قازاقستاندا قۇرىلىس سالاسى قارىشتى دامىپ كەلەدى. بۇل ءسوزىمىزدى ساندىق دەرەكتەر دە سەنىمدى ەتە تۇسەدى. ۇلتتىق ساتاتيستيكا بيۋروسىنىڭ مالىمەتىنشە, ەلىمىزدەگى جالپى ىشكى ءونىم كولەمىنىڭ 6 پايىزىن وسى قۇرىلىس سالاسى قامتىپ وتىر. سالانىڭ سەرپىن الۋى حالىق سانى مەن سۇرانىسىنىڭ وسۋىمەن دە بايلانىسىپ جاتىر. سەبەبى كەيىنگى جىلدارى تۇرعىن ءۇي قۇرىلىسى قارقىن الىپ, 2024 جىلى 19,1 ملن شارشى مەتر باسپانا پايدالانۋعا بەرىلىپ, تاۋەلسىزدىك جىلدارىنداعى رەكوردتىق بەلەستى باعىندىرعان. قۇرىلىس سالاسىنىڭ ءوزى ون ساۋساقتاي تارماقتالىپ جاتىر. تەحنيك, ينجەنەر, جوبالاۋشى, تاس قالاۋشى, مونتاجداۋشى, دانەكەرلەۋشى, جەلدەتۋ جۇيەسىنىڭ ماماندارى, سانتەحنيك, ءارتۇرلى جۇمىستى اتقاراتىن ادام دەپ تولاسسىز ءتىزىمدى جالعاي بەرۋگە بولادى. ءبىز بۇگىن «عيمارات تىنىسىن اشاتىن», جەلدەتۋ جۇيەسىن جەتىك مەڭگەرگەن مايتالمان مامان الەكسەي نيكيشين جانە ونىڭ ۇلى كيريلل الەكسيەۆيچ جۇمىسى تۋرالى باياندايمىز, دەپ جازادى Egemen.kz.
بۇگىندە عيماراتتاردى جەلدەتۋ, كونديتسيونەرلەۋ جۇيەسى قۇرىلىستىڭ ماڭىزدى بولشەگىنە اينالعان. بۇل جۇيە عيمارات ىشىندەگى اۋانى تازارتىپ, قاجەتتى مولشەردە جاڭا اۋامەن ورىن تولتىرادى ءارى ىلعالدى رەتتەيدى. «BAZIS-ا» كومپانياسىنىڭ جەلدەتۋ ۋچاسكەسىنىڭ باستىعى الەكسەي نيكيشين زاماناۋي كەڭسە, تۇرعىن ءۇي جانە ءوندىرىس ورىندارىندا, كونديتسيونەرلەۋ جۇيەسى جايلىلىق پەن قاۋىپسىزدىكتىڭ نەگىزگى كەپىلى ەكەنىن اتاپ ءوتتى. ءومىرىنىڭ 25 جىلىن جەلدەتۋ جانە كونديتسيونەرلەۋ جۇيەلەرىنە ارناپ كەلە جاتقان مامان تاڭداعان كاسىبي باعىتىنا ءبىر ءسات تە كۇمان كەلتىرمەگەن.
ء«بىزدىڭ وتباسىمىزدا جۇمىسشى ماماندارعا قۇرمەت ەجەلدەن ەرەكشە. سەبەبى انام – قۇرىلىسشى, اكەم – جۇرگىزۋشى بولىپ تەر توكتى. ەڭبەك قادىرىن جاستايىمىزدان ۇعىپ وستىك. اكە-شەشەم جۇمىستان شارشاپ كەلسە دە, شاڭىراققا ك ۇلىپ ەنەتىن. وسى ادەمى ادەت مەنىڭ بويىما ءسىڭىرىلدى. سوندىقتان جەلدەتۋ سالاسىندا ەڭبەك ەتە ءجۇرىپ, مۇنداي قىزمەتتى ءبىز اتقارماساق, كىم ەڭسەرەدى دەپ ويلايمىن», دەيدى الەكسەي اناتولەۆيچ.
كەيىپكەرىمىزدىڭ ايتۋىنشا, جۇمىستىڭ ەڭ كۇردەلى بولىگى – باستاپقى كەزەڭ, ياعني جوبا كەلگەن ءسات. سول كەزدە قۇجاتتاردى مۇقيات زەرتتەپ, قانداي جۇمىستار اتقارىلاتىنىن, قانداي جابدىق قاجەت بولاتىنىن انىقتايدى.
ء«بىز جوبالىق قۇجاتتامامەن ەگجەي-تەگجەيلى تانىسامىز. جوبالاۋ ينستيتۋتىمەن ىقتيمال كەدەرگىلەردى تالقىلايمىز, قاجەت بولسا وزگەرىستەر ەنگىزەمىز. تەك سودان كەيىن عانا مونتاجعا كىرىسەمىز. مەن قازىرگى كومانداممەن 20 جىلدان اسا بىرگە جۇمىس ىستەپ كەلە جاتىرمىن. ەگەر جەلدەتۋ ارنالارى دۇرىس توسەلمەسە, جۇيە مۇلدە جۇمىس ىستەمەيدى. بۇل, اسىرەسە ادامدار مەن تەحنيكا كوپ شوعىرلانعان كاسىپورىندار ءۇشىن اسا قاۋىپتى. ويتكەنى ساپالى جەلدەتۋ – ومىرلىك ماڭىزى بار تالاپ. جازدا – ىستىق, قىستا – سۋىق بولىپ, قاجەتتى مولشەردە تازا اۋا كەلمەسە ەڭبەك ونىمدىلىگى تومەندەپ قانا قويماي ادام دەنساۋلىعىنا زارار كەلتىرۋى مۇمكىن. سوندىقتان زاماناۋي عيماراتتارداعى جەلدەتۋ جۇيەسى – جاي قوسىمشا ەمەس, جايلى ءارى قاۋىپسىز ورتا ءۇشىن مىندەتتى شارت», دەيدى الەكسەي نيكيشين.
ال بۇگىندە اكە ءىزىن باسقان كيريللدىڭ نەگىزگى مەڭگەرگەن ماماندىعى – باعدارلاماشى. ونىڭ سالاعا اياق باسۋى قىزىق وقيعامەن استاسىپ جاتىر. بىردە ول اكەسىنە قولعابىس جاساۋ ءۇشىن قۇرىلىس نىسانىنا بارىپ, ءبىرجولاتا سول سالادا قالۋدى شەشكەن. وسىلايشا كيريلل كونديتسيونەرلەۋ جۇيەسى سالاسىندا 10 جىلدان بەرى قىزمەت ەتىپ ءجۇر.
«باعدارلاماشى جۇمىسىن كومپيۋتەر الدىندا تاپجىلماي وتىرىپ اتقارادى. ال جەلدەتۋ جۇيەسىن بەلسەندى قيمىلداپ ورناتاسىڭ. ادامدارمەن تىعىز قارىم-قاتىناس قۇراسىڭ. ماعان قازىرگى ماماندىعىمنىڭ وسى تۇسى قولايلى بولدى. مەن جۇمىسىمدى اۋىستىرۋ نيەتىمدى اكەمە ايتقاندا بىردەن قولداۋ تانىتتى. سول ساتتەن اكەم بىلگەنىمەن ءبولىسىپ, ءاردايىم كومەك كورسەتەدى. بۇل قولداۋ وتباسىمدا دا, جۇمىستا دا ماڭىزدى», دەيدى كيريلل الەكسيەۆيچ.
الەكسەي نيكيشين ەندى شاكىرت تاربيەلەۋگە دەن قويعان. ول ءۇشىن ماڭىزدىسى تاجىريبەسىمەن ءبولىسىپ, سالا كوكجيەگىن كەڭەيتۋ.