«استانا وپەرا» ارتىستەرى قىتايدان جەڭىسپەن ورالدى. تەاتردىڭ جەتەكشى ءسوليسى دياس قۇرمانعازى مەن جاس حورەوگراف, سوليست سۇلتانبەك عۇمار لياونيندەگى (شەنيان) بالەت ارتىستەرىنىڭ ءبىرىنشى حالىقارالىق بايقاۋىندا ماراپاتتارعا يە بولدى, دەپ حابارلايدى Egemen.kz.
بايقاۋ 10 ەلدەن كەلگەن 400-دەن استام قاتىسۋشىنى بىرىكتىردى, ال قازىلار القاسىنىڭ قۇرامىندا الەمدىك ساحنادا تانىلعان 20 شەبەر جۇمىس ىستەدى. دياس قۇرمانعازى ۇزدىك ورىنداۋ ءۇشىن, ال سۇلتانبەك عۇمار ۇزدىك حورەوگرافيا ءۇشىن جۇلدەگەر اتاندى.
شەنيان ساحناسىندا دياس قۇرمانعازى ءوزىنىڭ سەرىكتەسى كاميلا شاحمانوۆامەن بىرگە پ.چايكوۆسكيدىڭ «جاڭعاق شاققىش», ر.دريگونىڭ «تاليسمان» بالەتتەرىنەن ۇزىندىلەردى جانە سۇلتانبەك عۇماردىڭ قويىلىمىنداعى «اڭساۋ» ءنومىرىن ورىندادى. سوڭعى قويىلىم باعدارلامانىڭ كوركىنە اينالىپ, قازىلار القاسى تاراپىنان ارتىستەردىڭ پلاستيكاسى, نومىردەگى مۋزىكاسى جوعارى باعالانىپ, باسقا قاتىسۋشىلاردىڭ ءبىرسارىندى بيلەرىنە ۇقسامايتىنىن اتاپ ءوتتى. كلاسسيكالىق نومىرلەر بويىنشا ارتىستەرمەن قازاقستاننىڭ ەڭبەك سىڭىرگەن قايراتكەرى رۇستەم سەيىتبەكوۆ جۇمىس ىستەدى.
قويىلىمنىڭ مۋزىكاسىن كوركەمدەگەن «حاسساق» ەتنو-فولكلورلىق توبىنىڭ كومپوزيتسياسى بولدى. حورەوگرافتىڭ ايتۋىنشا, قويىلىمنىڭ از ۋاقىت ىشىندە پايدا بولۋىنا دا وسى مۋزىكا اسەر ەتكەن.
بۇل ماراپاتتار قازاقستاندىق بالەت مەكتەبىنىڭ حالىقارالىق بەدەلىنە قوسىلعان ەلەۋلى ۇلەس بولدى. «استانا وپەرا» ءۇشىن مۇنداي بايقاۋلار جوعارى دايىندىق دەڭگەيىن كورسەتۋگە, الەمدىك بالەتتىڭ جەتەكشى وكىلدەرىمەن شىعارماشىلىق بايلانىستىردى نىعايتۋعا جانە قازاقستانداعى بيشىلەردىڭ جاڭا بۋىنىن شابىتتاندىرۋعا مۇمكىندىك بەرەدى.