قىرعىز تاراپىنىڭ شاقىرۋىمەن پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ بىشكەككە رەسمي ساپارمەن باردى. ساپار اياسىندا م.نۇرتىلەۋ قىرعىز رەسپۋبليكاسىنىڭ پرەزيدەنتى سادىر جاپاروۆتىڭ قابىلداۋىندا بولدى.
قىرعىزستان باسشىسى ەكىجاقتى فورماتتاعى وداقتاستىق بايلانىستار مەن ستراتەگيالىق سەرىكتەستىكتىڭ تەرەڭدەپ كەلە جاتقانىن قاناعاتتانۋشىلىقپەن اتاپ ءوتىپ, كوپجاقتى الاڭدارداعى قازاق-قىرعىز ىنتىماقتاستىعىنىڭ ءداستۇرلى جوعارى دەڭگەيىن ەرەكشە اتاپ ءوتتى. كەزدەسۋ بارىسىندا ەلىمىزدىڭ سىرتقى ىستەر ءمينيسترى پرەزيدەنت قاسىم-جومارت توقاەۆتىڭ ىزگى تىلەگى مەن سالەمىن جەتكىزدى.
ءسوز اراسىندا مينيستر ەلىمىزدىڭ باۋىرلاس قىرعىزستانمەن وداقتاستىق قاتىناستاردى جان-جاقتى نىعايتۋعا جانە كەڭەيتۋگە باعىتتالعانىن راستاي وتىرىپ, ەكىجاقتى كوپقىرلى ىنتىماقتاستىقتىڭ قازىرگى جاعدايى مەن كەلەشەگى تۋرالى حاباردار ەتتى. بۇعان قوسا قازاقستان پرەزيدەنتىنىڭ قىرعىزستانعا جوسپارلانعان رەسمي ساپارىنا دايىندىق جۇمىستارىنىڭ نەگىزگى اسپەكتىلەرىن تالقىلادى.
كەزدەسۋ سوڭىندا قىرعىزستان پرەزيدەنتى سادىر جاپاروۆ ەكى ەل اراسىنداعى قارىم-قاتىناستاردى وڭ باعالاپ, مازمۇندىق تۇرعىدا ودان ءارى دامىتۋعا مۇددەلى ەكەنىن ءبىلدىردى.
مۇرات نۇرتىلەۋ رەسمي ساپارى اياسىندا قىرعىز رەسپۋبليكاسىنىڭ سىرتقى ىستەر ءمينيسترى جەەنبەك كۋلۋباەۆپەن دە كەزدەستى. تاراپتار ەكى ەل اراسىنداعى تىعىز ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى. سونداي-اق ول اڭگىمەلەسۋ بارىسىندا مەملەكەت باسشىلارىنىڭ ساياسي ەرىك-جىگەرىنىڭ ارقاسىندا قازاق-قىرعىز قاتىناستارى ءوزارا ءىس-قيمىلدىڭ جاڭا ساپالى دەڭگەيىنە كوتەرىلگەنىن ايتتى.
«قازاقستان باۋىرلاس قىرعىزستانمەن ءوزارا قۇرمەت, سەنىم جانە مۇددەلەردى ەسكەرۋ قاعيداتتارىنا نەگىزدەلگەن وداقتاستىق قاتىناستاردى تەرەڭدەتۋگە بەرىك بەيىلدى. ءبىز ۇزاقمەرزىمدى سەرىكتەستىكتى قۇرۋدا وسى ماقساتتاردى باسشىلىققا الامىز», دەدى م.نۇرتىلەۋ.
سىرتقى ساياسي ۆەدومستۆولار باسشىلارى كەيىنگى جىلدارى جوعارى دەڭگەيدە قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىن جان-جاقتى تالقىلادى, سونداي-اق پارلامەنتارالىق, ۇكىمەتارالىق جانە وڭىرارالىق بايلانىستاردى نىعايتۋعا جاردەمدەسۋگە دايىن ەكەنىن ءبىلدىردى.
باسقوسۋدا پرەزيدەنت قاسىم-جومارت توقاەۆتىڭ قىرعىزستانعا رەسمي ساپارىنا جانە ەكى ەل اراسىنداعى جوعارى مەملەكەتارالىق كەڭەستىڭ جەتىنشى وتىرىسىن وتكىزۋگە دايىندىق ماسەلەلەرىنە ەرەكشە نازار اۋدارىلدى. تاراپتار ساۋدا-ەكونوميكالىق ىنتىماقتاستىقتى كەڭەيتۋ كەلەشەگىن دە تالقىلادى.
مەملەكەت باسشىلارىنىڭ تاپسىرمالارىن جۇزەگە اسىرۋ اياسىندا مينيسترلەر ەكونوميكالىق ءوزارا ءىس-قيمىلدى تەرەڭدەتۋگە, ءوزارا ساۋدا كولەمىن 3 ملرد اقش دوللارىنا دەيىن ارتتىرۋعا جان-جاقتى جاردەمدەسۋگە ۋاعدالاستى. وتكەن جىلدىڭ قورىتىندىسى بويىنشا قازاقستان مەن قىرعىزستان اراسىنداعى تاۋار اينالىمى 1,7 ملرد اقش دوللارىن قۇرادى. جالپى, قازاقستان قىرعىزستاننىڭ ەڭ ءىرى ءۇش ساۋدا سەرىكتەسىنىڭ قاتارىنا تۇراقتى تۇردە كىرەدى.
جيىندا 2026 جىلى قازاق-قىرعىز مەملەكەتتىك شەكاراسىندا يندۋستريالىق ساۋدا-لوگيستيكالىق كەشەن جوباسىنىڭ ىسكە قوسىلۋى, بىرلەسكەن ينۆەستيتسيالىق جوبالاردى پىسىقتاۋ ماڭىزدى ەكەنى تىلگە تيەك ەتىلدى. مينيسترلەر ىنتىماقتاستىقتىڭ ەلەۋلى الەۋەتىن اتاپ, ەنەرگەتيكا, كولىك, لوگيستيكا, سۋ قاتىناستارى جانە اۋىل شارۋاشىلىعى سالالارىندا ءوزارا ءتيىمدى ءىس-قيمىلدى دامىتۋعا دايىن ەكەندەرىن ءبىلدىردى.
ەكى مەملەكەت اراسىنداعى بەرىك جانە ۇزاقمەرزىمدى قاتىناستاردىڭ نەگىزىنە اينالعان مادەني-گۋمانيتارلىق بايلانىستاردى تەرەڭدەتۋ ماسەلەلەرى جەكە قارالدى. بىلتىر ەلىمىزدە قىرعىزستان مادەنيەتىنىڭ كۇندەرى جانە اۋقىمدى ءىس-شارالار ءساتتى وتكەن ەدى. بيىل مەملەكەت باسشىسىنىڭ قىرعىزستانعا رەسمي ساپارى قارساڭىندا قازاقستان كينوسى كۇندەرىن, ءۇشىنشى قازاق-قىرعىز جاستار فورۋمىن وتكىزۋ, سونداي-اق بىشكەكتە «التىن دوستىق كوپىرى» ەسكەرتكىشىن سالتاناتتى اشۋ جوسپارلانعان.
كەزدەسۋ بارىسىندا مينيسترلەر وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا «ساعاتتارىن تەڭەستىردى». بۇۇ اياسىنداعى تىعىز ءوزارا ءىس-قيمىلعا, سونداي-اق ەكى مەملەكەتتىڭ حالىقارالىق باستامالارىن ىلگەرىلەتۋدە ءوزارا قولداۋ كورسەتۋگە بەيىلدىلىك راستالدى.
كەلىسسوزدەر قورىتىندىسى بويىنشا قازاقستان مەن قىرعىزستان ءسىم باسشىلارى جوعارى مەملەكەتارالىق كەڭەستىڭ جەتىنشى وتىرىسىنىڭ «قازاقستان رەسپۋبليكاسى مەن قىرعىز رەسپۋبليكاسى اراسىنداعى 2025–2027 جىلدارعا ارنالعان ىنتىماقتاستىقتىڭ كەشەندى جوسپارىن بەكىتۋ تۋرالى» شەشىمىن جانە ىنتىماقتاستىقتىڭ كەشەندى جوسپارىن دايەكتەدى.