رەسەي مەن قىتاي اقش پرەزيدەنتى دونالد ترامپتىڭ مالىمدەمەسىنەن كەيىن بىرلەسكەن اسكەري تەڭىز جاتتىعۋلارىن باستادى, دەپ حابارلايدى Egemen.kz.
رەسەي مەن قىتاي اسكەري-تەڭىز كۇشتەرى جاپون (شىعىس كورەيا) تەڭىزىندە بىرلەسكەن جاتتىعۋ وتكىزىپ جاتىر.اسكەري وقۋ-جاتتىعۋ بۇرىن جوسپارلانعانىمەن, اقش پرەزيدەنتى دونالد ترامپتىڭ ەكى اتوم سۇڭگۋىر قايىعىن رەسەيگە جاقىن ايماققا جىبەرۋ تۋرالى مالىمدەمەسىنەن كەيىن ەرەكشە نازارعا ىلىكتى
The Telegraph باسىلىمىنىڭ جازۋىنشا, 3 تامىزدا باستالعان جاتتىعۋلار ءۇش كۇنگە سوزىلادى. قىتاي تاراپىنان ءتورت اسكەري كەمە, سونىڭ ىشىندە باسقارىلاتىن زىمىراندارى بار ەكى ەسمينەتس قاتىسىپ جاتىر. ستسەناري بويىنشا, شارتتى قارسىلاستىڭ سۇڭگۋىر قايىقتارىن جويۋ ءىس-قيمىلدارى پىسىقتالادى.
رەسەي مەن قىتاي وزدەرىنىڭ اسكەري ىنتىماقتاستىعى قانداي دا ءبىر ءۇشىنشى ەلگە باعىتتالماعانىن بىرنەشە مارتە مالىمدەگەن. بىراق جاپونيا بۇل جاتتىعۋلارعا نارازىلىق ءبىلدىردى. رەسمي توكيو پەكين مەن ماسكەۋ اراسىنداعى ستراتەگيالىق بايلانىستاردىڭ نىعايۋى جاپونيانىڭ ۇلتتىق قاۋىپسىزدىگىنە قاتەر توندىرەدى دەپ ەسەپتەيدى.
بۇعان دەيىن اقش پرەزيدەنتى دونالد ترامپ پەن رەسەيدىڭ قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆ الەۋمەتتىك جەلىدە ءبىر-ءبىرىن ايىپتايتىن جازبالار جاريالاعان. مەدۆەدەۆ اقش رەسەيگە قارسى سانكتسيالاردى كۇشەيتە بەرەتىن بولسا, ونىڭ ارتى سوعىسقا الىپ كەلۋى ءمۇمىن ەكەنىن ايتىپ ەسكەرتكەن. ترامپ بۇل مالىمدەمەنى «ارانداتۋشىلىق» دەپ باعالاپ, ەكى اتوم سۇڭگۋىر قايىعىن رەسەيگە جاقىن ايماققا جىبەرۋ تۋرالى بۇيرىق بەرگەنىن حابارلاعان. اقش زاڭى بويىنشا اتوم سۇڭگىر قايىقتارىنىڭ باعىتى مەن مەكەنى جاريالاۋعا جاتپايتىن, قۇپيا اقپارات بولىپ سانالادى.
بۇعان قوسا, دونالد ترامپ رەسەي مەن ۋكراينانى 8 تامىزعا دەيىن بەيبىت كەلىسىمگە كەلۋگە ۇندەپ, ەسكەرتۋ جاساعان. ول كەلىسىمگە كەلمەگەن جاعدايدا سانكتسيا كۇشەيەتىنىن ايتقان.