ەلىمىزدىڭ باتىس شەكاراسىندا قيعاش اتالاتىن وزەن بار. سۋ ايدىنىنىڭ بەرگى جاعالاۋىندا اتىراۋ وبلىسىنداعى قۇرمانعازى اۋدانىنىڭ بىرنەشە اۋىلى, ارعى جاعاسىندا رەسەي فەدەراتسياسىنىڭ استراحان وبلىسىنىڭ ەلدى مەكەندەرى ورنالاسقان.
بيىل بۇل وزەندە تاعى دا لوتوس گۇلدەدى. لوتوس القابىنىڭ اۋماعى شامامەن – 8-10 گەكتار. سۋ ۇستىندەگى سۇلۋلىق ءرامىزى شىلدەنىڭ ورتاسى مەن تامىزدىڭ سوڭىنا دەيىن ءبۇر جارىپ تۇرادى. ءبىر قىزىعى, تاڭ اتىسىمەن قاۋىزى اشىلعان ساتتەگى كورىنىستىڭ ءجونى بولەك. قۇددى سۋ ۇستىنە القىزىل كىلەم توسەلگەندەي كورىنەدى. سامال جەلمەن تەربەلىپ تۇراتىن لوتوستىڭ ۇزىندىعى 2 مەترگە دەيىن جەتەدى. ال جاپىراعىنىڭ ديامەترى 60 سانتيمەترگە سوزىلادى. نەگە ەكەنى بەلگىسىز, ىڭىردە القىزىل گۇلدىڭ قاۋىزى قايتا جابىلادى.
قيعاش وزەنىندەگى وسىناۋ كەرەمەتتى سوزبەن سۋرەتتەۋ مۇمكىن ەمەس, تاڭعاجايىپتى كوزبەن كورۋ كەرەك. سول سەبەپتى, قۇرمانعازى اۋدانىنىڭ اكىمدىگى 26 شىلدەدە سۋ ايدىنىنا جاقىن ورنالاسقان تەڭىز اۋىلىندا «Lotus Fest – 2025» حالىقارالىق فەستيۆالىن وتكىزدى. مۇنايلى وڭىردەگى وتاندىق ءتۋريزمدى دامىتۋعا ارنالعان ءىس-شاراعا العاشقى كۇنى باتىس قازاقستان, ماڭعىستاۋ, اقتوبە وبلىستارى مەن رەسەيدىڭ شەكارالاس وڭىرلەرىنەن 5 مىڭنان استام تۋريست كەلدى.
وزەن جاعالاۋىنداعى ەتنواۋىلدا 20 كيىز ءۇي تىگىلدى. تامىزدىڭ سوڭىنا دەيىن 12 كيىز ءۇيدى اقىلى قوناقۇي رەتىندە پايدالانۋ كوزدەلىپ وتىر. فەستيۆال اياسىندا ءتۇرلى ءىس-شارا ءوتتى, حالقىمىزدىڭ ۇلتتىق سالت-داستۇرىنە قاتىستى قۇندىلىقتار ناسيحاتتالدى. اتىراۋ وبلىسىنان 35, كورشىلەس رەسەي فەدەراتسياسىنان 3 كاسىپكەر ءوز ونىمدەرىن ۇسىندى. قولونەر جارمەڭكەسىندە ۇلتتىق ناقىشپەن جاسالعان بۇيىمدار مەن تاعامداردىڭ الۋان ءتۇرى تانىستىرىلدى. جاسوسپىرىمدەر ساز بالشىقتان ءتۇرلى بۇيىم جاساۋدى ۇيرەندى, قىلقالاممەن تابيعاتتىڭ تاماشا كورىنىستەرىن بەينەلەدى. كوبىنىڭ تاڭداعانى – سۋ ورتاسىندا وسكەن لوتوستىڭ اسەمدىگى.
«Atyrau Nomads» ساياحات كلۋبى لوتوس القابىنداعى كەرەمەت كورىنىستى تاماشالاۋعا تۋريستەردى 30 كولىكپەن الىپ كەلدى. ساياحات كلۋبى ۇيىمداستىرعان ساپارمەن كەلگەن تۋريستەر سانى – 150 ادام. كلۋب قۇرىلتايشىسى ەرلان توراليەۆتىڭ ايتۋىنا قاراعاندا, 2020 جىلى لوتوس القابىنا تانىمدىق تۋر وتكىزىلىپتى. بيىلعى تۋريستەردىڭ دەنى لوتوس القابىن بۇرىن كورمەگەن ەكەن.
«كلۋبىمىز بەلسەندى ساياحاتشىلاردىڭ ۇيعارىمىمەن قۇرىلعان. بۇرىن دا ەلىمىزدىڭ وزگە وڭىرلەرىنىڭ تۋريستىك مەكەندەرىنە, اتاپ ايتساق, ماڭعىستاۋ وبلىسىنداعى بوزجىرا جازىعىنا ساياحات ۇيىمداستىردىق. لوتوس – تابيعاتتىڭ سيرەك كورىنىسى. اسىرەسە بالالار ءۇشىن ۇمىتىلماس كورىنىس. بيىلعى ساپارىمىزدا بالالارعا ەلىمىزدىڭ تاڭعاجايىپ تابيعاتىن كورسەتۋدى ماقسات ەتتىك. مۇنداي ساپارلار تابيعاتقا دەگەن سۇيىسپەنشىلىكتى ارتتىرادى», دەيدى ە.توراليەۆ.
ساياحات كلۋبىنىڭ ساپارى الداعى كۇندەرى باتىس قازاقستان وبلىسىنىڭ بوكەي ورداسى اۋدانىنداعى حان ورداسى تاريحي-مادەني, ارحيتەكتۋرالىق-ەتنوگرافيالىق مۇراجاي-قورىعىنا جالعاسادى.
ۇلتتىق سپورت تۇرلەرىنەن ۇيىمداستىرىلعان سايىستار كوپشىلىكتىڭ دەلەبەسىن قوزدىردى. قول كۇرەسىنە 24 سپورتشى قاتىستى. ەڭ كوپ سپورتشى قازاق كۇرەسىنەن باق سىنادى. 80 كگ سالماقتا 18, ودان جوعارى سالماقتا 10 بالۋان بەلدەستى. ساداق, اسىق اتۋ سايىسىنا قىزىعۋشىلار قاراسى دا كوپ بولدى. ارقان تارتىستا 30-عا جۋىق سپورتشىدان قۇرالعان 6 كوماندا سايىسقا ءتۇستى.
ۇلتتىق سپورتتىڭ ءباسىن كوتەرگەندەر اراسىندا ەلگە تانىلعان سپورتشىلار دا بار. سونىڭ ءبىرى – 43 جاستاعى بالۋان بەكبولات سالىقوۆ. بۇرىن قازاق كۇرەسىنەن رەسپۋبليكالىق سايىستاردا توپ جارعان ارداگەر سپورتشى قارسىلاسىنىڭ ءبارىن جەڭىپ, جەڭىمپاز اتاندى. بۋرا سان جىگىتتەر زىلتەمىردى توبەسىنەن اسىرا كوتەرىپ, بىرنەشە مەترگە دەيىن ءجۇرىپ ءوتتى.
تۋريستەر لوتوس القابىنا 30-دان استام قايىقپەن باردى. ءار قايىققا شامامەن 5 ادام ءمىندى. فەستيۆالدىڭ العاشقى كۇنىندە 550-گە جۋىق قايىق رەيسى جاسالدى.
اتىراۋ وبلىسى