وڭىردەگى جەر قويناۋىن پايدالانۋشى كومپانيا وكىلدەرى اقتوبەدەگى ارناۋلى تەحنيكا شىعارۋعا ماماندانعان «Truck Center» كاسىپورنىنىڭ جۇمىسىمەن تانىستى. جىلىنا 300-دەن استام كولىك قۇراستىرىپ, ساتىلىمعا شىعارىپ وتىرعان كاسىپورىن ونىمدەرى يندۋستريالىق جانە ساپا سايكەستىگى سەرتيفيكاتتارىمەن راستالعان.
«مۇنداي كەزدەسۋدى ۇيىمداستىرۋداعى ماقسات – ءىرى كومپانيالاردىڭ ەلىمىزدە قۇراستىرىلعان كولىكتەردى ساتىپ الۋىنا مۇمكىندىك بەرۋ, وسى جولداعى تۇيتكىلدى ماسەلەلەردى ءبىر ۇستەل باسىندا تالقىلاۋ», دەيدى وبلىستىق كاسىپكەرلەر پالاتاسىنىڭ ينۆەستيتسيالىق جوبالاردى سۇيەمەلدەۋ ءبولىمىنىڭ باسشىسى نۇرلان قۇساەۆ.
كاسىپورىن 2018 جىلى قۇرىلدى. العاشقىدا سىرتتان ارناۋلى تەحنيكا تاسىسا, بىرتە-بىرتە الەمدەگى ءىرى اۆتوكولىك شىعاراتىن بىرنەشە زاۋىتتىڭ كولىك ساتۋ, سەرۆيستىك قىزمەت كورسەتۋ جانە قوسالقى بولشەكتەر جەتكىزۋمەن اينالىساتىن ديلەرىنە اينالدى. تاجىريبە جيناي كەلە, ءوندىرىستى دە جولعا قويدى. «جاسىراتىنى جوق, بىزدە ينجەنەر-تەحنيك ماماندار, كونسترۋكتورلار جەتىسپەيدى. كاسىپتىك-تەحنيكالىق كوللەدج ستۋدەنتتەرىن وقىتىپ-ۇيرەتۋگە شاقىرامىز», دەيدى «Truck center» جشس ديرەكتورى مايا رەزە.
كەيىنگى جىلدارى ەلىمىزدە جانعىش, تەز تۇتاناتىن قوسپالارى جوق سۇيىق قالدىقتاردى تاسىمالداۋعا ارنالعان ۆاكۋمدىق كولىكتەر, بىرنەشە قىزمەتتى قاتار اتقاراتىن كوممۋنالدىق تەحنيكا تۇرلەرى ۇلكەن سۇرانىسقا يە بولىپ ءجۇر. سوعان وراي مۇندا نەگىزىنەن, «كاماز» شاسسيىندەگى ارالاس جول كولىكتەرى, ۆاكۋمدىق اۆتوتەحنيكا, باللون تاسۋعا, قوقىس شىعارۋعا ارنالعان كولىكتەر قۇراستىرىلادى.
«جاقىندا اقتوبە قالاسىنىڭ تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمى بىزدەن بىرنەشە ۆاكۋمدىق اۆتوكولىك ساتىپ الدى. وندىرىستە تەحنيكالىق تاپسىرمالاردى ءۇش كونسترۋكتور ورىندايدى. كولىكتەردى تاپسىرىس بەرۋشىلەردىڭ قالاۋىمەن وزگەرتىپ تە بەرەمىز. ماسەلەن, قالاداعى كوممۋنالدىق سۋ شارۋاشىلىعى مەكەمەسى اپاتتىق-قۇتقارۋ جۇمىستارىنا ماماندارىن تاسيتىن كولىك توبەسىن جابدىقتارىن ورنالاستىراتىنداي ەتىپ وزگەرتۋگە تاپسىرىس بەردى. سونداي-اق ءبىر وبلىستىڭ توتەنشە جاعدايلار دەپارتامەنتىنىڭ رەيدتىك جۇمىستارعا ارنالعان 28 ورىندىق كولىگىن قۇراستىرىپ, ىشكى قابىرعاسى مەن بۇرىشتارىنىڭ بەرىكتىگىن كۇشەيتتىك. تاعى ءبىر ءوڭىردىڭ جول-كولىك باقىلاۋ باسقارماسىنا تيەسىلى «گازەل» كولىگىنە جىلجىمالى اۆتوماتتاندىرىلعان ولشەۋ كەشەنىن ورناتىپ جاتىرمىز. مۇنداي كولىكتەر اياز بەن بوراندا, كۇز بەن كوكتەمنىڭ لايساڭ, تايعاقتى كۇندەرىندە سىرتتاعى جولداردا باقىلاۋ جۇرگىزۋگە جايلى ءارى جابدىقتاردى ورنالاستىرۋعا قولايلى. كينولوگتەرگە ارنالعان تاعى ءبىر كولىكتى قايتا جابدىقتاپ جاتىرمىز», دەيدى «Truck Center» سەرىكتەستىگىنىڭ يەسى يۆان زاحاروۆ.
قازىر تاسجولداردا جۇرۋگە لايىقتالعان ءىرى كولىكتەرگە قاراعاندا شارۋاشىلىققا قولايلى شاعىن كولىكتەر سۇرانىسقا يە. ماسەلەن, اۋىل شارۋاشىلىعىندا جەر جىرتىپ, جۇك تاسىپ بىرنەشە قىزمەتتى قاتار اتقاراتىن, سوقاسى مەن تىركەمەسى بار, باعاسى قولجەتىمدى شاعىن تراكتورلار كوپتەپ قاجەت. جوعارىدا اتاپ وتكەنىمىزدەي, قوقىس جيناپ, كوشەنى سىپىرىپ-جۋىپ, بىرنەشە قىزمەتتى قاتار اتقاراتىن تەحنيكاعا دا سۇرانىس جوعارى. ورمان ورتتەرىنىڭ كوبەيۋىنە بايلانىستى ەندى تۇتانعان جالىن وشاعىنا جەدەل جەتەتىن ىڭعايلى كولىكتەرگە دە تاپسىرىس ءجيى بەرىلەدى. مىسالى, «پيكاپ» كولىگىنە 800 ليترگە دەيىن سۋ قۇيىلعان بوشكەلەر سىيادى جانە قۇرال-سايمانداردى الىپ جۇرۋگە بولادى. جوبالاپ-قۇراستىرۋشىلار ورمان شارۋاشىلىعى مەكەمەلەرى ءۇشىن پيكاپتاردىڭ ارتقى تىركەمەسىنە بيىكتەۋ ەتىپ قورشالعان جالپاق جۇك الاڭىن قۇراستىرىپ جاتىر.
كاسىپورىن تۇتىنۋشىلارىنا سەرۆيستىك قىزمەتتى دە ۇسىنادى. زاۋىتتىڭ جىلجىمالى-ءموبيلدى 14 كولىگى بارلىق وڭىرگە بارىپ, بۇزىلعان تەحنيكالاردى جوندەپ بەرىپ ءجۇر. جاقىندا زاۋىت اۋماعىندا قۇراستىرىلعان كولىكتەردى سىناقتان وتكىزەتىن لابوراتوريا اشىلماق.
اقتوبە وبلىسى