ەلوردادا «تازا قازاقستان» جوباسى اياسىندا قۇرىلىس نىساندارى بويىنشا رەيد ءوتتى. ءىس-شارا استانا قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسى پوليتسيا دەپارتامەنتى جانە اۋداندىق اكىمدىكتەرمەن بىرلەسىپ ۇيىمداستىرىلدى, دەپ جازادى Egemen.kz.
باستى ماقسات – قالالىق ورتادا ءتارتىپ ورناتۋ, رۇقساتسىز قوقىس ۇيىندىلەرىنىڭ الدىن الۋ جانە بارلىق ۇيىمنىڭ ەكولوگيالىق كودەكس تالاپتارىن ساقتاۋىن قامتاماسىز ەتۋ.
تەكسەرۋ بارىسىندا بىرقاتار قۇرىلىس نىسانى, ونىڭ ىشىندە سالىنىپ جاتقان تۇرعىن ءۇي كەشەندەرىنىڭ اۋماعى قارالىپ, كەيبىرىندە زاڭبۇزۋشىلىقتار انىقتالدى. اتاپ ايتقاندا, قۇرىلىس جۇمىستارى كەزىندە بەتون قالدىقتارىن تىيىم سالىنعان ورىنعا توگۋ, قۇرىلىس كولىكتەرىنىڭ دوڭعالاقتارىن جۋاتىن قۇرال-جابدىقتىڭ بولماۋى, قوقىستى رۇقسات ەتىلمەگەن جەرگە تاستاۋ فاكتىلەرى تىركەلدى. قۇرىلىس نىساندارىنىڭ جاۋاپتى قىزمەتكەرلەرىنە ايىپپۇل سالىندى.
– كەي كومپانيالاردا قۇرىلىس قالدىقتارىن شىعارۋ بويىنشا كەلىسىمشارتتىڭ جوق ەكەنى بەلگىلى بولدى. مۇنداي جاعدايدا اكىمشىلىك قۇقىقبۇزۋشىلىق تۋرالى كودەكستىڭ 505-بابىنا سايكەس ماسەلەنى شەشۋ ءۇشىن ۋاقىت بەرىلەدى, – دەدى قورشاعان ورتانى قورعاۋ جانە تابيعاتتى پايدالانۋ باسقارماسىنىڭ وكىلى.
قابىلدانعان شارالار زاڭسىز قوقىس ۇيىندىلەرىن ازايتۋعا, بيزنەستىڭ ەكولوگيالىق مادەنيەتىن ارتتىرۋعا جانە جايلى قالالىق ورتانى قالىپتاستىرۋعا باعىتتالعان.