ولجاس بەكتەنوۆ سقو-دا اۋىل شارۋاشىلىعىنىڭ دامۋ بارىسىن تەكسەردى

جۇمىس ساپارى اياسىندا ولجاس بەكتەنوۆ كورنەەۆكا اۋىلىنداعى «اتامەكەن-اگرو-كورنەەۆكا» جشس زاماناۋي تسيفرلىق تاۋارلى ءسۇت فەرماسىنىڭ جۇمىسىمەن تانىستى. كاسىپورىن ديرەكتورى الەكساندر فادەەۆتىڭ ايتۋىنشا, فەرمادا 2,5 مىڭ ءسۇتتى ءىرى قارا مال, ونىڭ ىشىندە 1,3 مىڭنان استام سيىر بار. گولشتين-فريز تۇقىمدى مال ماجارستان, گەرمانيا, دانيا جانە نيدەرلاندتان اكەلىنگەن. قازاقستاننىڭ قىسىنا بەيىمدەلگەن گەرمانيادان اكەلىنگەن العاشقى 300 باس مال بيىل كۇزدە اۋىل شارۋاشىلىعى تاۋارىن وندىرۋشىلەرگە وتكىزىلەدى. 

بۇدان سوڭ پرەمەر-مينيستر Westfalia كومپانياسىنىڭ 40 باسقا ارنالعان اۆتوماتتاندىرىلعان ساۋ زالىن, سونداي-اق تابىن مەن ءوندىرىس پروتسەستەرىن باسقارۋدىڭ تسيفرلىق جۇيەلەرىن كوردى. فەرمادا ساۋىلعان ءسۇت كولەمىنىڭ اۆتوماتتاندىرىلعان ەسەبىن جۇرگىزۋگە, جابدىق جۇمىسىن قاداعالاۋعا, جانۋارلاردىڭ جاعدايىن, ولاردىڭ بەلسەندىلىگى مەن ونىمدىلىگىن باقىلاۋعا مۇمكىندىك بەرەتىن DairyPlan جانە CowScout شەشىمدەرى قولدانىلادى. 2025 جىلدىڭ قورىتىندىسى بويىنشا فەرما شامامەن 11 مىڭ توننا ءسۇت ءوندىردى.

ولجاس بەكتەنوۆ وبلىس باسشىلىعى مەن اۋىل شارۋاشىلىعى مينيسترلىگىنىڭ نازارىن ۆەتەريناريالىق قاۋىپسىزدىك ماسەلەسىنە ەرەكشە اۋداردى. مەملەكەت باسشىسىنىڭ تاپسىرماسىنا سايكەس, 2024 جىلدان بەرى ۆەتەريناريا سالاسى كەيىنگى 14 جىلدا العاش رەت جۇيەلى دامۋعا قاجەتتى قارجى الدى. سوڭعى ەكى جىلدا رەسپۋبليكا بويىنشا جالپى قۇنى 9,1 ملرد تەڭگە بولاتىن 600-گە جۋىق ۆەتەرينارلىق نىسان سالىندى.

«بۇگىنگى تاڭدا ەپيزووتيالىق جاعداي قولايلى بولىپ وتىر. سوڭعى ءۇش جىلدا ءبىزدىڭ وڭىردە برۋتسەللەز 12 ەسە ازايدى, قولايسىز پۋنكتتەر 7 پۋنكتكە تومەندەدى دەگەن ۇيعارىم الدىق. اۋرۋدىڭ كۇرت ءورشۋ وشاعى قىسقاردى. بۇل ءۇشىن بارلىق جاعدايلار جاسالعان, بيىل رەسپۋبليكالىق بيۋدجەتتەن 57 ۆەتەريناريالىق پۋنكت پەن 2 ۆەتەريناريالىق ستانسا سالۋعا 1,8 ملرد تەڭگە ءبولىندى. ۆەتەريناريالىق پۋنكتتەردىڭ قۇرىلىسى جەكە قوسالقى شارۋاشىلىقتار ءۇشىن ۆەتەريناريالىق ساۋلىقتى ساقتاۋعا ەلەۋلى قولداۋ بولماق, ولاردا ۆەتەريناريالىق مانيپۋلياتسيالاردىڭ بارلىق سپەكترى جۇرگىزىلەدى», دەدى ايماق باسشىسى مارات تاسماعانبەتوۆ.

 «قىزىلجار جەم» جشس قوجالىعىنىڭ اۋماعىندا پرەمەر-مينيستر ەگىن ەگۋ جۇمىستارىنىڭ قورىتىندىسىمەن تانىسىپ, ءداندى داقىلداردىڭ ۋلترا ەرتە سۇرپىنىڭ القابىن تەكسەردى. كاسىپورىن ارالاس اۋىل شارۋاشىلىعىن جۇرگىزۋگە ماماندانعان. 

كاسىپورىن ديرەكتورى دانيار انافين تاجىريبە الاڭىندا Secobra Recherches S.A. كومپانياسىنىڭ فرانتسۋزدىق سۇرىپتاۋدان شىققان Calixo سۇرپىنىڭ جۇمساق جازدىق بيدايىن سەبۋ جوسپارلانىپ وتىرعانىن ايتتى. سۇرىپ ەرتە پىسەتىن داقىل تۇرىنە جاتادى, ۆەگەتاتسيالىق كەزەڭى 85 كۇن جانە ونىمدىلىگى جوعارى. Calixo بۇعان دەيىن توپىراق-كليماتتىق جاعدايلارى سولتۇستىك قازاقستان وبلىسىنا جاقىن باتىس ءسىبىر وڭىرلەرىندە جوعارى تيىمدىلىگىن دالەلدەگەن.

ولجاس بەكتەنوۆ اشحابادتاعى تمد ۇكىمەتتەرى باسشىلارى كەڭەسىنىڭ وتىرىسىنا قاتىستى

سونداي-اق جەرگىلىكتى اۋىل شارۋاشىلىعى تاۋارىن وندىرۋشىلەرمەن كەزدەسۋ ءوتتى. ولجاس بەكتەنوۆ شارۋالاردى ەگىن ەگۋ ناۋقانىنىڭ اياقتالۋىمەن قۇتتىقتادى. قازاقستان بيدايدى ءىرى ەكسپورتتاۋشىلاردىڭ وندىعىنا كىرەدى جانە الەمدىك ۇن نارىعىندا كوشباسشىلىق پوزيتسياسىن ساقتاپ وتىر.

«پرەزيدەنتتىڭ تاپسىرماسى بويىنشا ءۇشىنشى جىل قاتارىنان اگرارلىق سەكتورعا اۋقىمدى قولداۋ كورسەتىلىپ جاتىر. بيىل وسىمدىك جانە مال شارۋاشىلىعى سالالارىن جالپى قارجىلاندىرۋ كولەمى 1 ترلن 200 ملرد تەڭگەگە جەتتى. ناتيجەسىن كورىپ وتىرمىز: سوڭعى ەكى جىلدا جاقسى ءونىم الىندى. بۇگىندە ءبىزدىڭ استىق الەمنىڭ 70 ەلىنە ەكسپورتتالادى. قازاقستان الەمدەگى استىق جەتكىزۋشى ون ەلدىڭ قاتارىنا كىرىپ وتىر.  بۇل – مەملەكەت باسشىسى قاسىم-جومارت توقاەۆتىڭ سالانى دامىتۋعا ەرەكشە كوڭىل ءبولۋىنىڭ جانە فەرمەرلەردىڭ كۇندەلىكتى قاجىرلى ەڭبەگىنىڭ ناتيجەسى. ءبىز جۇمىستى ودان ءارى جالعاستىرامىز», دەپ اتاپ ءوتتى ولجاس بەكتەنوۆ. 

سونداي-اق پرەمەر-مينيستر تۇيىرشىكتەلگەن جوڭىشقا زاۋىتىن سالۋ باستاماسىمەن تانىستى. جوبا جەمشوپ بازاسىن دامىتۋعا جانە مال شارۋاشىلىعىن تاعامدىق قۇندىلىعى جوعارى ساپالى جەممەن قامتاماسىز ەتۋگە باعىتتالعان. «ەتالون اگرو» كومپانيالار توبىنىڭ باس ديرەكتورى مەدەت تولەگەنوۆ جوبانى تابىستى جۇزەگە اسىرۋدىڭ ماڭىزدى شارتى سۋارمالى ەگىنشىلىكتى دامىتۋ بولىپ سانالاتىنىن اتاپ ءوتتى. ول ءبىر ماۋسىمدا ەكى-ۇشكە دەيىن جوڭىشقا شابۋعا, شيكىزاتتىڭ تۇراقتى ساپاسىن جانە وندىرىستىك قۋاتتاردىڭ بىركەلكى جۇكتەلۋىن قامتاماسىز ەتۋگە مۇمكىندىك بەرەدى.

پەتروپاۆل قالاسىندا پرەمەر-مينيستر «Eurasian Milk» جشس ءسۇت وڭدەۋ زاۋىتىندا ءوندىرىستىڭ تەحنولوگيالىق پروتسەسىمەن جانە شىعارىلاتىن دايىن ءونىم تۇرلەرىمەن تانىستى. ديرەكتور اندرەي گريتسەنكو كاسىپورىن شۆەيتساريالىق تەحنولوگيالار نەگىزىندە جۇمىس ىستەيتىنىن, تەرەڭ وڭدەلگەن ءونىم وندىرۋگە, يمپورتتى الماستىرۋعا جانە ەكسپورتتىق الەۋەتتى دامىتۋعا باعىتتالعانىن باياندادى. زاۋىت وڭىردەگى فەرمەرلىك شارۋاشىلىقتار جەتكىزەتىن وتاندىق شيكىزاتتى پايدالانادى. مۇندا جىل سايىن 7 مىڭ توننادان استام قاتتى جانە جۇمساق ىرىمشىك, 12 مىڭ توننادان استام سارى ماي, شامامەن 12 مىڭ توننا قويۋلاتىلعان ءسۇت, سونداي-اق 20 مىڭ توننادان استام سارىسۋ كونتسەنتراتى مەن قىشقىل ءسۇت ونىمدەرى وندىرىلەدى. 2026 جىلدىڭ سوڭىنا دەيىن جىلدىق قۋاتى 6 مىڭ توننادان اساتىن جاڭا ءونىم – كرەم-چيز ءوندىرىسىن ىسكە قوسۋ جوسپارلانىپ وتىر.

وسىعان بايلانىستى پرەمەر-مينيستر اۋىل شارۋاشىلىعى مينيسترلىگىنە وبلىس اكىمدىگىمەن بىرلەسىپ, كاسىپورىننىڭ تولىق قۋاتقا شىعۋىن جەدەلدەتۋ ءۇشىن قاجەتتى بارلىق قولداۋ شارالارىن كورسەتۋدى تاپسىردى. نىسانداردى ارالاۋ قورىتىندىسى بويىنشا پرەمەر-مينيستر اۋىل شارۋاشىلىعى مينيسترلىگىنە وبلىس اكىمدىگىمەن بىرلەسىپ, وڭدەۋ, جەمشوپ ءوندىرىسىن جانە اگروونەركاسىپ كەشەنىن تسيفرلاندىرۋدى دامىتۋ ءۇشىن فەرمەرلەردى قولداۋدى جالعاستىرۋدى, جاڭا تاۋارلى ءسۇت فەرمالارىن ۋاقىتىلى ىسكە قوسۋدى قامتاماسىز ەتۋدى, سونداي-اق وتاندىق ءونىمنىڭ نارىقتاعى ىلگەرىلەۋىنە جاردەمدەسۋدى تاپسىردى.

ەسكە سالا كەتەيىك, بۇعان دەيىن پرەمەر-مينيستر ولجاس بەكتەنوۆ مەملەكەت باسشىسىنىڭ «تازا قازاقستان» باستاماسىن جۇزەگە اسىرۋ بويىنشا ۇلتتىق پاركتەردىڭ جۇمىسىن سىنعا العان ەدى.