جۇرت ماقتاعان جاننا

وسى كورمەگە «دسك پريوريتەت» كومپانياسى دا ءوز ونىمدەرىن قويعان ەكەن. ساعاتىنا 235 تونناعا دەيىن جوعارى ساپالى اسفالت-بەتون ءونىمىن شىعاراتىن زاماناۋي قوس اسفالت-بەتون زاۋىتى بار كومپانيانى ءناپ-نازىك قازاق قىزى باسقاراتىنىن بىلەسىز بە؟ ۇيىمنىڭ قۇزىرىندا ELKOMIX 60 بەتون زاۋىتى, توپىراق ارالاستىرعىش جانە بيتۋم-ەمۋلسيالىق قوندىرعىسى جانە بار! قازىرگى تاڭدا كومپانيادا 300-گە جۋىق قىزمەتكەر جۇمىس ىستەيدى. ولار بارلىق جاعدايى جاسالعان جۇمىسشى قالاشىقتارىندا تۇرادى. ء«بىز زاماناۋي ستاندارتتارعا ساي قاۋىپسىز جانە ۇيىمداسقان ەڭبەك ورتاسىن قۇرامىز, سونداي-اق قىزمەتكەرلەردى وقىتۋ مەن كاسىبي دامۋعا ەرەكشە ءمان بەرەمىز» دەيدى جاننا كەنجينا.

جاننا تاجىعۇلقىزى قازىنالى قاراشىعاناعىمەن الەمگە ايگىلى ءبورلى اۋدانىنىڭ ورتالىعى اقساي قالاسىندا تۋىپ-وسكەن. اتا-اناسى دا قاراپايىم جۇمىسشى بولاتىن. ەڭبەك جولىن تەمىرجول ستانساسىندا پويىز ديسپەتچەرى بولىپ باستاعان جاننانى ەس بىلگەلى ەڭبەكپەن شىڭدالعان جان دەسە بولادى. ول 2004 جىلدان بەرى ءوز كاسىبىن دامىتىپ, 2008 جىلى «دسك پريوريتەت» اتتى جشس قۇردى.

- جۇمىسىن جاڭا باستاعان مەكەمە سەنىمگە يە بولىپ, تولىققاندى تاپسىرىس الۋ ءۇشىن ءبىراز ۋاقىت كەرەك. ءبىز دە العاشقى كەزدە ءتۇرلى مەكەمە اۋلاسىنداعى ىشكى جولداردى جاساپ جۇردىك. كەيىن سامال شاعىناۋدانىنا بارار جولدى جانە اسان اۋىلى مەن جۇلدىز شاعىناۋدانىنا دەيىنگى تاۋەلسىزدىك كوشەسىن توسەپ شىقتىق. بىلەسىز بە, سول كوشەلەر ماعان ءالى كۇنگە ىستىق! ۇلكەن جاۋاپكەرشىلىكپەن, ماحابباتپەن سالعاندىقتان بولار, ءبىر قابات قانا اسفالت توسەلگەن سول كوشەلەرگە ءالى ەشقانداي سىزات تۇسكەن جوق. 2011 جىلى ورال قالاسىنىڭ كوپ بولىگىن سۋ باسقاندا قازىلىپ قالعان بولىكتەرى بولماسا, كەرەمەت ساقتالدى, - دەيدى كومپانيا باسشىسى.

سودان بەرى قيىندىعى مول, سىناعى كوپ جيىرما جىلعا جۋىق ۋاقىت ءوتىپتى. «دسك پريوريتەت» باتىس قازاقستان وبلىسىندا جول سالاتىن ءىرى كومپانيالاردىڭ بىرىنە اينالدى. بۇگىنگە دەيىن كومپانيا جالپى ۇزىندىعى 1000 شاقىرىمنان استام رەسپۋبليكالىق, وبلىستىق جانە اۋىلدىق ماڭىزى بار اۆتوكولىك جولدارىن كۇردەلى جوندەپ, سالىپ شىققان. وڭىردەگى ينفراقۇرىلىمدى دامىتۋعا باعىتتالعان مەملەكەتتىك باعدارلامالاردى ىسكە اسىرۋعا, سونداي-اق رەسپۋبليكالىق, وبلىستىق جانە قالاىشىلىك ماڭىزى بار اۆتوكولىك جولدارىن سالۋ جانە جوندەۋ جۇمىستارىنا بەلسەنە قاتىساتىن كومپانيا كاسىبي بىلىكتىلىگىنىڭ ارقاسىندا جول قۇرىلىسى سالاسىندا تۇراقتى ءارى جاۋاپتى مەردىگەر رەتىندە تانىلدى.

جاننا تاجىعۇلقىزىنىڭ كومپانياسى جولدار مەن اۆتوماگيسترالدەردى سالىپ قانا قويماي, جول-قۇرىلىس ماتەريالدارىن وندىرەتىنىن جوعارىدا ايتتىق. ودان بولەك, جول قۇرىلىسى سالاسىندا زەرتحانالىق سىناقتار جۇرگىزۋ, ارنايى جول-قۇرىلىس تەحنيكاسىمەن قامتاماسىز ەتۋ سەكىلدى قىزمەتتەردى دە قوسا الىپ جۇرگەن ۇلكەن ۇجىمنىڭ ترانسپورت پاركىندە قازىر جول قۇرىلىسى جۇمىستارىنا ارنالعان 100-دەن استام ارنايى تەحنيكا بار ەكەن. ولاردىڭ قاتارىنا اسفالت توسەگىشتەر, فرەزەرلىك ماشينالار, جول تاپتاعىشتار, اۆتوگرەيدەرلەر, ساموسۆالدار, تيەگىشتەر, ەكسكاۆاتورلار, بۋلدوزەرلەر جانە باسقا دا تەحنيكالار كىرەدى. ۇيىم وندىرىستىك قاجەتتىلىكتەرگە سايكەس تەحنيكالىق پاركتى جىل سايىن جاڭارتىپ, تولىقتىرىپ وتىرادى.

كومپانيا وسى كەزگە دەيىن «قازاۆتوجول» ۇلتتىق كومپانياسىنىڭ, «Karachaganak Petroleum Operating B.V.» اليانسىنىڭ, باتىس قازاقستان وبلىسى جولاۋشىلار كولىگى جانە اۆتوموبيل جولدارى باسقارماسىنىڭ, ورال قالاسى, بايتەرەك, ءبورلى, تەرەكتى جانە تاسقالا اۋداندارى تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى بولىمدەرىنىڭ تاپسىرىسىن ورىنداپ, رەسپۋبليكالىق ماڭىزى بار «پودستەپنوە-فەدوروۆكا-رف شەكاراسى اۆتوموبيل جولىنىڭ ءبىراز بولىگىن قايتا جاڭعىرتتى. وبلىستىق ماڭىزى بار تاسقالا-اققۋراي-بولاشاق-رف شەكاراسى, اقساي-شىڭعىرلاۋ, تەرەكتى-اقساي اۆتوكولىك جولدارى ورتاشا جانە كۇردەلى جوندەۋدەن ءوتتى. ورال قالاسىندا, زاشاعان, دەركول, كرۋگلووزەرنوە كەنتتەرىندە كوشەلەر قايتا جاڭعىرتىلىپ, كۇردەلى جانە ورتاشا جوندەۋ جۇمىستارى جاسالدى. بايتەرەك اۋدانىنىڭ اۋىلدارىنا, سونداي-اق ءبورلى, تەرەكتى جانە تاسقالا اۋداندارىنىڭ ەلدى مەكەندەرىنە كىرەبەرىس جولدارى سالىندى.

- قازىر ءبىز تەرەكتى-اقساي اۆتوجولىنىڭ 51,7-73 شاقىرىمىنا كۇردەلى جوندەۋ جۇرگىزىپ جاتىرمىز. جوندەلۋى ءتيىس 21,3 شاقىرىم جولدىڭ 10 شاقىرىمىندا جۇمىس تولىق جاسالدى. سونىمەن قاتار رەسپۋبليكالىق ماڭىزى بار پودستەپنوە-فەدوروۆكا-رەسەي شەكاراسى اۆتوجولىنىڭ 72-108 شاقىرىمىندا بيىل باستالعان قايتا جاڭعىرتۋ جۇمىسى بەلسەندى ءجۇرىپ جاتىر. جولدىڭ 12 شاقىرىمىندا جەردىڭ تومەنگى قاباتىنداعى, 10 شاقىرىمىندا قوسىمشا قاباتتاعى جۇمىستار جاسالدى. شىڭعىرلاۋ وزەنى ارقىلى وتەتىن كوپىردىڭ قۇرىلىسى دا قىزۋ ءجۇرىپ جاتىر. ال پودستەپنوە-فەدوروۆكا-رەسەي شەكاراسى رەسپۋبليكالىق ماڭىزى بار اۆۆتوجولدىڭ 108-144 شاقىرىمىندا جول قۇرىلىسى تولىق اياقتالدى, قازىرگى تاڭدا ايالدامالار قويىپ, جول جيەگىن اباتتاندىرىپ جاتىرمىز, - دەيدى جاننا تاجىعۇلقىزى.

«نەگىزىنەن ەر ازاماتتار قىزمەت ەتەتىن ۇلكەن كومپانيانى باسقارۋ ايەل ادامعا قيىن ەمەس پە ەكەن؟» - وسىنداي وي وقىرمانعا دا كەلەتىن شىعار. ء«وزىمدى بۇل سالاسىز ەلەستەتە المايمىن. جاسىراتىنى جوق, قيىن. بىراق ۇجىمدى ايەل ادام باسقارعاننىڭ ارتىقشىلىعى دا بار. مەن ءار قىزمەتكەردىڭ ىشكى دۇنيەسىنە ۇڭىلۋگە تىرىسامىن. جۇمىسقا قۇلشىنىسىن, قابىلەتىن بايقاپ جۇرەمىن. قالادا جانە دالادا جول سالۋ – ەكى ءتۇرلى. وعان قىزمەتكەردى دە لايىقتى تاڭداي ءبىلۋ كەرەك. ۇجىمدا كوبى ەر ادام بولعاسىن مەنى قۇرمەتتەپ, ارقاشان قولداپ جۇرەدى» دەيدى قايسار قىز.

تاقتايداي تەگىس جول – باتىسقازاقستاندىقتاردىڭ باعزىدان كەلە جاتقان باس اۋرۋى. ويتكەنى وڭىردەگى رەسپۋبليكالىق ماڭىزى بار 1349 شاقىرىم جولدىڭ – 17%-ى, جەرگىلىكتى ماڭىزى بار 4834 كم اۆتوجولدىڭ – 44%-ى قالىپقا ساي كەلمەيدى. كەيدە مەملەكەتتىڭ ميللياردتاعان تەڭگەسى جۇمسالىپ جوندەلگەن جولدىڭ ساپاسى دا سىن كوتەرمەي جاتادى.

«اقساي قالاسىنا ايىنا ەكى رەت باراتىن ادام رەتىندە ايتايىن, 31 ملرد تەڭگە قاراجاتقا كازكومسەرۆيس سالعان جول مەن 15 ملرد تەڭگەگە دسك پريوريتەت سالعان جولدىڭ ايىرماسى جەر مەن كوكتەي» دەپ جازدى جاقىندا الەۋمەتتىك جەلىگە ورال قالالىق ءماسليحاتىنىڭ دەپۋتاتى ەرلان جۇماتاەۆ. جاننا تاجىعۇلقىزى باسقاراتىن كومپانيانىڭ اتىنا جەلىدە ايتىلعان وسىنداي جىلى پىكىر وتە كوپ. كومپانيا باسشىسى كوپشىلىك سىنىنا سەرگەك قارايدى, ۇنەمى ىقىلاسپەن جاۋاپ بەرىپ وتىرادى. ەكى ۇلدىڭ اناسى, شاڭىراقتىڭ ۇيىتقىسى بولىپ وتىرعان جاننىڭ تاۋسىلماس ىشكى قۋاتى تاڭعالدىرادى. ول قازاقستان ىسكەر ايەلدەر قاۋىمداستىعىنىڭ بەلسەندى مۇشەسى. 2018 جىلدان بەرى بۇرىنعى Nur Otan, قازىرگى Amanat پارتياسىنىڭ قاتارىندا. VII شاقىرىلعان ورال قالالىق ءماسليحاتىنىڭ دەپۋتاتى. قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا جاننا كەنجينا «ەرەن ەڭبەگى ءۇشىن» مەدالىمەن ماراپاتتالدى.

وعان قوسا وبلىس كولەمىندە قايىرىمدىلىق قىزمەتىنىڭ دامۋىنا ەرەكشە ۇلەس قوسقانى ءۇشىن جاننا تاجىعۇلقىزى «جومارت جۇرەك» سىيلىعىنا يە بولدى. ويتكەنى «دسك پريوريتەت» كومپانياسى ءبىلىم, مادەنيەت, سپورت جانە اباتتاندىرۋ سالالارىندا تۇراقتى قولداۋ كورسەتەدى. تەك 2024-2025 جىلدارى عانا كومپانيا قايىرىمدىلىق جانە الەۋمەتتىك جوبالارعا 50 ميلليون تەڭگەدەن استام قارجى بولگەن ەكەن.

«قۇرىلىسشى – ەڭ بەيبىت ماماندىق» دەگەن ءسوز بار حالىقتا. ونىڭ ۇستىنە قۇرىلىسشى – انا بولسا, نازىك جاندى ايەل بولسا, بۇل كاسىپتىڭ قادىرى بيىكتەي تۇسەتىن سياقتى. ادەتتە ايەل جانى – ادەمىلىككە جاقىن, ۇيلەسىمدى قالايدى, ماحاببات-مەيىرىمگە مول بولادى. جاننا تاجىعۇلقىزىنىڭ ۇنەمى ەلدىڭ شارۋاسىندا جۇرەتىنى, تىنىم تاپپايتىنى, سونىڭ ىشىندە قۇرىلىس سالاسىنداعى ءتۇرلى تۇيتكىلدى تالماي ايتىپ, ماسەلە كوتەرەتىنى – تۋا ءبىتتى مىنەزىنەن. باتىس قازاقستان وبلىسىنىڭ, ورال قالاسىنىڭ قوعامدىق-ساياسي, الەۋمەتتىك-ەكونوميكالىق تىنىس-تىرشىلىگىندە ءبىزدىڭ كەيىپكەرىمىزدىڭ قولتاڭباسى سايراپ جاتىر.

باتىس قازاقستان وبلىسى