ەلىمىزدە جولاۋشىلار پويىزعا كەشىككەن جاعدايدا بيلەتىنىڭ قۇنىن تولىعىمەن جوعالتپاي, ونىڭ ءبىر بولىگىن قايتارىپ الۋىنا مۇمكىندىك بار. بۇل تۋرالى «جولاۋشىلار تاسىمالى» اكتسيونەرلىك قوعامى رەسمي تۇردە حابارلادى, دەپ جازادى Egemen.kz.
كومپانيا مالىمەتىنشە, ەگەر جولاۋشى بيلەتىندە كورسەتىلگەن ستانسادان پويىز جونەلتىلگەننەن كەيىن ءبىر ساعاتتىڭ ىشىندە ۆوكزال كاسساسىنا جۇگىنسە, بيلەت قۇنىن جارتىلاي قايتارىپ الا الادى. الايدا بۇل مۇمكىندىكتى پايدالانۋ ءۇشىن ناقتى تالاپتار ساقتالۋى ءتيىس.
«الدىمەن جولاۋشى ۆوكزالداعى بيلەت كاسساسىنا بارۋى كەرەك. قايتارۋ ءراسىمى ءۇشىن جەكە كۋالىك پەن بيلەت قاجەت. بيلەت قۇنىن قايتارۋ مولشەرى مەن مەرزىمى تەمىرجول كولىگىمەن جولاۋشىلاردى, باگاجدى جانە جۇك تاسىمالداۋ ەرەجەلەرىنە سايكەس جۇزەگە اسىرىلادى», دەلىنگەن كومپانيا تاراتقان اقپاراتتا.
ەگەر جولاۋشى پويىز كەتكەننەن كەيىن ءبىر ساعاتتان كەشىگىپ كەلسە, وندا بيلەت قۇنى قايتارىلمايدى. سوندىقتان وسىنداي جاعدايدا ۋاقىت وزدىرماي, دەرەۋ ۆوكزال كاسساسىنا جۇگىنۋ قاجەت.