اتىراۋ وبلىسىنىڭ ەكولوگتەرى ء«اموز» جشس تاراپىنان لاستاۋشى زاتتاردىڭ شىعارىندىلارىن نورماتيۆتەن اسىرعانىن انىقتادى, دەپ حابارلايدى Egemen.kz.
وبلىستىق ەكولوگيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, وسىعان بايلانىستى ء«اموز» جشس-عا قاتىستى اكىمشىلىك قۇقىق بۇزۋشىلىق تۋرالى كودەكسىنىڭ 328-بابىنىڭ 3-بولىگىمەن اكىمشىلىك قۇقىق بۇزۋشىلىق تۋرالى ءىس قوزعالعان.
بۇل ءىس اتىراۋ قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىندا قارالدى. سوتتىڭ 29 شىلدەدەگى قاۋلىسىمەن زاڭدى تۇلعا كىنالى دەپ تانىلىپ, 28 020 324 تەڭگە مولشەرىندە ايىپپۇل سالىنعان.
«الايدا, ء«اموز» جشس سالىنعان ايىپپۇلمەن كەلىسپەي, اتىراۋ وبلىستىق سوتىنا اپەللياتسيالىق شاعىممەن جۇگىندى. سوتتىڭ 13 تامىزداعى جىلعى قاۋلىسىمەن زاۋىتتىڭ اپەللياتسيالىق شاعىمى قاناعاتتاندىرۋدان باس تارتىلدى. ايىپپۇل وزگەرىسسىز قالدىرىلدى. سوت قاۋلىسى زاڭدى كۇشىنە ەندى. قازىر ايىپپۇل ءوندىرىلۋ ساتىسىندا تۇر», دەپ حابارلادى دەپارتامەنتتىڭ ءباسپاسوز قىزمەتى.