قاي سالادا بولسىن ءبىلىمدى, بىلىكتى, تىرلىگىنە تياناقتى جۇمىسشىنىڭ جولى اشىق. جاستىعىنا قاراماي ەرەسەك ادامدارمەن وڭاي ءتىل تابىسىپ, تىندىرىمدى جۇمىس ىستەسە, ابىرويىمەن قوسا جالاقىسى دا ەسەلەپ وسە بەرەدى. ەلەكتريك مۇرات تاباتاەۆ – كەشە وڭ-سولىن تانىماعان جاس بولسا, بۇگىن ءوز ءىسىن جەتىك بىلەتىن بىلىكتى مامان.
بۋرابايدىڭ باۋىرىندا ءوسىپ, بالا جاستان ولكەنىڭ تىنىسىن, كيەسىن تانىعان مۇراتتىڭ ازىرگە وزگە قالاعا بارىپ جۇمىس ىستەگىسى جوق. ول تۋعان اقىلباي اۋىلى وسى بۋراباي اۋدانىنا قارايدى. ورتا مەكتەپتىڭ 9-سىنىبىن تامامداعان سوڭ, ششۋچينسك قالاسىنداعى تەحنيكالىق كوللەدجدە ەلەكتريك ماماندىعىنا ءبىلىم الدى. وقىپ جۇرگەندە قوعامعا, تۋعان ولكەگە پايداسى تيەتىن كاسىبي مامان بولۋدى ارماندادى. مۇرات بۇگىندە «بۋراباي دامۋ» سەرىكتەستىگىندە جۇمىس ىستەيدى. تۋريستەردىڭ قاراسى ۇزىلمەيتىن تابيعاتى تاڭعاجايىپ كۋرورتتى ايماقتىڭ ءبىر بولىگىن جارىقپەن قامتاماسىز ەتەدى. ناقتىلاپ ايتساق, سەرىكتەستىككە قاراستى ابىلاي حان الاڭى, ۆيزيت ورتالىعى, «Burabayland» ويىن-ساۋىق پاركى, «اقبۋرىل» سىندى بىرنەشە نىساننىڭ ەلەكتر قۋاتىنا بايلانىستى تۋىنداعان اقاۋلارىن دەر كەزىندە رەتتەيدى.
«بۋراباي دامۋ» سەرىكتەستىگىندە ەكى جىلدان استام ۋاقىت جۇمىس ىستەپ كەلەمىن. كوللەدجدى تامامداعان سوڭ, توپ جەتەكشىسىنىڭ ۇسىنىسىمەن بىردەن وسىندا ورنالاستىم. ول كەزدە ەڭبەك تاجىريبەم از ەدى, اعا بۋىن ارىپتەستەردەن ۇيرەنەرىم كوپ بولدى. توقپەن جۇمىس ىستەۋگە بالا جاستان قىزىعامىن. جالپى, ءبىز سەكىلدى جاستارعا ءتاۋىر جالاقى ۇسىناتىن جۇمىس كوپ. كەلگەن جىلى ايىنا 170 مىڭ تەڭگە جالاقى السام, قازىر تابىسىم 300 مىڭ تەڭگەگە جەتتى. بىلەتىن ادامعا مەنىڭ ماماندىعىم قيىن ەمەس. قيىن ەمەس ەكەن دەپ, قاۋىپسىزدىك شارالارىن ساقتاماسقا تاعى بولمايدى. مىسالى, بۇگىن ۆەلوجولاققا جارىق تۇسىرەتىن ەلەكترلى باعانداردى تەكسەرۋگە شىقتىم. مۇندا دا ساق قيمىلداماساق, قاۋىپ-قاتەر تابان استىندا», دەيدى مۇرات.
ون سەگىزىندە جاسپىن دەمەي, بىردەن ماماندىعى بويىنشا جۇمىسقا كىرىسكەن م.تاباتاەۆتىڭ بۇگىندە بىلىكتىلىگىن راستايتىن قۇجاتى بار. قازىر ول 3-رازريادتى ەلەكتريك. 4-, 5-رازريادتى ەلەكتريك ساناتىن الۋعا جوعارى ءبىلىم قاجەت ەكەن. مۇراتتىڭ كەلەشەكتە ەنەرگواۋديتور ماماندىعى بويىنشا جوعارى ءبىلىم الۋ ويىندا بار. وعان دەيىن تاعى بىرەر جىل وسكەن ولكەگە قىزمەت ەتۋدى پەرزەنتتىك پارىزى سانايدى.