بۇگىن ۇكىمەتتە پرەمەر-مينيستر ولجاس بەكتەنوۆتىڭ توراعالىعىمەن تسيفرلىق شتاب وتىرىسى ءوتتى. وندا مەملەكەت باسشىسىنىڭ تسيفرلاندىرۋ سالاسىنداعى العا قويعان مىندەتتەرىن جۇزەگە اسىرۋ باعىتىندا بىرقاتار شەشىم قابىلداندى, دەپ حابارلايدى Egemen.kz.
قابىلدانعان شەشىمدەرگە سايكەس:
15 قىركۇيەكتەن باستاپ Aitu, eGov, eGov Business, eOtinish سەرۆيستەرى مەن مەملەكەتتىك اقپاراتتىق جۇيەلەرگە قول جەتكىزۋ ءۇشىن نولدىك تاريفتەۋ قولدانىلادى; 20 قىركۇيەككە دەيىن Smart Bridge پلاتفورماسىندا بيزنەسكە ءوز IT-شەشىمدەرىن مەملەكەتتىك قىزمەتتەرمەن ەش كەدەرگىسىز بىرىكتىرۋگە جاعداي جاسالادى; ءىرى جوبالاردى ىسكە اسىرۋ ماقساتىندا Qaztech پلاتفورماسىندا IT-شەشىمدەردىڭ قۇنىنا قاتىستى جانە اۆتوماتتاندىرىلعان فۋنكتسيالار سانىنا قويىلعان شەكتەۋلەر الىنىپ, قۇقىقتىق اكتىلەرگە وزگەرىستەر ەنگىزىلەدى; جىل سوڭىنا دەيىن مەملەكەتتىك قىزمەتتەردى جاساندى ينتەللەكت نەگىزىندە تسيفرلاندىرۋ تاپسىرىلدى.ايتا كەتەيىك, نولدىك تاريفتەۋ تەتىگى ازاماتتاردىڭ ءموبيلدى بالانسى ءنول نەمەسە تەرىس بولعان كۇننىڭ وزىندە دە مەملەكەتتىك رەسۋرستارعا ەركىن كىرۋىن قامتاماسىز ەتەدى.
«مۇنداي قادام حالىققا قىزمەت كورسەتۋ ورتالىقتارىنا تۇسەتىن جۇكتەمەنى ايتارلىقتاي ازايتۋعا مۇمكىندىك بەرەدى جانە digital by default فورماتىنا كوشۋدىڭ ماڭىزدى كەزەڭىنە اينالادى. بىرقاتار شەت ەلدەردە وسىعان ۇقساس تەتىكتەر قازىردىڭ وزىندە بار. ەستونيادا X-Road جانە e-Services پلاتفورمالارىنا تەگىن قولجەتىمدىلىك قامتاماسىز ەتىلگەن, سينگاپۋردا تەلەكوممۋنيكاتسيا وپەراتورلارى SingPass, Gov.sg, MyInfo قىزمەتتەرىنە نولدىك ترافيك ۇسىنادى», دەپ حابارلادى ۇكىمەتتىڭ ءباسپاسوز قىزمەتى.
Smart Bridge پلاتفورماسى ارقىلى جەكە IT-شەشىمدەردىڭ مەملەكەتتىك قىزمەتتەرگە ينتەگراتسياسى يننوۆاتسيالاردى ەنگىزىپ قانا قويماي, دەربەس دەرەكتەردى قورعاۋ تالاپتارىن ساقتاي وتىرىپ, مەملەكەت پەن بيزنەس اراسىنداعى ءوزارا ءىس-قيمىلدى جاڭا دەڭگەيگە شىعارادى. قازىردىڭ وزىندە بۇل جۇيە ارقىلى 14,6 مىڭنان استام ءوتىنىم قابىلدانعان.
سونىمەن قاتار, Qaztech پلاتفورماسىندا بۇرىنعى شەكتەۋلەر جويىلادى. بۇعان دەيىن ءونىم ازىرلەۋدىڭ قۇنى 15 مىڭ اەك-تەن اسپاۋى, مەرزىمى 6 ايدان ارتىق بولماۋى جانە اۆتوماتتاندىرىلعان فۋنكتسيالاردىڭ سانى ۇشتەن اسپاۋى ءتيىس ەدى. ەندى جاڭا ءتاسىل اۋقىمدى ءارى كەشەندى شەشىمدەردى جەدەل ىسكە اسىرۋعا مۇمكىندىك بەرمەك, بۇل ءوز كەزەگىندە وتاندىق تسيفرلىق تەحنولوگيالاردىڭ دامۋىنا جول اشادى.
قازىرگى تاڭدا 1 408 مەملەكەتتىك قىزمەتتىڭ 368-ءى تولىق اۆتوماتتاندىرىلعان. تاعى 984 قىزمەتتى تسيفرلاندىرۋ مۇمكىندىگى بار, ال 56 قىزمەت قازىردىڭ وزىندە پرواكتيۆتى فورماتقا كوشىرىلگەن. جاساندى ينتەللەكتىنى ەنگىزۋ مەملەكەتتىك قىزمەتتەردىڭ ساپاسىن ارتتىرىپ, ولاردى پرواكتيۆتى تۇردە ۇسىنۋدى كەڭەيتۋگە ىقپال ەتپەك.