اتىراۋ قالاسى تۇرعىنىنىڭ دونەتسك وبلىسىنداعى قارۋلى قاقتىعىسقا قاتىسقانى انىقتالدى. سوت ونى 5 جىلعا باس بوستاندىعىنان ايىردى, دەپ حابارلايدى Egemen.kz.
اتىراۋ قالالىق №2 سوتىنىڭ اقپاراتىنا قاراعاندا, شەت مەملەكەتتىڭ اۋماعىنداعى قارۋلى قاقتىعىستارعا قاتىسقان ءۇشىن س.-عا قىلمىستىق كودەكستىڭ 172-بابىمەن ايىپ تاعىلعان.
«اتىراۋ قالاسىنىڭ تۇرعىنى س. قازاقستان رەسپۋبليكاسىنىڭ ازاماتى بولا تۇرا, 2024 جىلدىڭ ناۋرىز ايىنىڭ سوڭىندا ماسكەۋگە كەلىپ, رەسەي فەدەراتسياسىنىڭ ۋاكىلەتتى ورگاندارىمەن ەرىكتى تۇردە اسكەري قىزمەت وتكەرۋ تۋرالى كەلىسىمشارت جاساسقان. قىسقا مەرزىمدى وقۋدان كەيىن كيىم-كەشەك الىپ, تانك پولكىنىڭ قۇرامىندا اسكەري دارىگەر رەتىندە دونەتسك وبلىسىندا قارۋلى قاقتىعىستارعا زاڭسىز قاتىسقان. 2024 جىلدىڭ جەلتوقسانىندا قارۋلى قاقتىعىس كەزىندە جارىلعىش قۇرىلعى جارىلىپ, سىنىق جاراقاتىن العان. ەمدەلۋ ءۇشىن اسكەري گوسپيتالگە جاتقىزىلعان», دەپ حابارلادى اتالعان سوتتان.
پروكۋرور س.-عا 6 جىل مەرزىمگە باس بوستاندىعىنان ايىرۋ تۇرىندەگى جازانى تاعايىنداۋدى ۇسىندى. ال سوتتالۋشى كىناسىن تولىق مويىنداپ, باس بوستاندىعىنان ايىرۋمەن بايلانىستى ەمەس جازا تاعايىنداۋدى سۇرادى.
سوت ۇكىمىمەن سوتتالۋشى س.-عا 5 جىل مەرزىمگە باس بوستاندىعىنان ايىرۋ جازاسى تاعايىندالدى.
سوت ۇكىمى زاڭدى كۇشىنە ەنگەن جوق.