەتكەن. سونىمەن قاتار قانت قىزىلشاسىنىڭ ەگىس قۇرىلىمىن وڭتايلاندىرۋ جۇمىستارى جۇرگىزىلىپ جاتىر, دەپ حابارلايدى Egemen.kz.
ەلىمىزدەگى وسىمدىك شارۋاشىلىعى ءوندىرىستىڭ تيىمدىلىگى مەن تۇراقتىلىعىن ارتتىرۋعا باعىتتالعان جۇيەلى ترانسفورماتسيادان ءوتىپ جاتىر. مۇنداعى باستى ماقسات ەگىس القاپتارىن ءارتاراپتاندىرۋ جانە سۋ ۇنەمدەۋ تەحنولوگيالارىن ەنگىزۋ.
«مەملەكەت باسشىسى جىل سايىن 150 مىڭ گەكتارعا دەيىن سۋ ۇنەمدەيتىن تەحنولوگيالاردى ەنگىزۋدى تاپسىرعان بولاتىن. 2024 جىلدىڭ قورىتىندىسى بويىنشا بۇل جوسپار ارتىعىمەن ورىندالىپ, 158 مىڭ گەكتاردى قۇرادى. ال بيىل سۋ ۇنەمدەيتىن تەحنولوگيالارعا قازىردىڭ وزىندە 109,8 مىڭ گەكتار القاپقا ەنگىزىلدى. جالپى سۋ ۇنەمدەيتىن تەحنولوگيالار قولدانىلاتىن جەر كولەمى 580 مىڭ گەكتارعا ۇلعايدى», دەدى ايداربەك ساپاروۆ.
2024 جىلى فەرمەرلەر 25,2 ملن توننا استىق جيناپ, بۇرىن-سوڭدى بولماعان رەكوردقا قول جەتكىزگەن. ونىڭ ىشىندە 18,6 ملن تونناسى بيداي. ورتاشا ونىمدىلىك گەكتارىنا 14,2 تسەنتنەر. مۇنداي جوعارى ناتيجەگە ەنگىزىلگەن تىڭايتقىش كولەمىنىڭ ەكى ەسەگە ۇلعايۋى (2023 ج. 1,3 ملن توننا) ايرىقشا ىقپال ەتتى. بيىل بۇل كورسەتكىشتى 1,9 ملن تونناعا جەتكىزۋ جوسپارلانعان.
«تۇقىم شارۋاشىلىعىنا جانە ماتەريالدىق-تەحنيكالىق بازانى جاڭارتۋعا ايرىقشا نازار اۋدارىلىپ وتىر. 2025 جىلى ەليتالىق تۇقىمداردىڭ ۇلەسىن جالپى ەگىس كولەمىنىڭ 10,5%-ىنا دەيىن جەتكىزۋ, ال اۋىل شارۋاشىلىعى تەحنيكاسىن جاڭارتۋ دەڭگەيىن 6,5%-عا دەيىن ارتتىرۋ جوسپارلانۋدا. تەك 2023 جىلدىڭ وزىندە عانا شارۋالار 22 مىڭ بىرلىك تەحنيكا ساتىپ الدى, بۇل الدىڭعى جىلعى كورسەتكىشتەن جوعارى. فەرمەرلەر ءۇشىن ەلەۋلى قولداۋ قۇرالى بولىپ سۋبسيديالاۋ شارالارى قالا بەرەدى. مەملەكەت ەليتالىق تۇقىمدار قۇنىن 70%-عا دەيىن, وتاندىق وندىرىستەگى مينەرالدى تىڭايتقىشتاردىڭ قۇنىن 60%-عا دەيىن وتەيدى, سونداي-اق پەستيتسيدتەر شىعىنىن 50%-عا جانە بيوپرەپاراتتار شىعىنىن 40%-عا وتەماقىلايدى. 2025 جىلى باسىم داقىلداردى سۋبسيديالاۋعا 25,8 ملرد تەڭگە ءبولىنىپ, بۇل فەرمەرلەرگە ونىمدىلىكتى ارتتىرۋ ءۇشىن قوسىمشا رەسۋرس بەرەدى», دەلىنگەن حابارلامادا.
ايتا كەتەيىك, بۇل جۇيەلى شارالار 2024–2028 جىلدارعا ارنالعان جول كارتاسىندا بەكىتىلگەن. وندا اۋىل شارۋاشىلىعىنىڭ جالپى ءونىم كولەمىن ەكى ەسەلەۋ كوزدەلگەن. نەگىزگى باسىمدىق بيدايدىڭ مونوكۋلتۋراسىن جانە سۋارمالى ەگىنشىلىكتى كوپ قاجەت ەتەتىن كۇرىش پەن ماقتا سياقتى داقىلداردى قىسقارتۋعا بەرىلگەن.
سونىمەن قاتار مايلى, كوكونىس-باقشا جانە مالازىقتىق داقىلداردىڭ ەگىس القاپتارىن ۇلعايتۋ قاراستىرىلعان. مۇنداي ءتاسىل ءوندىرىستىڭ تيىمدىلىگىن ارتتىرىپ, مال شارۋاشىلىعىنىڭ جەم-ءشوپ قورىن نىعايتۋعا مۇمكىندىك بەرەدى.
كەشەندى جوسپار اياسىندا سەلەكتسيا مەن تۇقىم شارۋاشىلىعىن دامىتۋعا ارنالعان اۋىل شارۋاشىلىعى داقىلدارىنىڭ كەمىندە 109 جاڭا سورتى مەن بۋداندارىن شىعارۋ كوزدەلگەن. 2024 جىلى 52,3%-دى قۇراعان وتاندىق سەلەكتسيا تۇقىمدارىمەن ەگىلەتىن القاپتاردىڭ ۇلەسىن 2028 جىلعا قاراي 78,2%-عا دەيىن ارتتىرۋ جوسپارلانۋدا. وسى ماقساتتا ۇسىنىلاتىن سورتتاردىڭ مەملەكەتتىك ءتىزىلىمى قالىپتاستىرىلىپ, ۇلتتىق تۇقىمداردىڭ گەنەتيكالىق بانكى قۇرىلۋدا. بۇل ىشكى سەلەكتسيا ناتيجەلەرىن بەكىتىپ قانا قويماي, سونىمەن قاتار وتاندىق وسىمدىك شارۋاشىلىعىنىڭ ەكسپورتتىق الەۋەتىن ارتتىرۋعا جول اشادى.