1 تامىزداعى جاعداي بويىنشا ەل اۋماعىندا جەرگىلىكتى اتقارۋشى ورگانداردىڭ رۇقساتىمەن 14 130 شەتەل ازاماتى ەڭبەك ەتەدى, دەپ حابارلايدى Egemen.kz.
ەستەرىڭىزگە سالا كەتەيىك, شەتەلدىك جۇمىس كۇشىن تارتۋ بىرنەشە ساناتقا بولىنەدى. سونىڭ ىشىندە ءبىرىنشى سانات بويىنشا – باسشىلار مەن ولاردىڭ ورىنباسارلارىنا 549 رۇقسات, ال ەكىنشى سانات – قۇرىلىمدىق بولىمشەلەر باسشىلارىنا 2 258 رۇقسات بەرىلگەن. نەگىزگى بولىگى ماماندار مەن بىلىكتى جۇمىسشىلارعا تيەسىلى: ءۇشىنشى ساناتتا – 3 786 ادام, ءتورتىنشى ساناتتا – 904 ادام. بۇدان وزگە, ماۋسىمدىق جۇمىستارعا 2 889 شەتەلدىك تارتىلسا, كورپوراتيۆتىك اۋىسىم اياسىندا 3 744 ادام ەڭبەك ەتىپ جاتىر.
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, قازىرگى كەزدە قازاقستاندا 1 899 جۇمىس بەرۋشى شەتەل ماماندارىن پايدالانىپ وتىر. بۇل ۇيىمداردا 348 مىڭنان استام قازاقستاندىق ەڭبەك ەتەدى, ياعني جالپى قىزمەتكەرلەر قۇرامىنىڭ 96%-ىن قۇرايدى.
«ەكونوميكالىق قىزمەت تۇرلەرى بويىنشا ەڭ كوپ جۇمىس ىستەيتىندەر: قۇرىلىس سالاسىندا – 4 949 ادام, اۋىل, ورمان جانە بالىق شارۋاشىلىعى – 2 930 ادام, تاۋ-كەن ونەركاسىبى جانە كارەرلەردى قازۋ – 1 369 ادام, وڭدەۋ ونەركاسىبى – 1 210 ادام», دەلىنگەن حابارلامادا.
شەتەلدىك جۇمىس كۇشىنىڭ باسىم بولىگى مىنا ەلدەردەن كەلگەن: قىتاي – 5 120 ادام, وزبەكستان – 2 478 ادام, تۇركيا – 1 042 ادام, ءۇندىستان – 1 031 ادام.