كەشە ورتالىق كوممۋنيكاتسيالار قىزمەتىندە «كاسىپكەرلىكتى قولداۋ جانە دامىتۋ» تاقىرىبىندا ءباسپاسوز ءماسليحاتى ءوتتى. وندا كاسىپكەرلەر پالاتاسى باسقارماسىنىڭ توراعاسى ابىلاي مىرزاحمەتوۆ تاقىرىپ اياسىندا اڭگىمە ءوربىتتى.
سپيكەر مەملەكەت باسشىسىنىڭ توراعالىعىمەن تاياۋدا بولعان ۇكىمەتتىڭ كەڭەيتىلگەن وتىرىسىندا كوتەرىلگەن وزەكتى ماسەلەلەرگە توقتالدى. ءسويتىپ, «نۇرلى جول – بولاشاققا باستار جول» جولداۋىندا جۇكتەلگەن تاپسىرمالاردىڭ ورىندالۋ بارىسى تۋرالى اڭگىمەلەدى. سونداي-اق, وتاندىق كاسىپكەرلەردىڭ قازىرگى كەزىگىپ وتىرعان قيىندىقتارى جونىندە دە ايتتى. «ەل دامۋىنداعى نەگىزگى باعدارلاماعا اينالعان جولداۋدا جۇمىسسىزدىقتى مۇمكىندىگىنشە قىسقارتىپ, جاڭا قىزمەت ورىندارىن اشۋ ءىسى ۇكىمەت پەن ۇلتتىق كومپانيالارعا ارنايى تاپسىرما رەتىندە بەرىلگەنى ءمالىم. وسى تۇرعىدا جاڭا جۇمىس ورىندارىن اشۋدا كاسىپكەرلەردىڭ ءرولى ۇلكەن ەكەنى بەلگىلى. سوندىقتان, قازىرگى كۇندە بۇرىنعى جۇمىس ورىندارىن ساقتاپ, جاڭا كاسىپورىندار مەن قىزمەت كورسەتۋ مەكەمەلەرىن ۇيىمداستىرۋ شاراسى ءبىزدىڭ سالادا دا جۇيەلى جۇرگىزىلىپ جاتىر», دەدى باسقارما توراعاسى.
قازىرگى تاڭدا وتاندىق كاسىپكەرلەرگە كورشى رەسەي ەلىنە سالىنعان سانكتسيالار مەن ءرۋبلدىڭ قۇنسىزدانۋى اۋىر ءتيىپ وتىرعانىن ايتقان ا.مىرزاحمەتوۆ, داعدارىستى ەڭسەرۋگە ۇكىمەت بارلىق مۇمكىندىكتەردى قاراستىرىپ وتىرعانىن جەتكىزدى. ال «نۇرلى جول» باعدارلاماسى بويىنشا سالىناتىن بارلىق نىسانداردى ءوزىمىزدىڭ كومپانيالار سالىپ, ولارعا قولدانىلاتىن بارلىق قۇرىلىس ماتەريالدارىن وتاندىق كاسىپورىنداردا جاساۋ كەرەكتىگىن ءتۇسىندىردى. «وزدەرىڭىز بىلەسىزدەر, ۇلتتىق قوردان ءۇش جىلدىڭ ىشىندە «نۇرلى جول» باعدارلاماسى بويىنشا 3 ملرد. اقش دوللارى بولىنەدى. ونىڭ سىرتىندا «دامۋ» قورى ارقىلى كاسىپكەرلىكتى قولداۋعا 100 ملرد. تەڭگە باعىتتالعان بولاتىن. ەندى «نۇرلى جول» باعدارلاماسى ەنگىزگەن وزگەرىستەردىڭ ارقاسىندا وسى 100 ملرد. قارجىنىڭ ۇستىنە تاعى 100 ملرد. تەڭگە قوسىلادى دەگەن جوسپار بار. بۇل قاراجات «دامۋ» قورى نەمەسە «بايتەرەك» حولدينگى ارقىلى بانكتەرگە جەتكىزىلىپ, سول ارقىلى كاسىپكەرلەرگە كومەك قولىن سوزادى», دەدى ول.
وسى ورايدا تاعى ءبىر ايتىلعان ماڭىزدى شارا, داعدارىس كەزىندە بارلىق ىشكى سۇرانىستى ءوز ەلىمىزدە قالدىرعان ءجون ەكەن. «ياعني ۇلتتىق كومپانيالار مەن مەملەكەتتىك ورگانداردىڭ تاپسىرىستارىن سىرتقا شىعارماي, ءوز كاسىپكەرلەرىمىزگە بەرگىزۋ قاجەت. بۇل تۋرالى ناقتى باعدارلاما بار. قازىرگى ۋاقىتتا 280-گە جۋىق كاسىپورىن بۇل باعدارلاماعا كىرگەن, ونىڭ ءتىزىمى قازىر كوبەيۋ ۇستىندە. بۇل تۋرالى ەلباسى دا ناقتى ايتقان. ياعني «نۇرلى جول» باعدارلاماسى بويىنشا سالىناتىن بارلىق نىسانداردى ءوزىمىزدىڭ كومپانيالار سالىپ, ولارعا قولدانىلاتىن بارلىق قۇرىلىس ماتەريالدارى ءوزىمىزدىڭ كاسىپورىنداردا جاسالۋى ءتيىس. وسى جۇمىستى ءبىز ۇكىمەتپەن بىرگە باقىلاۋعا الىپ, جوسپار بويىنشا جۇرگىزىلۋىن قاداعالايتىن بولامىز», دەدى ا.مىرزاحمەتوۆ.
نۇرباي ەلمۇراتوۆ,
«ەگەمەن قازاقستان».