جازعى دەمالىس كەزىندە ءبىرىنشى سىنىپقا باراتىن بالالارعا بىردەي باستاپقى مۇمكىندىك بەرۋ ماقساتىندا ۇيىمداستىرىلعان «بالاقايلار مەكتەبى» قىسقا مەرزىمدى باعدارلاماسى – ۇلگىلىك وقۋ باعدارلاماسىنىڭ باعىتتارى بويىنشا مەكتەپكە الدىن الا دايىنداۋعا مۇمكىندىك بەرەدى, دەپ جازادى Egemen.kz.
اتالعان باعدارلاما مەملەكەتتىك جالپىعا مىندەتتى مەكتەپكە دەيىنگى تاربيە مەن ءبىلىم بەرۋ ستاندارتىنا سايكەس ازىرلەنگەن.
مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى مانار اداموۆانىڭ ايتۋىنشا جازعى ءۇش اي ىشىندە باستاۋىش سىنىپ مۇعالىمدەرىنىڭ قاتىسۋىمەن 90 مىڭعا جۋىق بالا قىسقا مەرزىمدى دايىندىقتان ءوتتى. ونىڭ ىشىندە قالالاردا شامامەن 60 مىڭ, اۋىلدىق جەرلەردە 30 مىڭنان استام بالا قامتىلدى.
«وقىتۋ بارىسىندا بالالاردىڭ فيزيكالىق, كوممۋنيكاتيۆتىك, ينتەللەكتۋالدىق, شىعارماشىلىق جانە الەۋمەتتىك-ەموتسيونالدى داعدىلارىن دامىتۋعا, سونداي-اق مەكتەپكە وڭ كوزقاراسىن قالىپتاستىرۋعا باسىمدىق بەرىلدى», دەيدى م.اداموۆا.
ايتالىق باعدارلاما 1 ايعا ەسەپتەلىنگەن. ءبىلىم بەرۋ پروتسەسىن بىلىكتى باستاۋىش سىنىپ مۇعالىمدەرى مەن مەكتەپالدى دايارلىق پەداگوگتەرى جۇرگىزدى.