«قاراسورا-2025» جەدەل-پروفيلاكتيكالىق ءىس-شاراسى بارىسىندا پوليتسيا قىزمەتكەرلەرى مەن ۇلتتىق ۇلاننىڭ «بۇركىت» ارنايى جاساعى سىرداريا اۋدانى بەسارىق اۋىلىنىڭ ماڭىنان ءىرى ەسىرتكى القابىن تاۋىپ, جويدى, دەپ حابارلايدى Egemen.kz.
ءىس-شارا كەزىندە سالماعى 58 كيلوعا جۋىق 1156 ءتۇپ ەسىرتكى تاركىلەنىپ, وقيعا ورنىنان جالپى سالماعى 1 كيلو 610 گرامم كەپتىرىلگەن ماريحۋانا تابىلىپتى. وسىعان بايلانىستى 42 جانە 33 جاستاعى وبلىس تۇرعىندارى ۇستالىپ, قاماۋعا الىنعان. قازىر سوتقا دەيىنگى تەرگەپ-تەكسەرۋ ارەكەتتەرى جۇرگىزىلىپ جاتىر.
«قاراسورا-2025» جەدەل-پروفيلاكتيكالىق ءىس-شاراسى باستالعالى بەرى 172 ەسىرتكى قۇقىق بۇزۋشىلىعى انىقتالىپ, 959 كيلو ەسىرتكى تاركىلەندى. بەس فيتوزەرتحانا انىقتالعان. وبلىس اۋماعىندا ەسىرتكى وسىرۋمەن اينالىسقان 36 ادام ۇستالىپتى.