كەشە استانادا قازاقستان حالقى اسسامبلەياسىنىڭ جىلى شەڭبەرىندە, سونداي-اق, جەردىڭ سولتۇستىك پوليۋسىنە: بارنەو بەكەتىنەن – سپ-كە باعىتتالعان ءبىرىنشى قازاقستاندىق شاڭعى ەكسپەديتسياسىنا ارنالعان ءباسپاسوز-ءماليحاتى ءوتتى. جيىنعا قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ, «قازاق گەوگرافيالىق قوعامى» قب توراعاسى نۇرلان ءابدۋوۆ, قازاقستان سىرتقى ىستەر مينيسترلىگىنىڭ حالىقارالىق اقپاراتتار كوميتەتىنىڭ توراعاسى رومان ۆاسيلەنكو, Voxpopuli.zk سۋرەتتى رەپورتاجدار سايتىنىڭ باس رەداكتورى جاننا احمەتوۆا, «Shejire DNA» عىلىمي جوباسىنىڭ جەتەكشىسى نۇربول بايمۇحانوۆ, سونىمەن قاتار, ەكسپەديتسيانىڭ وزگە مۇشەلەرى قاتىسىپ, ءسوز سويلەدى.
سىرتقى ىستەر مينيسترلىگى, قازاقستان حالقى اسسامبلەياسى, Voxpopuli.zk سۋرەتتى رەپورتاجدار سايتى, قازاقستان بلوگەرلەر اليانسى, «قازاق گەوگرافيالىق قوعامى» قب ۇيىتقى بولعان شارادا ءسوز العان قحا توراعاسىنىڭ ورىنباسارى ەرالى توعجانوۆ مۇنداي ەكسپەديتسيا ەل تاريحىندا تۇڭعىش رەت ۇيىمداستىرىلىپ وتىرعانىن اتاپ ءوتتى. «ازاماتتاردىڭ نيەتىنىڭ ارعى جاعىندا ۇلكەن جول تۇر, ول جولدىڭ ءمانى مەن ماعىناسى ەلىمىز ءۇشىن دە, ەلىمىزدىڭ بولاشاعىن ويلايتىن ازاماتتار ءۇشىن دە ماڭىزدى. تاۋەلسىزدىگىمىزدى نىعايتۋ تەك قانا بىرلىككە بايلانىستى. 2015 جىلدى قازاقستان پرەزيدەنتى قازاقستان حالقى اسسامبلەياسىنىڭ جىلى دەپ بەلگىلەگەنى بەلگىلى. قحا جىلى – بۇل بىرلىكتىڭ جىلى, ەلدىكتىڭ جىلى. سوندىقتان, ەكسپەديتسيانىڭ ازاماتتارى ەلدىڭ جۇرەگىندەگى وسى ىزگى نيەتتى شەت جەرگە جەتكىزەتىن بولادى. 31 ناۋرىزعا دەيىن ازاماتتار دايىندىق جۇمىستارىن جۇرگىزەدى. ءارى قاراي ولاردى ۇلكەن جولساپارلار كۇتىپ تۇر. بۇل ازاماتتار جاي بارا جاتقان جوق, ەلىمىزدىڭ تۋىن, قحا جىلىنىڭ تۋىن سولتۇستىك پوليۋسكە اپارىپ, بۇكىل دۇنيەجۇزىنە ەلىمىزدى, جەرىمىزدى تانىتاتىن بولادى. ءبىز ەكسپەديتسيا مۇشەلەرىنە: «جولدارىڭىز ءساتتى بولسىن!», دەپ تىلەك ايتامىز», دەدى ە. توعجانوۆ.
سونىمەن, بۇل ەكسپەديتسيانىڭ نەگىزگى ماقساتى – شەتەلدەردە ن.نازارباەۆتىڭ بەيبىتشىلىك پەن كەلىسىم ساياساتىن ناسيحاتتاۋ, قازاقستاندىق ەتنوسارالىق توزىمدىلىك پەن قوعامدىق ىنتىماقتاستىقتىڭ ۇلگىسىن كورسەتىپ, الەمنىڭ عىلىمي, مادەني جانە گۋمانيتارلىق كەڭىستىكتەرىندە قازاقستاندى ايگىلەۋ, وتانشىلدىق رۋحتى تاربيەلەۋ. ءباسپاسوز-ءماليحاتىندا ءسوز سويلەگەن «قازاق گەوگرافيالىق قوعامى» قب توراعاسى نۇرلان ءابدۋوۆ تە قازاق حاندىعىنىڭ 550 جىلدىعىنا, ەل كونستيتۋتسياسىنىڭ 20 جىلدىعىنا, جەڭىستىڭ 70 جىلدىق مەرەيتويىنا, قازاقستاننىڭ بۇۇ قاۋىپسىزدىك كەڭەسىنە مۇشە بولۋى ءۇشىن بەرىلگەن وتىنىمىنە قولداۋ كورسەتۋگە ورايلاستىرىلعان باستاما تۋرالى ءوز ويىن ءبىلدىردى. «دۇنيەجۇزى كەڭىستىگىنە ەلىمىزدى دارىپتەپ قانا قويماي, قازاقستانىڭ حالىقارالىق بەدەلىن جاقسارتۋدا, جاستارىمىزدىڭ وتانشىلدىق رۋحىن وياتۋدا بۇل باستامانىڭ ماڭىزى زور», دەدى ول بۇل ورايدا.
جيىنعا قاتىسۋشىلاردىڭ ايتۋىنشا, 31 ناۋرىزدا ەكسپەديتسيا مۇشەلەرى الماتىدان وسلوعا (نورۆەگياعا), ودان ءارى لونگيرگە, ياعني شپيتسبەرگەن ارالىنا ۇشۋدى كوزدەپ وتىر. سودان كەيىن, 4 ساۋىردە لونگيردەن بارنەو مۇزدى اەرودرومىنا ۇشىپ بارادى, سول جەردەن سولتۇستىك پوليۋسكە دەيىنگى شاڭعى ەكسپەديتسياسى باستاۋ الماق. ءبىر اتاپ وتەرلىگى, بارنەودان پوليۋسكە دەيىنگى اراقاشىقتىق شامامەن 200 شاقىرىمدى الىپ جاتىر. ساپار مەرزىمى كۇن سايىن 20-25 شاقىرىمدى ءجۇرىپ وتكەندى ەسەپتەگەندە, 7-12 كۇندى قۇرايدى ەكەن. ال جولساپاردىڭ فوتوحرونيكاسىن رەسمي اقپاراتتىق سەرىكتەس – Voxpopuli.zk سۋرەتتى رەپورتاجدار سايتىپ جۇرگىزىپ وتىراتىن بولادى. اتالعان جوبا اياسىندا سونداي-اق, شپيتسبەرگەن ارالىنىڭ تۇرعىندارى مەن نورۆەگيانىڭ بايىرعى تۇرعىندارىنىڭ شىعۋ تەگىنە زەرتتەۋلەر جۇرگىزىلمەك, سونداي-اق, گەوگرافيالىق, ەتنوگرافيالىق باعىتتا زەرتتەۋلەر جۇرگىزىلەدى. زەرتتەۋ جۇمىستارىنىڭ قورىتىندىسى بويىنشا, نورۆەگيالىقتاردىڭ اتا-تەگى, مادەنيەتى مەن تۇرمىس-تىرشىلىگى, ولاردىڭ وزگە ەتنوستارمەن تاريحي بايلانىستارىن تەرەڭىرەك تۇسىنۋگە جول اشىلادى.
ءلايلا ەدىلقىزى,
«ەگەمەن قازاقستان».
سۋرەتتى تۇسىرگەن
ەرلان وماروۆ.