قۋانىش سۇلتانوۆتىڭ توراعالىعىمەن قازاقستان پرەزيدەنتى جانىنداعى ادام قۇقىقتارى جونىندەگى كوميسسيانىڭ قازاقستاندا بالالاردىڭ قۇقىقتارىن قامتاماسىز ەتۋدىڭ وزەكتى ماسەلەلەرىنە ارنالعان كەڭەيتىلگەن وتىرىسى بولىپ ءوتتى.
بەرىلگەن تاقىرىپتا ءبىلىم جانە عىلىم ءمينيسترى اسلان ءسارىنجىپوۆ بايانداما جاسادى. كوميسسيا وتىرىسىنىڭ جۇمىسىنا قازاقستان رەسپۋبليكاسىنىڭ بيلىكتىڭ زاڭ شىعارۋشى, اتقارۋشى جانە سوت تارماقتارى ورگاندارىنىڭ, ءبىلىم بەرۋ, عىلىم جانە مادەني ۇيىمداردىڭ, حالىقارالىق جانە ۇكىمەتتىك ەمەس ۇيىمداردىڭ, ادۆوكاتۋرانىڭ, جۇرتشىلىقتىڭ جانە باق وكىلدەرى قاتىستى.
كوميسسيا وتىرىسىندا قازاقستان كونستيتۋتسياسىندا, «نەكە (ەرلى-زايىپتىلىق) جانە وتباسى تۋرالى» كودەكستە, «بالا قۇقىقتارى تۋرالى», «ءبىلىم بەرۋ تۋرالى», «مەملەكەتتىك ءبىلىم بەرۋ جيناقتاۋ جۇيەسى تۋرالى» قازاقستان زاڭدارىندا, ەكونوميكالىق, الەۋمەتتىك ءجانە مادەني قۇقىقتار تۋرالى حالىقارالىق پاكتىدە, بۇۇ بالا قۇقىقتارى تۋرالى كونۆەنتسياسىندا كەپىلدىك بەرىلگەن بالالاردىڭ قۇقىقتارى مەن مۇددەلەرىن ساقتاۋ ماسەلەسى تالقىلاندى.
كوميسسيا مۇشەلەرى قازاقستانداعى بالالار قۇقىقتارى مەن بالالىقتى قورعاۋ ماسەلەلەرىنە ەرەكشە كوڭىل ءبولدى. بۇگىنگى تاڭدا رەسپۋبليكادا تۋعاننان باستاپ كامەلەتكە جاسقا جەتكەنگە دەيىنگى 5 ميلليوننان استام بالا تۇرادى. ونىڭ ىشىندە 141 مىڭنان استامى – مۇمكىندىگى شەكتەۋلى بالالار, 9 مىڭنان استامى – ينتەرناتتىق مەكەمەلەردە تاربيەلەنىپ جاتقان جەتىم بالالار مەن اتا-انانىڭ قامقورلىعىنسىز قالعان بالالار.
بالا قۇقىقتارىن قورعاۋ ماسەلەلەرىن شەشۋدە مەملەكەتتىك باسقارۋ ورگاندارىنىڭ, قوعامدىق بىرلەستىكتەر مەن حالىقارالىق جانە وزگە دە ۇيىمدار وكىلدەرىنىڭ ىنتىماقتاستىعى مەن كۇش بىرىكتىرۋى ەلەۋلى ءرول اتقاراتىنى اتاپ ءوتىلدى.
ءسوز سويلەگەندەر بالا قۇقىقتارىن قورعاۋ سالاسىندا وزەكتى ماسەلەلەردىڭ بار ەكەنىنە نازار اۋدارىپ, ونى شەشۋدە مەملەكەتتىك ورگاندار مەن ۇەۇ-لاردىڭ بىرىگىپ اتسالىسقاندارى ءجون دەپ ۇسىنىس ايتتى.
بۇل وتباسىلىق ساتسىزدىكتىڭ پروفيلاكتيكاسى, وتباسىلىق قۇندىلىقتاردى نىعايتۋ, بالالاردى ادامگەرشىلىك-رۋحاني تاربيەلەۋ, ينكليۋزيۆتى ءبىلىم بەرۋدى دامىتۋ, كامەلەتتىك جاسقا تولماعاندارعا قاتىستى قاتىگەزدىك قارىم-قاتىناستىڭ جانە زورلىق-زومبىلىقتىڭ الدىن الۋ پروفيلاكتيكاسى.
كوميسسيانىڭ وتىرىسىندا ازىرلەنگەن ۇسىنىمدار مەملەكەت باسشىسىنىڭ, قازاقستان رەسپۋبليكاسى پارلامەنتى مەن ۇكىمەتىنىڭ نازارىنا جەتكىزىلەتىن بولادى.
«ەگەمەن-اقپارات».