ماڭعىستاۋ وبلىسىندا «كەلەشەك مەكتەپتەرى» ۇلتتىق جوباسى اياسىندا سىيىمدىلىعى 12 600 ورىندى قامتيتىن 13 مەكتەپتىڭ قۇرىلىسى ءجۇرىپ جاتىر. ءبىر جاعىنان, وڭىردە وقۋشىلار سانى جىلدان-جىلعا كوبەيىپ, ءبىلىم وشاقتارى جەتىسپەۋشىلىگى كۇن تارتىبىنەن تۇسكەن ەمەس. سوندىقتان مەكتەپ قۇرىلىسى ەرەكشە ماڭىزعا يە بولىپ وتىر. قازىرگى تاڭدا وبلىستا 4 500 ورىندىق اقتاۋ قالاسىندا – 3, مۇنايلى اۋىلىندا – 1, بارلىعى ءتورت مەكتەپ پايدالانۋعا بەرىلدى.
الداعى قىركۇيەك ايىندا وقۋشىلار 6 600 ورىندىق جاڭا 8 مەكتەپتىڭ تابالدىرىعىن اتتايدى. ولار: اقتاۋ قالاسى ومىرزاق اۋىلىندا, 20-شاعىن اۋداندا, جاڭاوزەن قالاسى مەرەي شاعىن اۋدانىندا, بەينەۋ اۋىلىندا جانە وسى اۋداننىڭ سام اۋىلىندا, ماڭعىستاۋ اۋدانى كوسبۇلاق اۋىلىندا, مۇنايلى اۋدانى ماڭعىستاۋ-3 جانە باتىر اۋىلىندا. سونداي-اق قازان ايىندا اقتاۋ قالاسىنىڭ 16-شاعىن اۋدانىندا 1 500 ورىندىق مەكتەپ پايدالانۋعا بەرۋ جوسپارلانعان.
– جاڭا ءبىلىم وشاقتارىنىڭ ءبىرى – مۇنايلى اۋدانى باتىر اۋىلى سامال شاعىن اۋدانىندا ورنالاسقان №20 جالپى ءبىلىم بەرەتىن مەكتەپ. قازىرگى تاڭدا مەكتەپتىڭ قۇرىلىسى ءتامامدالىپ, كابينەتتەر جابدىقتالىپ جاتىر. 1 200 ورىندىق مەكتەپ 56 زاماناۋي ءپان كابينەتتەرىمەن جابدىقتالعان. مۇندا وقۋشىلاردىڭ شىعارماشىلىعىن دامىتۋ ءۇشىن STEM زەرتحانالارى, ۆيزۋالدى ديزاين جانە حورەوگرافيا كابينەتتەرى جۇمىس ىستەيدى. سونىمەن قاتار ەرەكشە ءبىلىمدى قاجەت ەتەتىن بالالارعا سەنسورلىق كابينەت, لوگوپەد, دەفەكتولوگ جانە پسيحولوگ كابينەتتەرى كەيىنگى ۇلگىدەگى جابدىقتارمەن قامتاماسىز ەتىلگەن. جەتكىنشەكتەردىڭ بوس ۋاقىتىن ءتيىمدى پايدالانۋ ماقساتىندا مەكتەپتە 2 سپورت زال, حورەوگرافيا, ۆيزۋالدى ونەر, ديزاين جانە تەحنولوگيا, شەبەرحانا, تاماقتانۋ مادەنيەتى كابينەتتەرى بار, – دەيدى مۇنايلى اۋداندىق ءبىلىم ءبولىمى باسشىسىنىڭ مىندەتىن اتقارۋشى س.جۇبانوۆ.
ال بەينەۋ اۋدانىنىڭ سام اۋىلىندا 300 ورىندىق, بەينەۋ اۋىلىندا 900 ورىندىق زاماناۋي مەكتەپ قۇرىلىسىن «سك ستروي» جشس جۇرگىزىپ جاتىر. جاڭا ءبىلىم وشاقتارى تيپتىك جوباعا ساي سالىنىپ, زاماناۋي تالاپتارعا تولىق سايكەس جابدىقتالماق. مەكتەپتەردە بەينەباقىلاۋ كامەرالارى, دابىل باتىرمالارى, اسحانا, ءماجىلىس زالى, سپورت زالدارى, لينگافوندى-كومپيۋتەرلىك كابينەتتەر ورنالاسقان. سونىمەن بىرگە STEM-زەرتحانالار, روبوتتەحنيكا جانە حورەوگرافيا كابينەتتەرى, ينكليۋزيۆ جانە لوگوپەد كابينەتتەرى, دەمالىس ايماقتارى مەن كوۆوركينگ الاڭدارى, وقۋشىلاردىڭ جەكە زاتتارىنا ارنالعان شكافتار مەن قوسىمشا ءبىلىم بەرۋ بولمەلەرى قاراستىرىلعان. ەكى مەكتەپتىڭ دە قۇرىلىسى قىركۇيەككە دەيىن اياقتالىپ, جاڭا وقۋ جىلىندا وقۋشىلاردى قابىلداۋدى جوسپارلاپ وتىر.
ماڭعىستاۋ وبلىسى