7 تامىز كۇنى استانادا توعىزقۇمالاقتان ەلىمىزدىڭ چەمپيوندارى مەن جاساندى ينتەللەكت اراسىندا تۇڭعىش رەت تاريحي ويىن ءوتتى. ادام مەن الگوريتم اراسىنداعى بۇل زياتكەرلىك سايىس ۇلتتىق ءداستۇر مەن زاماناۋي تەحنولوگيانى ۇشتاستىرعان بىرەگەي جوبا رەتىندە ەستە قالدى, دەپ جازادى Egemen.kz.
«توعىزقۇمالاق چەمپيوندارى vs جي» اتتى ەرەكشە فورماتتاعى شارا EXPO كەشەنىنىڭ B2.2 بلوگىندا ورنالاسقان دەنەشىنىقتىرۋ جانە بۇقارالىق سپورت اكادەمياسىندا (APEMS) ۇيىمداستىرىلدى.
جاساندى ينتەللەكتكە قارسى ەل نامىسىن قورعاعان سپورتشىلار:
– ايانا يساحان – بەس دۇركىن قازاقستان چەمپيونى, وقۋشىلار اراسىنداعى تۇڭعىش الەم چەمپيونى, جاستار اراسىندا ازيا چەمپيونى, ايەلدەر اراسىنداعى ازيا جانە الەم چەمپيوناتتارىنىڭ جۇلدەگەرى, V دۇنيەجۇزىلىك كوشپەندىلەر ويىندارىنىڭ چەمپيونى; – اسىلحان قوجاناسىپ – حالىقارالىق دارەجەدەگى سپورت شەبەرى, الەم چەمپيونى, تۇڭعىش «قازاقستان زياتكەرى» اتاعىنىڭ يەگەرى, 2024 جىلعى «التىن تۇعىر» ۇلتتىق سىيلىعىنىڭ لاۋرەاتى, V دۇنيەجۇزىلىك كوشپەندىلەر ويىندارىنىڭ چەمپيونى.
ولاردىڭ قارسىلاسى – جاس ءارى دارىندى ازىرلەۋشى نۋرسكە ابىلاي تەحنيكالىق نەگىزىن قالاعان ينتەللەكتۋالدى كومپيۋتەرلىك باعدارلاما بولدى. جي-مەن ويىن – ادام مەن جاساندى ينتەللەكت اراسىنداعى وي جۇيەسىنىڭ ايقاسى رەتىندە كوپشىلىكتىڭ قىزىعۋشىلىعىن تۋدىردى.
ۇيىمداستىرۋشىلاردىڭ ايتۋىنشا, بۇل – زياتكەرلىك سپورتتى جاڭا دەڭگەيگە كوتەرۋگە, ۇلتتىق ويىندى تسيفرلىق فورماتتا تانىتۋعا باعىتتالعان تىڭ باستاما. سونىمەن قاتار, شارا ۇلتتىق مۇرانى قازىرگى زامانعا بەيىمدەپ, جاستار اراسىندا تانىمال ەتۋ ماقساتىن كوزدەيدى.
جارىس بارىسىندا قاتىسۋشىلار مەن كورەرمەندەر ءۇشىن ارنايى دەمونستراتسيالىق سەسسيالار, پىكىر الماسۋ جانە شەبەرلىك ساباقتارى ۇيىمداستىرىلدى. كوپشىلىككە اشىق فورماتتا وتكەن بۇل ءىس-شاراعا جاسوسپىرىمدەر مەن سپورت مەكتەبىنىڭ تاربيەلەنۋشىلەرى دە بەلسەندى قاتىستى.
- ءبىز بۇگىن توعىزقۇمالاق تاريحىنداعى ەرەكشە تاريحي ءساتتى باسىمىزدان كەشىرىپ تۇرمىز. تۇڭعىش رەت توعىزقۇمالاقتىڭ ۇزدىك ويىنشىلارى جاساندى ينتەللەكتپەن وينادى. بۇل ەرەكشە شارانى ءبىز ۇلى ابايدىڭ 180 جىلدىعىنا ارناپ وتىرمىز. مۇنىڭ دا ءوز زاڭدىلىعى بار. سەبەبى اباي ءوزى عانا ويناپ قانا قويماي, اينالاسىنا توعىزقۇمالاقشىلاردى جيناپ, مەكتەپ قالىپتاستارعان. توعىزقۇمالاق كەڭەس يدەولوگياسىنىڭ قىسىمىمەن جوعالا جازداعان تۇستا ونىڭ جاندانۋىنىڭ باسى-قاسىندا مۇحتار اۋەزوۆ بولدى. بۇل دا ءبىر ساباقتاستىق. عاسىرلار بويى توعىزقۇمالاق ۇزدىكتەردى انىقتاۋ عانا ەمەس, جاستاردى تاربيەلەۋ قۇرالى بولىپ كەلەدى,- دەدى دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ.
دۇنيەجۇزىلىك توعىزقۇمالاق فەدەراتسياسى, قر توعىزقۇمالاق فەدەراتسياسى قر تۋريزم جانە سپورت مينيسترلىگى قولداۋىمەن جاڭا تەحنولوگيالاردى توعىزقۇمالاقتىڭ دامۋىنا بەلسەندى پايدالانىپ كەلەدى. ارنايى موبيلدىك قوسىمشالاردى ايتپاعاندا, توعىزقۇمالاق اقش, كانادا جانە وزگە دامىعان ەلدەردىڭ اۋماعىندا ەڭ كوپ وينالاتىن ويىن رەتىندە ەرەكشەلەنەدى.