قازاقستان كونستيتۋتسياسىنىڭ 30 جىلدىعى قارساڭىندا اقمولا وبلىسىندا ەرەكشە پيلوتتىق جوبا ىسكە قوسىلدى. ەل تاريحىندا العاش رەت تۇرعىنداردى باسپانامەن قامتاماسىز ەتۋدىڭ جاڭا فورماتى «وتباسى بانكىنىڭ» بازاسىندا جۇزەگە اسىرىلۋدا. بۇل جۇيەنىڭ العاشقى قادامى جاس, قارقىندى دامىپ كەلە جاتقان قالا – كوسشىدان باستالدى, دەپ جازادى Egemen.kz.
پرەزيدەنتتىڭ تاپسىرماسىمەن «وتباسى بانكى» تۇرعىن ءۇي كەزەگىن ءبىر ورتالىقتان جۇرگىزىپ, باسپانا ءبولۋدىڭ نەگىزگى وپەراتورى مارتەبەسىنە يە بولدى. ەندى تۇرعىندارعا جالعا بەرىلەتىن جانە ساتىپ الۋ قۇقىعى بار پاتەرلەردى دە, جەڭىلدەتىلگەن نەسيە ارقىلى ۇسىنىلاتىن ۇيلەردى دە وسى بانك ۇلەستىرەدى.
اقمولا وبلىسىنىڭ اكىمى مارات احمەتجانوۆتىڭ ايتۋىنشا, العاشقى كەزەڭدە كوسشى قالاسىنىڭ 560 وتباسى باسپانالى بولادى. ونىڭ ىشىندە 261 وتباسىعا جالعا بەرىلەتىن پاتەرلەر, ال 110 وتباسىنا نەسيە ارقىلى بەرىلەتىن ۇيلەر ۇسىنىلماق. «بۇل – ەلىمىز ءۇشىن تىڭ باستاما. كوسشى جاڭا جۇيەنىڭ الاڭىنا اينالىپ, مىڭداعان وتباسىعا ءۇيلى بولۋعا جول اشادى», – دەدى ءوڭىر باسشىسى.
جاڭا تۇرعىن ءۇي كەشەندەرىنىڭ ىشىندە «ىنتىماك» ەرەكشە ورىن الادى. مۇندا 549 پاتەر قاراستىرىلعان, ونىڭ ىشىندە 70-ءى الەۋمەتتىك وسال توپتارعا بەرىلمەك. سونداي-اق كەشەن دولششيكتەردىڭ ماسەلەسىن شەشۋگە دە ىقپال ەتپەك.
«وتباسى بانكىنىڭ» وكىلدەرى كوسشىنى پيلوت رەتىندە تاڭداۋدىڭ سەبەبىن ونىڭ دامۋ قارقىنىمەن تۇسىندىرەدى. «بۇل قالا – جاڭاشىلدىق پەن وزگەرىستەردىڭ سيمۆولى. جاڭا تەتىكتىڭ تيىمدىلىگىن ءدال وسى جەردە كورسەتۋگە سەنىمدىمىز», – دەدى بانكتىڭ اقمولا وبلىستىق فيليالىنىڭ ديرەكتورى المات نۇراحمەتوۆ.
كوسشىداعى وزگەرىستەر تەك تۇرعىن ۇيمەن شەكتەلمەيدى. قالادا گاز تارتۋ, تازا اۋىزسۋمەن قامتۋ, جولداردى جوندەۋ جۇمىستارى جۇرگىزىلۋدە. سونىمەن قاتار جاڭا زاماناۋي مەكتەپتىڭ ىرگەتاسى قالاندى. بۇل الەۋمەتتىك نىساندار قالانىڭ بولاشاعىنا سەرپىن بەرمەك.
ايتا كەتسەك, مۇنداي باستامالار تەك كوسشىدا عانا ەمەس, بۇكىل اقمولا وبلىسىندا قارقىندى ءجۇرىپ جاتىر. سوڭعى ەكى جىلدا وڭىردە شامامەن 4 800 وتباسى قونىس تويىن تويلاعان. ونىڭ ىشىندە 1 500-دەن استامى الەۋمەتتىك وسال توپتارعا جاتادى. بۇل – سوڭعى جەتى جىلدا بولماعان كورسەتكىش.