قازاقستان پرەزيدەنتى ەلىمىزگە جۇمىس ساپارىمەن كەلگەن بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا مەملەكەتتەر باسشىلارى ساۋدا-ەكونوميكا, ينۆەستيتسيا, ونەركاسىپ جانە اۋىل شارۋاشىلىعى سالالارىنداعى ىنتىماقتاستىقتى قامتيتىن قازاقستان-بەلارۋس قارىم-قاتىناسىنىڭ نەگىزگى ماسەلەلەرىن تالقىلادى.
سونداي-اق نۇرسۇلتان نازارباەۆ پەن الەكساندر لۋكاشەنكو حالىقارالىق كۇن تارتىبىندەگى وزەكتى جايتتار جونىندە پىكىر الماستى.
قازاقستان پرەزيدەنتى ەكىجاقتى ىنتىماقتاستىق اياسىندا ەلدەرىمىز قول جەتكىزگەن بارلىق ۋاعدالاستىقتار تابىستى ورىندالىپ جاتقانىن اتاپ ءوتتى. وسىعان بايلانىستى مەملەكەت باسشىسى ەكى ەلدىڭ كوپتەگەن بىرلەسكەن كاسىپورىندارى جۇمىس جۇرگىزىپ جاتقانىنا نازار اۋدارا كەلىپ, بۇل ءىستىڭ الداعى ۋاقىتتا دا جالعاساتىنىن ايتتى.
نۇرسۇلتان نازارباەۆ سونداي-اق بەلارۋس پرەزيدەنتىنىڭ ۋكراينا داعدارىسىن رەتتەۋ ىسىندەگى ۇلەسىنە توقتالىپ ءوتتى.
– ورىن الىپ وتىرعان تايتالاستىڭ ەشكىمگە پايدا بەرمەيتىنى جونىندەگى ءبىزدىڭ ۇستانىمدارىمىز تولىعىمەن ۇندەسەدى, – دەدى مەملەكەت باسشىسى.
قازاقستان پرەزيدەنتى ءۇش مەملەكەت باسشىسىنىڭ الداعى كەزدەسۋى ىنتىماقتاستىقتىڭ قازىرگى كەزدەگى وزەكتى جانە پەرسپەكتيۆالىق ماسەلەلەرىن تالقىلاۋعا مۇمكىندىك بەرەتىنىن ايتتى.
ا.لۋكاشەنكو ءوز كەزەگىندە ەكىجاقتى ساۋدا-ەكونوميكالىق ءوزارا ءىس-قيمىلدى بۇدان ءارى دامىتۋدىڭ ماڭىزدىلىعىن اتاپ ءوتتى.
بەلارۋس پرەزيدەنتى قازاقستانداعى الدا تۇرعان پرەزيدەنت سايلاۋىنىڭ جايىنا توقتالدى.
– قازاقستان حالقى سىزگە زور ءىلتيپاتپەن جانە ەرەكشە جىلىلىقپەن قارايتىنىن بىلەمىن. ءبىزدىڭ دە سىزگە دەگەن كوزقاراسىمىزدى ءبىلەسىز. ءبىز سىزگە تىلەكشىمىز جانە جەڭىس تىلەيمىز, – دەدى ا.لۋكاشەنكو.