استانا. 17 اقپان. نورۆەگيالىق عالىمدار وزدەرىنىڭ اتا-بابالارى بۇدان مىڭ جىل بۇرىن قازاقستان اۋماعىندا تۇرعان دەپ ەسەپتەيدى. بۇل تۋرالى Almaty.tv ءتىلشىسى حابارلادى.
وسى تاقىرىپتى تەرەڭىرەك زەرتتەۋ ءۇشىن نورۆەگيانىڭ ءبىر توپ عالىمدارى قازاقستانعا كەلدى. ولار ەكى جاقتى بىرلەسكەن جاڭا «قورعان دنك» اتتى جوبا اياسىندا جۇمىس جاسايتىن بولادى. تەلەارنا مۇنى سىرتقى ىستەر مينيسترلىگىنىڭ دەرەگىنە سىلتەمە جاساي وتىرىپ جەتكىزدى.
ءىسساپار كەزىندە نورۆەگيالىق دەلەگاتسيا مادەنيەت جانە سپورت ءمينيسترى ارىستانبەك مۇحامەدي ۇلىنىڭ قابىلداۋىندا بولىپ, قوستاناي, پاۆلودار جانە قاراعاندى مەملەكەتتىك ۋنيۆەرسيتەتتەرىنىڭ وكىلدەرىمەن كەزدەسۋ وتكىزەدى.
«جوباعا قاتىسۋشىلار الدىندا ايتارلىقتاي مىندەت تۇر. ول - ءبىزدىڭ پروتوۇندىەۋروپالىق تامىرىمىزدىڭ ورتاقتىعىن دالەلدەۋ. عالىمدار قازاقستاندا قورعان-قورىمداردان دنك-ماتەريالدارىن جيناۋمەن اينالىساتىن بولادى. ولاردىڭ ناتيجەسىن الەمگە ايگىلى كوپەنگاگەن ۋنيۆەرسيتەتىنىڭ گەنەتيكالىق زەرتحاناسىندا تالدايدى», - دەلىنگەن حابارلامادا.
نورۆەگيالىق ماماندار بەلگىلى ساياحاتشى تۋر حەيەردالدىڭ «ۆيكينگتەردىڭ ارعى اتالارى كاسپيدەن تارادى» دەگەن بولجامىن دالەلدەمەكشى. دەلەگاتسيا قۇرامىندا قازاقستانعا كەلگەن ونىڭ قىزى بەتتينا حەيەردال: «بۇل مەنىڭ اكەمنىڭ سوڭعى ەكسپەديتسياسىنىڭ باستى مىندەتى بولدى. لينگۆيستيكالىق پاراللەلدەرگە سۇيەنە وتىرىپ, ۆيكينگتەردىڭ ارعى اتاسى ولاردىڭ قۇدايى رەتىندە سانالاتىن ءوديننىڭ وتانى وسى ايماقتا ەكەندىگىنە ول قاتتى سەندى» - دەيدى.
سونىمەن قاتار, نورۆەگيالىق تاريحشى ستۋرلا ەللينگۆاگ: «شامامەن مىڭ جىل بۇرىن ءبىزدىڭ ارعى اتالارىمىزدىڭ ورتالىق ازيا جانە وڭتۇستىك رەسەي ايماعىندا ءبىر وتانى بولدى. قازىرگى عىلىمنىڭ جەتىستىكتەرى ارقاسىندا ءبىز ءوزىمىزدىڭ ورتاق ءۇيىمىزدى اشۋعا وتە جاقىنبىز», - دەگەن تۇجىرىم جاسايدى.
جوباعا قاتىسۋشىلار قازاقستان جانە نورۆەگيا اراسىنداعى ۇزاق مەرزىمدى ىنتىماقتاستىق ءبىزدىڭ تاريحي اتا-بابالارىمىزدىڭ جانە قازىرگى ۇرپاقتاردىڭ ورتاقتىعىن دالەلدەۋگە مۇمكىندىك بەرەدى, دەگەن سەنىمدە.
مۇرات ايتقوجا.
دەرەك, فوتو: Almaty.tv.