استانادا قازاقستان رەسپۋبليكاسى كونستيتۋتسياسىنىڭ 30 جىلدىعىنا وراي 2022 جىلعى كونستيتۋتسيالىق تۇزەتۋلەرگە تۇسىندىرمەنىڭ 2-باسىلىمىنىڭ تۇساۋكەسەرى ءوتتى. ءماجىلىس دەپۋتاتى, زاڭ عىلىمدارىنىڭ دوكتورى, پروفەسسور مارات باشيموۆ كونستيتۋتسيالىق وزگەرىستەردىڭ مەملەكەت پەن قوعام ءۇشىن ماڭىزدىلىعى تۋرالى ايتىپ بەردى, دەپ حابارلايدى Egemen.kz.
ء«بىزدىڭ كونستيتۋتسيامىزدىڭ 1-بابىنىڭ 1-تارماعىندا: «مەملەكەتتىڭ ەڭ قىمبات قازىناسى – ادام جانە ادامنىڭ ءومىرى, قۇقىقتارى مەن بوستاندىقتارى» دەپ جازىلعان. وسى ءپرينتسيپتى ناقتى ومىردە جۇزەگە اسىرۋ ءۇشىن ادىلەتتىك, تەڭدىك سىندى كونستيتۋتسيالىق قۇندىلىقتار ەسكەرىلدى», دەدى مارات باشيموۆ.
سپيكەر اتا زاڭعا ەنگىزىلگەن نەگىزگى وزگەرىستەر مەن جاڭاشىلدىقتاردى اتاپ ءوتتى.
«پرەزيدەنتتىك رەسپۋبليكا بولعاننان كەيىن پرەزيدەنت 7 جىل مەرزىمگە عانا سايلانادى. سونىمەن قاتار, ونىڭ تۋىستارى بيلىكتە قىزمەت اتقارمايدى. پارلامەنتكە سايلاۋ جۇيەسى وزگەرتىلىپ, ەندى دەپۋتاتتار تەك پارتيالار اتىنان عانا ەمەس, ءوزىن-ءوزى ۇسىنۋ ارقىلى جانە ءبىر مانداتتى وكرۋگپەن سايلانادى. ونىڭ ناتيجەسىن قازىر كورىپ وتىرمىز», دەدى دەپۋتات.
ونىڭ ايتۋىنشا, جوعارى اۋديتورلىق پالاتا ەندى جىلىنا ەكى رەت پارلامەنت الدىندا ەسەپ بەرەدى. بۇل بيۋدجەتتىڭ اشىقتىعىن قامتاماسىز ەتۋگە مۇمكىندىك بەرەدى. سونداي-اق ادام قۇقىقتارى جونىندەگى ۋاكىلدىڭ كونستيتۋتسيالىق مارتەبەسى ارتتى. كونستيتۋتسيالىق سوت قايتا قۇرىلىپ, ازاماتتار ءوز قۇقىقتارىن قورعاۋ ءۇشىن تىكەلەي شاعىمدانا الادى. سونىمەن قاتار, باس پروكۋراتۋرا مەن ادام قۇقىقتارى جونىندەگى ۋاكىل دە كونستيتۋتسيالىق سوتقا ارىزدانا الادى. مارات باشيموۆتىڭ ايتۋىنشا, بۇل – زاڭنىڭ ۇستەمدىگىن ارتتىرۋ جولىنداعى ۇلكەن قادام, ءارى دەموكراتيا پرينتسيپتەرىنىڭ نىعايۋى.
«كۇشتى پرەزيدەنت, ىقپالدى پارلامەنت, ەسەپ بەرەتىن ۇكىمەت» ءپرينتسيپى دە وسى كونستيتۋتسيالىق رەفورمادان شىققان. ويتكەنى ۇكىمەت جاۋاپكەرشىلىكتى ۇلعايتىپ وتىرۋ كەرەك. وسىنداي كونستيتۋتسيالىق وزگەرىستەر قوعام مەن مەملەكەت اراسىنداعى قارىم-قاتىناستى جانە ونىڭ اشىقتىعىن كۇشەيتتى. ادام قۇقىقتارىنا باسا نازار اۋدارىلدى», دەپ قورىتىندىلادى مارات باشيموۆ.