سارسەنبى كۇنى استانادا بوكس فەدەراتسياسىنىڭ ۇيىمداستىرۋىمەن ەرەسەكتەر اراسىندا ەلباسى كۋبوگى جولىندا ءوتىپ جاتقان ءىى حالىقارالىق ءتۋرنيردىڭ شيرەك فينالدىق كەزدەسۋلەرى ءوتتى.
مۇندا قازاقستان قۇراماسىندا شيرەك فينالعا جولداما العان 32 بوكسشىنىڭ اراسىندا 24 بىلعارى قولعاپ يەسى كەلەسى اينالىمعا شىقتى. جارتىلاي فينالعا جولداما العان بوكسشىلاردىڭ دەنى ۇلتتىق قۇرامانىڭ وكىلدەرى بولعانىنا بايلانىستى ولاردىڭ كوبى ءبىر-بىرىمەن قولعاپ ءتۇيىستىردى. وندا بيىلعى رەسپۋبليكا چەمپيوناتىنىڭ اقتىق سىنىندا جولدارى تۇيىسكەن 69 كگ. سالماقتاعى رۇستەم سىباەۆ پەن سەرىك ساپيەۆ, 81 كگ. سالماقتاعى المات سەرىموۆ پەن ازامات بەلگىباەۆ كەزدەستى. ەستەرىڭىزدە بولسا, قازاقستان چەمپيوناتىندا رۇستەم مەن المات قارسىلاستارىن قينالماي جەڭگەن ەدى. سونداي-اق, جارتىلاي فينالدا نۇرداۋلەت جارمانوۆ پەن ءالىبي نۇرماتوۆ (75 كگ.), داۋرەن ەلەۋسىنوۆ پەن دانابەك سۋجانوۆ (75 كگ.) كەزدەسسە, مارات قياسوۆ (81 كگ.) كۋبالىق يروسبانيس ديۋۆەرگەل اۆيلەسپەن, دانيار ۇستەمباەۆ (91 كگ.) ونىڭ جەرلەسى لينيەر ۋنيسە پەرو جۋستينمەن كۇش سىناستى. سونىمەن بىرگە اسا اۋىر سالماقتا يۆان دىچكو مەن رۋسلان مىرساتاەۆتىڭ جولى تۇيىسسە, دوسجان وسپانوۆ سيريالىق سوۋمار حۋسسۋنمەن كەزدەستى. وسى جەردە جارتىلاي فينالدا ودان باسقا تاعى ءبىر سيريالىق بوكسشىنىڭ ونەر كورسەتكەنىن اتاپ وتكەنىمىز ءجون. موحامماد حۋسسۋن 91 كگ. سالماقتا ۋكراينالىق الەكساندر ۋسينمەن قولعاپ ءتۇيىستىردى.
ال جەڭىل سالماقتا قازاقستان قۇراماسىندا ءبىرجان جاقىپوۆ, ماردان بەرىكباەۆ (48 كگ.), نۇرعازى ءجۇسىپوۆ, ميراس جاقىپوۆ (51 كگ.), دانيار تولەگەنوۆ (54 كگ.), ءمادي شولاقوۆ (57 كگ.), عاني جايلاۋوۆ, ايدار امىرزاقوۆ, سامات باشەنوۆ (60 كگ.), مەرەي اقشالوۆ, ادىلەت ەگىزەكوۆ (64 كگ.) جارتىلاي سىنعا جولداما الدى. بۇل كەزدەسۋلەردە سامات ۋكراينانىڭ وليمپيادا چەمپيونى ۆاسيلي لوماچەنكومەن كۇش سىناسسا, ميراس رەسەيلىك تالانتتى بوكسشى عايىربەك گەرماحانوۆپەن كەزدەستى. وسى جەكپە-جەكتەر گازەت بەتى قاتتالىپ جاتقاندا وتكەندىكتەن ولاردىڭ ناتيجەلەرىن كەلەسى ءنومىردە حابارلاۋدى ءجون كورىپ وتىرمىز.
ءسويتىپ, قازاقستان قۇراماسىنان 24 بوكسشى جارتىلاي فينالعا شىقسا, رەسەيدەن ءۇش بوكسشى – عايىربەك گەرماحانوۆ, ۆيسلان دالحاەۆ, الەكساندر بەسپۋتين شىقتى. كۋبادان – يوسۆاني ۆيەيتا سوتو, نورلان ۆەرا دياس جانە جوعارىدا اتالعان يروسبانيس ديۋۆەرحەل اۆيلەس پەن لينيەر ۋنيسە پەرو جۋستين جولداما الدى.
بيىلعى تۋرنيردە موڭعوليا, سيريا مەن ءۇندىستان بوكسشىلارى جاقسى قىرىنان كورىنۋدە. وسى كەزگە دەيىن جارتىلاي فينالعا شىقپاعان اتالعان ەلدەردىڭ قۇرامالارىنىڭ بيىلعى جارىستا ەكى-ءۇش بىلعارى قولعاپ شەبەرلەرى اقتىق سىنعا جولداما الۋ ءۇشىن كۇرەسۋدە.
تاعى ءبىر اتاپ وتەتىن نارسە, وسى جىلعى تۋرنيرگە ءاىۆا-نىڭ تورەشىلەر القاسىنىڭ جەتەكشىسى تەرري سميت كەلىپ, ازيا ايماعىنداعى ءبىر جۇلدىزدى تورەشىلەردەن ەمتيحان الۋدا. ولاردىڭ اراسىندا ءبىزدىڭ ەلىمىزدەن تورەشى ەر ازاماتتاردان باسقا ەكى نازىك جاندى قازى دا بار. تۋرنير ولاردىڭ جۇمىسى ت.سميتتىڭ كوڭىلىنەن شىعىپ جاتسا, ءوز ىستەرىن ادال اتقارعاندارى ءۇشىن ولار ومىراۋلارىنا ەكىنشى جۇلدىزدى قادايدى.
داستان كەنجالين.