مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى قازاقستان حالقىنا جولداۋىن جۇزەگە اسىرۋ اياسىندا ەلدە ەكولوگيالىق قۇندىلىقتاردى قالىپتاستىرۋ, تابيعاتقا ۇقىپتى قاراۋ جانە سانا تازالىعىن ساقتاۋ باعىتىندا جۇيەلى جۇمىستار جۇرگىزىلۋدە, دەپ جازادى Egemen.kz.
وسى ماقساتتا 2024–2029 جىلدارعا ارنالعان «تازا قازاقستان» ەكولوگيالىق مادەنيەتتى دامىتۋ تۇجىرىمداماسى ازىرلەندى. قۇجات ەكولوگيالىق مادەنيەتتى قالىپتاستىرۋدىڭ كەشەندى تاسىلىنە نەگىزدەلگەن.
نەگىزگى باعىتتار قاتارىندا:
حالىقتىڭ ەكولوگيالىق ويلاۋ مەن مىنەز-قۇلقىن جەتىلدىرۋ;
ەكولوگيالىق جاۋاپتى ءومىر سالتىن ىنتالاندىرۋ جۇيەسىن قۇرۋ;
ەكولوگيالىق اعارتۋ جانە ءبىلىم بەرۋ;
ەكولوگيا ماسەلەلەرىن كەڭ كولەمدە اقپاراتتىق قامتۋ.
«تۇجىرىمداما ازاماتتاردىڭ تابيعاتقا دەگەن قۇرمەتىن قالىپتاستىرۋعا, قورشاعان ورتانى قورعاۋدىڭ ماڭىزدىلىعىن تۇسىنۋگە جانە ەكولوگيالىق ماسەلەلەردى شەشۋگە بەلسەندى قاتىسۋعا باعىتتالعان», – دەدى ەكولوگيا جانە تابيعي رەسۋرستار ءمينيسترى ەرلان نىسانباەۆ.
بيزنەس پەن ءىرى كاسىپورىنداردىڭ رولىنە دە ەرەكشە ءمان بەرىلۋدە. ولار تابيعاتتى قورعاۋ باستامالارىن ىسكە اسىرۋداعى ماڭىزدى سەرىكتەس رەتىندە قاراستىرىلادى.
قازىرگى تاڭدا كوپتەگەن قازاقستاندىق كومپانيالار «تازا قازاقستان» اياسىنداعى جوبالارعا قاتىسىپ, تۇراقتى تەحنولوگيالاردى ەنگىزىپ, وڭىرلەردە ەكولوگيالىق باستامالاردى قولداپ كەلەدى.