قازاقستان مەن قىتاي اراسىنداعى ءوزارا ساۋدا كولەمى 2025 جىلدىڭ العاشقى التى ايىندا $21,8 ملرد بولدى. بۇل تۋرالى قر ساۋدا جانە ينتەگراتسيا مينيسترلىگى حابارلادى, دەپ جازادى Egemen.kz.
2024 جىلى قوس مەملەكەت اراسىنداعى تاۋار اينالىمى 9,2%-عا ءوسىپ, $43,8 ملرد-قا جەتكەن ەدى. بيىلعى كورسەتكىش ەكى ەل اراسىنداعى ەكونوميكالىق بايلانىستاردىڭ تۇراقتى دامىپ كەلە جاتقانىن اڭعارتادى.
مينيسترلىك مالىمەتىنشە, قازاقستان تاراپى قىتايعا بىرقاتار جاڭا ۇسىنىس جاسادى. اتاپ ايتقاندا, وتاندىق ونىمدەردى قحر نارىعىنا ءتيىمدى شىعارۋ ءۇشىن يمپورتتىق كەدەندىك باجداردى تومەندەتۋ ماسەلەسىن كوتەردى. سونىمەن قاتار, قىتايدىڭ ءىرى ونلاين-ساۋدا الاڭدارىندا قازاقستان ۇلتتىق پاۆيلوندارىنىڭ اياسىن كەڭەيتۋ ۇسىنىلدى.
پەكيندە وتكەن ساۋدا جانە ينتەگراتسيا ءمينيسترى ارمان شاققاليەۆ پەن قحر كوممەرتسيا ءمينيسترى ۆان ۆەنتاو اراسىنداعى كەزدەسۋدە ساۋدا سالاسىن دامىتۋعا قاتىستى ناقتى باعىتتار تالقىلاندى. تاراپتار قازاقستاندىق وڭدەلگەن ونىمدەر مەن جوعارى قوسىلعان قۇندى تاۋارلاردى ەكسپورتتاۋ, كەدەندىك راسىمدەردى تسيفرلاندىرۋ, ەلەكتروندىق كوممەرتسيانى ورىستەتۋ جانە دسۇ اياسىنداعى كەدەرگىلەردى جويۋ ماسەلەلەرىن قاراستىردى.
ال قىتاي تاراپى وڭىرلىك ارىپتەستىكتى كەڭەيتۋگە دايىن ەكەنىن ءبىلدىردى. ال قازاقستان 2024 جىلدان بەرى التى ساۋدا ميسسياسىن وتكىزدى. ولار نانكين, چەندۋ, ءۇرىمشى, سيان, چۋنتسين جانە گۋانچجوۋ قالالارىندا ۇيىمداستىرىلىپ, تسزيانسۋ, سىچۋان, حۋنان, شاندۋن, شەنسي جانە گۋاندۋن پروۆينتسيالارىنىڭ بيزنەس وكىلدەرىمەن جانە جەرگىلىكتى بيلىكپەن بايلانىس ورناتىلدى.
قازاقستان مەن قىتاي اراسىنداعى ساۋدا قارىم-قاتىناسى جىلدان جىلعا ارتىپ كەلەدى. ساراپشىلاردىڭ پىكىرىنشە, كەدەندىك باجداردى تومەندەتۋ جانە e-commerce سالاسىندا ىنتىماقتاستىقتى ارتتىرۋ ەكى ەلدىڭ ەكونوميكالىق سەرىكتەستىگىن جاڭا دەڭگەيگە شىعارادى.