S&P Global Ratings حالىقارالىق اگەنتتىگى قازاقستانعا قاتىستى بولجامىن «تۇراقتىدان» «جايلىعا» وزگەرتتى. بۇل تۋرالى ۇلتتىق بانك حابارلادى, دەپ جازادى Egemen.kz.
اگەنتتىك ەلدىڭ نەسيەلىك رەيتينگىن بۇرىنعىداي BBB-دەڭگەيىندە قالدىردى. بۇل ينۆەستيتسيالىق دەڭگەيدىڭ ەڭ تومەنگى ساتىسى, ياعني ەلدىڭ قارىزدى وتەۋ قابىلەتى جامان ەمەس, بىراق ەكونوميكا ناشارلاعان جاعدايدا قيىندىق تۋى مۇمكىن.
«بولجام ەل ەكونوميكاسىن ىرىقتاندىرۋ مەن ارتاراپتاندىرۋعا, سونىمەن بىرگە مەملەكەتتىك باسقارۋ تيىمدىلىگىن ارتتىرۋعا جانە بيۋدجەت تاپشىلىعىن ازايتۋعا باعىتتالعان شارالاردىڭ وڭ ديناميكاسىن كورسەتەدى», دەپ تۇسىندىرەدى باس بانك.
S&P ساراپشىلارىنىڭ پىكىرىنشە, اقشا-نەسيە ساياساتىنىڭ نەگىزى نىعايىپ كەلەدى, ۇلتتىق بانك ينفلياتسيانى تەجەۋ ءۇشىن شارالار قابىلداپ جاتىر, ال كۆازيفيسكالدىق شىعىندار قىسقارا بەرمەك. سونداي-اق بانك سەكتورىنىڭ گەوساياسي جانە ەكونوميكالىق تاۋەكەلدەرگە ءتوزىمدى ەكەنى, كاپيتال قورى جەتكىلىكتى جانە وتىمدىلىگى جاقسى ەكەنى ايتىلدى. بۇدان بولەك, تۇتىنۋشىلىق نەسيەلەردىڭ ازايۋى مۇمكىن دەگەن بولجام جاسالدى.
«ۇلتتىق ينفراقۇرىلىم جوسپارىن ودان ءارى ىسكە اسىرۋ ەكونوميكاعا كەزەڭ-كەزەڭمەن ارتاراپتاندىرۋعا جانە شيكىزاتتان تىس كىرىستەردىڭ وسۋىنە ىقپال ەتەدى. ءجىو ءوسىمى 2025 جىلى 5,5% دەڭگەيىندە بولادى دەپ كۇتىلسە, 2026–2028 جىلدارى 4%-عا دەيىن باياۋلايدى», دەپ كورسەتكەن حالىقارالىق اگەنتتىك.