مەملەكەت باسشىسى ءوز سوزىندە جۇيەلى جۇمىستاردىڭ ارقاسىندا ەكونوميكانىڭ يندۋستريالىق نەگىزى قالانىپ جاتقاندىعىن اتاپ ءوتتى, دەپ حابارلايدى Egemen.kz.
«قازىر قازاقستاننىڭ بارلىق ايماعىندا مىڭداعان شاقىرىم جول سالىنىپ, جوندەلۋدە. اۋەجايلار مەن كوپىرلەر بوي كوتەرىپ, سۋ نىساندارىنىڭ قۇرىلىسى باستالىپ جاتىر. تۇرعىن-ءۇي كوممۋنالدىق شارۋاشىلىعى جانە باسقا دا ماڭىزدى ينفراقۇرىلىم سالىنۋدا. جالپى ۇكىمەتكە ينفراقۇرىلىمدىق قۇرىلىستىڭ ساپاسىنا باسا ءمان بەرۋ قاجەت دەگەن قاتاڭ نۇسقاۋ بەرىلدى. بۇل ماسەلە ۇكىمەتتىڭ جانە قۇقىق قورعاۋ مەكەمەلەرىنىڭ باقىلاۋىندا بولادى», دەدى پرەزيدەنت.
قازاقستاندا جىل سايىن كوپتەگەن ءوندىرىس ورىندارى اشىلاتىن بولدى. اسىرەسە, جوعارى تەحنولوگيا سالاسىنداعى كاسىپورىندار ىسكە قوسىلىپ جاتىر.
«وسىلايشا, ءبىز ۇلتتىق ەكونوميكامىزدىڭ مىقتى يندۋستريالىق نەگىزىن قالاپ جاتىرمىز. ينۆەستيتسيا تارتىپ, بيزنەسكە قولايلى جاعداي جاساپ, ايماقتاردى قولداۋ ءۇشىن جۇيەلى جۇمىس ىستەلۋدە. سونىڭ ناتيجەسىندە بيىلعى جەتى ايداعى ەكونوميكالىق ءوسىم 6 پايىزدان استى. مۇنىڭ ءبارى اياق استىنان پايدا بولعان جوق. بۇل – قاجىرلى ەڭبەكتىڭ جانە تاباندى تۇردە جاسالعان تۇبەگەيلى رەفورمالاردىڭ ناتيجەسى. جۇيەلى جانە ۇيلەسىمدى جۇمىس پەن بەرەكەلى بىرلىكتىڭ ارقاسىندا ەلىمىز جاڭا كەزەڭگە قادام باستى», دەدى قاسىم-جومارت توقاەۆ.
پرەزيدەنتتىڭ پىكىرىنشە, قازاقستان بىرتىندەپ دامۋدىڭ داڭعىل جولىنا ءتۇسىپ كەلەدى.
«ەندى بوس سوزگە بەرىلمەي, جان-جاقتى وركەندەۋگە باستايتىن وسى باعدارىمىزدان اينىماي, تەك قانا العا ۇمتىلۋىمىز كەرەك. سوندا ءبىز وزىق ويلى ۇلت بولىپ, تەڭدەسسىز تابىسقا قول جەتكىزەمىز, بيىك بەلەستەردى باعىندىرامىز», دەدى توقاەۆ.