باتىس قازاقستان وبلىسىنىڭ كوپتەگەن ەلدى مەكەندەرىنە “كوگىلدىر وتىن” جەتكىزدى
بۇگىنگى كۇنى بۇل جوبانىڭ باستاۋشىسى دا, تىكەلەي قولداۋشىسى دا وزگە ەمەس, تىكەلەي مەملەكەت باسشىسى نۇرسۇلتان نازارباەۆ بولعانىن ايتۋدىڭ ءوزى ءبىر مارتەبە. “قاراشىعاناق-ورال” گاز قۇبىرى قۇرىلىسى – تاپ-تازا الەۋمەتتىك جوبا. مۇنداي باعىتتاعى جوبالاردىڭ ەكونوميكالىق-قارجىلاي قايتارىمى, بەلگىلى ءبىر ۋاقىت وتكەننەن كەيىن تۇسىرەتىن پايداسى بولمايدى.
ەسەسىنە ونىڭ يگىلىگىن بارشا قازاقستاندىقتار, ەل مەن جۇرت, تۇرعىندار كورەدى. بۇل ەلدىڭ الەۋمەتتىك-تۇرمىستىق دەڭگەيىن جەڭىلدەتۋ, ءال-اۋقاتىن كوتەرۋ جولىندا جاسالاتىن قامقورلىق بولىپ تابىلادى. اتالعان جوبانى ەلباسى بۇدان بەس جىل بۇرىن اقجايىق وڭىرىنە ساپارى كەزىندە ۇسىنعان ەدى.
جوبانى جۇزەگە اسىرۋ مەرزىمى ەكى كەزەڭگە بەلگىلەنگەن بولاتىن. ونىڭ العاشقى كەزەڭىندە قاراشىعاناقتان ءبورلى اۋدانىنىڭ بىرقاتار ەلدى مەكەندەرى مەن تەرەكتى اۋدانىنىڭ ورتالىعىنا كوگىلدىر وتىن جەتكىزۋ بەلگىلەندى. بۇل مىندەت وتكەن جىلدىڭ اياعىندا ىسكە استى. وسىناۋ يگى شارانىڭ اشىلۋ راسىمىنە رەسپۋبليكا پرەمەر-ءمينيسترى كارىم ءماسىموۆ قاتىسقان-دى.
ال بۇگىندە ونىڭ ەكىنشى كەزەڭى دە مارەگە تاياپ “قاراشىعاناق-ورال” گاز قۇبىرى جوباسى شەڭبەرىندە كەشەگى كۇنى جايىق وزەنىنىڭ سول جاق بولىگىندە ورنالاسقان سىرىم جانە قاراتوبە اۋداندارى ورتالىقتارىنا گاز قۇبىرى تارتىلىپ, الاۋ جاعۋ ءراسىمى وتكىزىلدى.
بۇل – ۇزىندىعى 552 شاقىرىم كەشەندى گاز قۇبىرى مەن گاز ايداۋ ءجۇيەسى دەگەن ءسوز. وسى ارقىلى 146 ەلدى مەكەندەگى ءجۇز مىڭنان استام تۇرعىننىڭ كوگىلدىر وتىن يگىلىگى مەن قىزىعىن كورۋىنە جول اشىلىپ وتىر.
ەڭ باستىسى, “قاراشىعاناق-ورال” گاز قۇبىرى قۇرىلىسىن ىسكە قوسۋ ارقىلى اقجايىق وڭىرىندەگى بارلىق اۋدان ورتالىقتارىنا گاز قۇبىرى تارتىلدى. وسى جوبانىڭ سوڭعى, ءۇشىنشى ساتىسىندا ءار اۋدانداعى اۋىلدارعا كوگىلدىر وتىن جەتكىزۋ جۇمىستارى الداعى جىلدارى ودان ءارى جالعاسپاق. وسىناۋ دەرەك پەن جاعىمدى ءجايتتىڭ ءوزى ورال ءوڭىرىن تولىق گازداندىرۋ باعدارلاماسى مارەگە تاياپ كەلەدى دەۋگە تولىق نەگىز بەن العىشارت قالاي الادى.
وسى ارادا ءسال شەگىنىس جاساۋدىڭ دا رەتى كەلىپ تۇرعانداي. ايتايىن دەگەنىمىز, ءوڭىردى تولىق گازداندىرۋ باعدارلاماسى تاۋەلسىزدىكتىڭ العاشقى جىلدارىندا باستالعان ەدى. وسىناۋ قيىن كەزەڭنىڭ وزىندە شالعايداعى كازتالوۆ, جانىبەك جانە اقجايىق, تاسقالا, زەلەنوۆ اۋداندارىنا گاز قۇبىرى تارتىلىپ, تۇرعىندار وت جاعىپ, كۇل شىعارۋ ماشاقاتىنان قۇتىلدى. بۇل ىسكە سول كەزدەگى وبلىس باسشىسى, بۇگىنگى پارلامەنت دەپۋتاتى قابيبوللا جاقىپوۆ ۇلكەن ۇلەس قوستى.
اتالعان باعدارلامانى اياعىنا دەيىن جەتكىزۋ جۇمىستارى سوڭعى ءۇش جىلدا قىزۋ قارقىن الدى. اسىرەسە, جوعارىدا ايتىلعان قاراشىعاناق-ورال جوباسىن ىسكە اسىرۋعا قاتىستى ەلباسى تاپسىرماسىن ورىنداۋدا باتىس قازاقستان وبلىسىنىڭ ءبۇگىنگى اكىمى باقتىقوجا ىزمۇحامبەتوۆتىڭ ىسكەرلىك پەن تىندىرىمدىلىق ۇلگىسىن كورسەتە بىلگەنىنە ەل كۋا.
بۇل جونىندە شالعايداعى قاراتوبە اۋدانىندا وتكىزىلگەن الاۋ جاعۋ ءراسىمى كەزىندە وسى تەكتى توپىراقتىڭ بايىرعى تۇرعىنى, ەڭبەك ارداگەرى ءناجىم داۋلەتوۆ اقساقال بىلاي دەگەن ەدى:
– اۋىلىمىزدا كوگىلدىر وتىن الاۋى تۇتانعان بۇگىنگىدەي قۋانىشتى ساتتە مەنىڭ ويىما قازىرگى قازاق ادەبيەتىنىڭ اقساقالى ءازىلحان نۇرشايىقوۆتىڭ “ەگەمەندە” جاريالانعان ماقالاسىندا كەلتىرىلگەن “...ەلباسىن ماقتاۋدىڭ كەرەگى جوق, ونىڭ ءىسىن جاقتاي ءبىلۋ كەرەك” دەگەن ورنىقتى دا قيسىندى ءسوزى ورالىپ وتىر.
مىنە, ەلباسىنىڭ ءىسىن جاقتاي بىلەتىن وسىنداي وبلىس اكىمدەرىنىڭ ءبىرى باقتىقوجا ىزمۇحامبەتوۆ دەپ بىلەمىن. ول ءسوزى مەن ءىسىنىڭ اراسىندا الشاقتىق جوق باسشى. ونىڭ ەلباسى تاپسىرمالارىنا ءار كەز سەرگەك قاراپ, وڭىردە ەنەرگەتيكالىق تاۋەلسىزدىك, ازىق-ت ۇلىك قاۋىپسىزدىگى سەكىلدى ۇتىمدى ينۆەستيتسيالىق جانە الەۋمەتتىك جوبالاردى ىسكە اسىرۋعا بەل شەشە كىرىسىپ كەتەتىنى سۇيسىندىرەدى.
“قاراشىعاناق-ورال” گاز قۇبىرى جوباسى ەكىنشى كەزەڭىنىڭ اياقتالۋ راسىمىنە مۇناي جانە گاز مينيسترى ساۋات مىڭباەۆ قاتىسىپ, ەلباسى اتىنان بارشا باتىسقازاقستاندىقتاردى وسىناۋ ءىرى الەۋمەتتىك جوبانىڭ ىسكە اسۋىمەن قۇتتىقتادى.
تەمىر قۇسايىن.
باتىس قازاقستان وبلىسى.