تارازدا كەڭەس بەرۋ ورتالىعى اشىلدى

وبلىس اكىمدىگى دەنساۋلىق ساقتاۋ باسقارماسىنىڭ باسشىسى سەرجان نازاربەكتىڭ ايتۋىنشا, جاڭا بولىمشە زاماناۋي مەديتسينالىق قۇرالدارمەن تولىققاندى جابدىقتالعان. مۇندا بىلىكتى ماماندار قىزمەت كورسەتەدى.

مۇندا ايەلدەرگە ءومىرىنىڭ بارلىق كەزەڭدەرىندە, سونىڭ ىشىندە جۇكتىلىككە دايىندىق, جۇكتىلىك بارىسى جانە بوسانعاننان كەيىنگى كەزەڭدە ساپالى ءارى قولجەتىمدى مەديتسينالىق قىزمەت كورسەتىلەدى. جاڭا بولىمشە ايەلدەر كونسۋلتاتسياسى العاشقى مەديتسينالىق-سانيتاريالىق كومەكتى جاڭعىرتۋ باعدارلاماسى اياسىندا اشىلدى.

بولىمشەدە اكۋشەر-گينەكولوگتار, ۋلترادىبىستىق زەرتتەۋ (ۋدز) ماماندارى, وتباسىن جوسپارلاۋ جونىندەگى كەڭەسشىلەر قىزمەت اتقارادى. سونىمەن قاتار, بولاشاق انالارعا ارنالعان ارنايى مەكتەپ, پسيحولوگيالىق جانە زاڭگەرلىك كومەك تە قاراستىرىلعان.

قازاقستان رەسپۋبليكاسىنىڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە سايكەس, باعدارلاما اياسىندا ايەلدەرگە كورسەتىلەتىن امبۋلاتوريالىق-ەمحانالىق دەڭگەيدەگى قىزمەتتەر جەتىلدىرىلىپ, ولاردىڭ قولجەتىمدىلىگى مەن ساپاسىن ارتتىرۋعا باسىمدىق بەرىلگەن. باعدارلامانىڭ نەگىزگى باعىتتارى: جۇكتىلىك كەزىندەگى اسقىنۋلاردى ەرتە انىقتاۋ, پرەناتالدىق سكرينينگ پەن گەنەتيكالىق زەرتتەۋلەر جۇرگىزۋ, پسيحوپروفيلاكتيكا, قاشىقتان كەڭەس بەرۋ جانە پاتروناج ۇيىمداستىرۋ. قيىن ومىرلىك جاعدايعا تاپ بولعان ايەلدەرگە پسيحولوگيالىق جانە الەۋمەتتىك قولداۋ كورسەتۋ دە قاراستىرىلعان.

سونداي-اق, رەپرودۋكتيۆتى دەنساۋلىقتى ساقتاۋ, تۇسىك جاساتۋدىڭ الدىن الۋ, باسقا مەديتسينالىق مەكەمەلەرمەن تىعىز بايلانىستا جۇمىس ىستەۋ جانە انا مەن بالا ءولىمىن ازايتۋ ماقساتىندا ناقتى شارالار جۇزەگە اسىرىلۋدا.

«بۇل ورتالىقتىڭ اشىلۋى – ايەلدەردىڭ دەنساۋلىعىنا دەگەن قامقورلىقتىڭ ناقتى كورىنىسى. بولاشاق انالارعا كورسەتىلەتىن مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ ارقىلى ءبىز ۇلت ساۋلىعىنىڭ نەگىزىن قالىپتاستىرامىز»,- دەيدى باسقارما باسشىسى.

تاراز