«بال ۇستاعان بارماعىن جالايدى» دەگەن ءومىردىڭ وزىنەن الىنعان ءتامسىل بار. بۇگىندە شىعىس قازاقستان برەندتەرىنىڭ بىرىنە اينالعان بال ونىمدەرى وڭىردەگى مەكتەپ وقۋشىلارىنىڭ اس مازىرىنە كەڭىنەن ەندى. سونداي-اق, رەسپۋبليكا كولەمىندە ءسۇت وندىرۋدەن دە العاشقى ورىندا تۇرعان وبلىس وقۋشىلارىنا بالمەن بىرگە ءسۇت بەرىلىپ كەلەدى.
ەلباسى نۇرسۇلتان نازارباەۆ ۇكىمەتتىڭ كەڭەيتىلگەن وتىرىسىندا وتاندىق ونىمدەردى قولداۋ ماقساتىندا «قازاقستاندا جاسالعان» اكتسياسىن وتكىزۋ ءجونىندە ايتقان بولاتىن. وسىعان وراي وسكەمەن قالاسىنىڭ اكىمى تەمىربەك قاسىمجانوۆ وبلىس ورتالىعىنداعى باستاۋىش سىنىپ وقۋشىلارىنا تەگىن بەرىلەتىن ءسۇت پەن بالدىڭ تەك وتاندىق ءونىم بولۋى قاتاڭ قاداعالانىپ وتىرعانىن جەتكىزدى. بۇل رەتتە تاياۋدا وسكەمەن قالاسىنىڭ اكىمدىگى مەن وڭىردەگى ءىرى ءسۇت وندىرۋشىلەر ساناتىنداعى «شىعىس-ءسۇت» جشس, «ەميل» جشس جانە بال ونىمدەرىن وندىرەتىن «پاسەكا» شارۋا قوجالىعى ءوزارا ارىپتەستىكتى دامىتۋ تۋرالى مەموراندۋمعا قول قويدى. قالا اكىمدىگىمەن بەكىتكەن مەموراندۋم اياسىندا اتالعان كاسىپورىندار مەكتەپتەرگە ءسۇت پەن بالدى ارزان باعامەن جەتكىزىپ بەرۋدە.
بۇگىندە وبلىس ورتالىعىندا 43 جالپى ءبىلىم بەرۋ مەكتەبى بار. ونىڭ بارلىعى دەرلىك, ياعني 42 مەكتەپتە وقۋشىلاردى ىستىق تاماقپەن قامتاماسىز ەتۋ ۇيىمداستىرىلعان. الەۋمەتتىك تۇرعىدان ءالجۋاز وتباسىلارىنىڭ بالالارى تولىقتاي بيۋدجەت ەسەبىنەن ىستىق تاماقپەن قامتاماسىز ەتىلدى. اتالعان ساناتتا 4 مىڭنان استام وقۋشى بار. قازىرگى كەزدە بارشا باستاۋىش سىنىپ وقۋشىلارىنا اپتاسىنا ءۇش رەت ءسۇت جانە كۇندەلىكتى بال بەرىلۋدە.
ءار وقۋشىعا 10 گرامدىق بليستەرلى قاپتاماعا قۇيىلعان بال مەن 200 گرامدىق ىدىسقا قۇيىلعان ءسۇت بەرىلەدى. بۇل رەتتە كاسىپورىندار وقۋشىلارعا بەرۋگە ىڭعايلى بولۋى ءۇشىن شاعىن ىدىستاعى ءسۇت ونىمدەرىن شىعارا باستادى. قازىر مۇنداي ونىمدەردى قالانىڭ ساۋدا نۇكتەلەرىنەن دە ساتىپ الۋعا بولادى. سۇيكىمدى قاپتاماداعى ءسۇت بالالاردى قىزىقتىراتىنى راس.
– مەن جازدا قالا ىرگەسىندەگى ساياجايعا اتاممەن بىرگە بارىپ, ومارتادان بالدى قالاي الاتىنىن كورگەنمىن. قازىر بىزگە سونداي ءتاتتى بالدى ادەمى ىدىستارعا قۇيىپ بەرەدى, – دەيدى وسكەمەندىك وقۋشى اسقار نۇرتازا ۇلى.
دۋمان اناش,
«ەگەمەن قازاقستان».
وسكەمەن.