سينوپتيك ماماندار بيىل جەر-انانىڭ ايقارا جامىلعان اق كورپەسىن مەرزىمىنەن بۇرىن شەشىپ, اعاشتىڭ ەرتە بۇرشىك جاراتىنىن, مامىر جاۋىن-شاشىندى كەلەتىنىن ايتىپ وتىر. قيسىنعا كەلەتىن بولجام با دەرسىڭ: تەرىسكەيدە قىس مامىراجاي قالىپتا ءوتىپ, كوكتەمنىڭ العاشقى ايى «سامارقاننىڭ كوك تاسى» ەرىپ كەتەتىندەي ەرەكشە جىلىلىقتى, بەرەكەنىڭ, مولشىلىق-ىرزىقتىڭ باسى سانالاتىن ءاز ناۋرىزدىڭ جاقىنداپ قالعانىن سەزدىرتەدى. قاردىڭ جىلداعىدان مول ءتۇسۋىن جۇرتشىلىق جاقسى ىرىم ساناپ, الداعى كۇندەرگە ۇلكەن ۇمىتپەن, سەنىممەن قارايدى. وسىنداي تىنىش, ءولىارا شاقتا «كوكتەمنىڭ ءار كۇنى – جىلعا ازىق» دەگەن حالىق ماقالىن جادىنا مىقتاپ تۇتقان سولتۇستىكقازاقستاندىق ديقاندار باس قوسىپ, كوكتەمگى-دالا جۇمىستارىن ۇيىمشىلدىقپەن وتكىزۋدىڭ جولدارى مەن پروبلەمالارىن جان-جاقتى تالقىلاۋدان وتكىزدى. سەمينار-كەڭەسكە اۋدانداردىڭ, اۋىلدىق وكرۋگتەردىڭ اكىمدەرى, ۆەدومستۆولار مەن ۇيىمداردىڭ, اگروقۇرىلىمداردىڭ باسشىلارى, عالىمدار مەن ءىرى فيرمالاردىڭ وكىلدەرى قاتىستى.
القالى باسقوسۋدى وبلىس اكىمى ەرىك سۇلتانوۆ اشىپ, جۇرگىزىپ وتىردى. ول ءوز سوزىندە ەلباسى ن.نازارباەۆ قىزىلجار وڭىرىندە بولعان بىلتىرعى جۇمىس ساپارىندا اگرارلىق سەكتوردى ەل ەكونوميكاسىن دامىتۋدىڭ باستى باعدارى رەتىندە اتاپ كورسەتكەنىن, تىكەلەي تاپسىرماسىمەن ءازىرلەنگەن «اگروبيزنەس-2020» باعدارلاماسىنىڭ تۇپكى ءمانى اۋىل شارۋاشىلىعى سالاسىن رەفورمالاۋدى دىتتەيتىنىن, وتاندىق تاۋارلار مەن ونىمدەردى وندىرۋشىلەردى, ورتا جانە شاعىن بيزنەس وكىلدەرىن قولداۋدىڭ جاڭا تەتىكتەرى قاراستىرىلعانىن العا تارتتى. وبلىس ەكونوميكاسىندا اگرارلىق سالانىڭ ۇلەسى ۇلكەن. وعان جالپى وڭىرلىك ءونىمنىڭ تورتتەن ءبىرىن قۇرايتىنىن ايتساق تا جەتكىلىكتى. كوكتەمگى ەگىس قول جەتكەن تابىستاردى ودان ءارى ارتتىرۋدىڭ قامى, بارلىق شارالاردىڭ باستاۋى بولىپ تابىلادى. الداعى ۋاقىتتا اۋىلشارۋاشىلىق ونىمدەرىن, ونىڭ ىشىندە مايلى داقىلداردى وڭدەۋدەن وتكىزۋ ءۇشىن قۋاتتى كاسىپورىندار سالىناتىن بولادى. ەرىك حامزا ۇلى فيندەردىڭ تەحنولوگياسى نەگىزىندە وڭىردە وسى جىلى 50 كومباين قۇراستىرىلاتىنى تۋرالى قۋانىشتى حاباردى جەتكىزدى.
وبلىس اكىمىنىڭ ءبىرىنشى ورىنباسارى ايداربەك ساپاروۆ كوكتەمگى-دالا جۇمىستارىنا بايلانىستى الدا تۇرعان مىندەتتەردى باياندادى. اگروونەركاسىپ كەشەنىن دامىتۋدىڭ ءىس-شارالار جوسپارىنىڭ ءبىر تاراۋى وسىمدىك شارۋاشىلىعىن, ونىڭ ىشىندە, ەگىس ناۋقانىن قامتىعان. ونىڭ ىشىندە, ەگىس القاپتارىن ارتاراپتاندىرۋعا مەيلىنشە باسىمدىق بەرىلگەن. 3 ميلليون 300 مىڭ گەكتار القاپقا ءداندى جانە ءداندى-بۇرشاقتى, 568 مىڭ گەكتارعا مايلى, 448 مىڭ گەكتارعا جەمازىقتىق داقىلدار سەبۋ جوسپارلانعان. ىلعال جابۋدان باستاپ ەسەپتەگەندە كوكتەمگى-دالا جۇمىستارىن 45 كۇننىڭ ىشىندە اياقتاۋ سەكىلدى جاۋاپتى مىندەت تۇر. اۋىلشارۋاشىلىق داقىلدارىن قولايلى مەرزىمدە سەبۋ ونىمدىلىكتى 10-15 پايىزعا ارتتىرادى دەگەن وي قورىتتى بايانداماشى.
شارۋاشىلىقتار بيىل دا مەملەكەتتىڭ كومەگىن ايقىن سەزىنۋلى. مينەرالدى تىڭايتقىشتار قۇنىن ارزانداتۋ ءۇشىن 2 ميلليارد 158 ميلليون, گەربيتسيدكە 2 ميلليارد 365 ميلليون تەڭگە دەمەۋقارجى قاراستىرىلعان. وسىمدىك شارۋاشىلىعىن قولداۋعا ارنالعان دەمەۋقارجى مولشەرى – 11,4 ميلليارد تەڭگە. الايدا, اگروقۇرىلىمدار تۇقىممەن 93 پايىز قامتاماسىز ەتىلگەنىمەن, ءالى 109 شارۋاشىلىققا جەتىسپەيتىنى ءتيىستى ورىنداردى ويلاندىرۋى كەرەك. سول سياقتى 15,3 مىڭ تراكتور, 16,2 مىڭ تۇقىم سەپكىش, 1100-دەي سەبۋ كەشەنى, 5,8 مىڭ جۇك ءاۆتوموبيلى, 50 مىڭنان استام توپىراق وڭدەۋ تەحنيكاسى جاۋاپتى ناۋقانعا قاتىسادى دەپ كۇتىلگەنىمەن, دايىندىق ساپىنا 72 پايىزى عانا قويىلعان.
وبلىستا «قازاگرو» ۇبح» اق-تىڭ ەنشىلەس كاسىپورنىنا قاراستى 5 فيليال جۇمىس ىستەيدى. كوكتەمگى-دالا جانە كۇزگى وراق جۇمىستارىن قارجىلاندىرۋ ماقساتىمەن 6 ميلليارد تەڭگە كولەمىندە نەسيە ءليميتى بەرىلىپ, «اكك كەپىلدىگى بويىنشا بيداي مەن ارپانى فورۆاردتىق ساتىپ الۋ» باعدارلاماسى بويىنشا «ازىق-ت ۇلىك كەلىسىمشارت كورپوراتسياسى» ۇك» اق ارقىلى 4 ميلليارد تەڭگە قاراستىرىلعانىمەن, 92 شارۋاشىلىق بار-جوعى 1,8 ميلليارد تەڭگەگە كەلىسىم جاساسقان. دەمەك, بۇل تۇستا دا ويلاناتىن ماسەلەلەر از ەمەس. اگرارلىق سەكتوردا جاڭا ۇقساتۋ كاسىپورىندارى جەلىسىن قۇرۋ جونىندەگى ۇكىمەت تاپسىرماسىنا وراي جىل اياعىنا دەيىن 40 ميلليارد تەڭگەنىڭ 19 جوباسى جۇزەگە اسىرىلاتىن بولادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.