بۇگىن مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي الماتى قالاسىندا وتكەن حالىقارالىق Human Capital forum-نا قاتىستى, دەپ جازادى Egemen.kz.
فورۋمعا ەلىمىزدەگى HR سالاسىنداعى جەتەكشى ماماندار مەن بيزنەس-كوشباسشىلار, قازاقستاندىق تاراپتىڭ شاقىرۋىمەن ءازىربايجان, ارمەنيا, گرۋزيا, قىرعىزستان جانە وزبەكستان ەلدەرىنەن مەملەكەتتىك ورگاندار وكىلدەرى قاتىسىپ, وندا جاھاندىق تسيفرلاندىرۋ جانە يننوۆاتسيالاردى ەنگىزۋ جاعدايىندا مەملەكەتتىك قىزمەتتە پەرسونالدى باسقارۋ ماسەلەلەرى تالقىلاندى.
دارحان جازىقباي شاراعا قاتىسۋشىلارعا جەكە قۇرىلىمدار جانە مەملەكەتتىك ورگانداردىڭ HR-قىزمەتتەرى اراسىنداعى ارىپتەستىكتى نىعايتۋ, اسىرەسە مۇنىڭ مەملەكەت باسشىسىنىڭ مەملەكەتتىك قىزمەتكە جەكە سەكتوردان بىلىكتى كادرلاردى اشىق, كەدەرگىسىز قابىلداۋ تۋرالى تاپسىرمالارىن ورىنداۋ اياسىنداعى ماڭىزدىلىعى جايلى ايتتى.
«وسىعان بايلانىستى ءبىز مەريتوكراتيا قاعيداتىن جەتەكشىلىككە الا وتىرىپ جەكە قۇرىلىمداردىڭ جوعارى بىلىكتى ماماندارى ءۇشىن مەملەكەتتىك قىزمەتتە مىندەتتى ەڭبەك ءوتىلى بولۋىن تالاپ ەتەتىن كەدەرگىلەردى زاڭ جۇزىندە الىپ تاستادىق», دەپ اتاپ ءوتتى اگەنتتىك توراعاسى.
ونىڭ ايتۋىنشا, قازىرگى ۋاقىتتا وسى جاڭاشىلدىقتىڭ ارقاسىندا «ب» كورپۋسىنىڭ باسشىلىق لاۋازىمدارىنا 806 تاعايىنداۋ كەلىسىلىپ, جەكە سەكتوردىڭ ماماندارى ورتالىق جانە جەرگىلىكتى اتقارۋشى ورگانداردا دەپارتامەنت ديرەكتورلارى مەن باسقارما باسشىلارى لاۋازىمدارىنا ورنالاستى.
سونداي-اق كەلىسىمشارتتىق قىزمەتشىلەر ينستيتۋتى ەنگىزىلىپ, قازىردىڭ وزىندە 30 سالالىق ساراپشى باسىم مەملەكەتتىك جوبالارمەن جۇمىس ىستەپ جاتىر.
«مۇنداي ەكىجاقتى كەلىسىمدە جۇمىس جاساۋ مەملەكەتتىك قىزمەتكە جاڭا سەرپىن بەرەدى», دەدى دارحان جازىقباي.
مەملەكەت باسشىسىنىڭ تاپسىرماسىنا سايكەس مەملەكەتتىك باسقارۋدىڭ سەرۆيستىك, ادامعا باعدارلانعان مودەلىن قالىپتاستىرۋ مەملەكەتتىك اپپاراتتىڭ باستى مىندەتتەرىنىڭ ءبىرى بولىپ سانالادى.
«مەملەكەتتىك ورگاندار مەن جەكە قۇرىلىمداردىڭ HR-قىزمەتتەرىن ادامي كاپيتالدى دامىتۋ, پەرسونالدىڭ تۇراقتىلىعىن قامتاماسىز ەتۋ, قىزمەتكەرلەردىڭ ءوز قابىلەتىن ءتيىمدى پايدالانۋى ءۇشىن قولايلى جاعدايلار جاساۋ سىندى ورتاق مىندەتتەر بىرىكتىرەدى. بولاشاق ادامدارمەن جۇمىس جاساي الاتىن ادامداردىڭ قولىندا. ادامدار, ولاردىڭ ءبىلىمى, كاسىبيلىگى, باستاماشىلىعى, ادالدىعى, جاۋاپكەرشىلىگى – قازاقستاننىڭ باستى ستراتەگيالىق رەسۋرسى. مەملەكەت باسشىسىنىڭ جاڭا HR ساياساتى وسى ۇستانىمعا نەگىزدەلگەن» دەدى اگەنتتىك توراعاسى.
سونداي-اق ول فورۋم قاتىسۋشىلارىنا پرەزيدەنتتىڭ باستاماسىمەن ىسكە اسىرىلىپ جاتقان تالانتتى جاستار ءۇشىن ءتيىمدى الەۋمەتتىك ليفت سانالاتىن قازاقستاننىڭ اۋقىمدى HR جوباسى پرەزيدەنتتىك جاستار كادرلىق رەزەرۆى تۋرالى ايتتى.
جوبانى قولعا العاننان باستاپ رەزەرۆكە 400 ادام قابىلدانىپ, ولاردىڭ 80% - دان استامى ءارتۇرلى سالالارداعى ورتا جانە جوعارى باسشىلىق لاۋازىمدارعا تاعايىندالدى.
سونىمەن قاتار, دارحان جازىقباي «E-Qyzmet» جانە «بىرىڭعاي كادر جۇيەسى» پورتالدارىنىڭ جۇمىسىنا دا توقتالدى. بۇل اقپاراتتىق جۇيەلەر مەملەكەتتىك قىزمەتكە ىرىكتەۋدىڭ اشىقتىعىن, كانديداتتاردى تاڭداۋ بارىسىندا ادامي فاكتوردى بولدىرماۋدى قامتاماسىز ەتەدى, سونداي-اق بەلگىلى ءبىر ۇيىمداعى ۇلەستەستىكتى جانە مۇددەلەر قاقتىعىسىن انىقتاۋعا كومەكتەسەدى.
ونلاين ىرىكتەۋ جۇيەسى مەملەكەتتىك قىزمەتكە كىرۋگە ۇمىتكەرلەر مەن تاۋەلسىز ساراپشىلار تاراپىنان وڭ پىكىرلەرگە يە بولدى.
فورۋمنىڭ ارنايى سەسسياسىندا جاھاندىق تسيفرلاندىرۋ جانە يننوۆاتسيالاردى ەنگىزۋ جاعدايىندا مەملەكەتتىك قىزمەتتەگى پەرسونالدى باسقارۋ ماسەلەلەرى تالقىلاندى.
ايتا كەتەيىك, Human Capital forum – قازاقستان HR-مەنەدجەرلەر قاۋىمداستىعى ۇيىمداستىرعان ءتۇرلى سالالاردىڭ ساراپشىلارىن بىرىكتىرەتىن, ءتيىمدى كورسەتكىشتەرگە قول جەتكىزۋ ءۇشىن پەرسونالدى باسقارۋدى ترانسفورماتسيالاۋدى كوزدەيتىن الاڭ.