بۇگىن قازاقستان كينولوگتار وداعىنىڭ مۇشەلەرى حەلسينكيدە وتەتىن WDS 2025 دۇنيەجۇزىلىك يت كورمەسىنە ەلىمىزدىڭ ءار ايماعىنان ىرىكتەلگەن 8 تازىنى الىپ, جولعا شىقتى, دەپ جازادى Egemen.kz.
جىل سايىن وسى كورمەگە 100 ەلدىڭ وكىلدەرى جالپى سانى 25 000-نان استام يت الىپ كەلەدى. باسەكە جوعارى. كورمەگە باراتىن ەڭ ۇزدىك دەگەن تازىلاردىڭ ىشىندە سەمەيدەن كەلگەن سۇلتان اسىلبەك ۇلىنىڭ سارىعىز(قۇجاتتاعى اتاۋى «پانا») اتتى تازىسى بار.
– سارىعىز كۇشىك كەزىنەن كورمەدە چەمپيون بولدى. سودان بەرى ءۇش مارتە ەڭ ۇزدىك تازى اتاندى. جالپى, كورمەلەردە تازىنىڭ دەنە تۇرقى, اياقتارىنىڭ دۇرىس ءبىتۋى, قۇلاعى, باسىنىڭ كولەمى ءبارى-ءبارى ستاندارتقا ساي بولۋى كەرەك. سارىعىز تەك كورمەلەرگە قاتىسپايدى, اۋىلدا اڭعا ەرتەمىز. اسىرەسە, كۇزدە اڭشىلىق قىزادى. سىرت كوزگە مومىن, ءالجۋاز, ۇركەك بولىپ كورىنەتىن تازىلارىڭىزدى سول كۇن تانىماي قالاسىز. تازىلارىمىزدىڭ قويان, بورسىق, تۇلكى العانىنا قاراپ ءتانتى بولامىز. ەكى تازى قاتار شىقسا, جەمتىگىن قوس قاپتالدان ىقسىرىپ بارىپ ۋىسقا تۇسىرەدى. جالعىز شىقسا دا سولاي, جەمتىگىن اڭدىپ, شاپ بەرىپ ۇستايدى. اڭ اۋلاۋدىڭ ءادىس-ءتاسىلىن جاقسى مەڭگەرگەن. سارىعىز كورمەگە الىپ شىعاتىن اداممەن بىرەر ساعات دايىنداسا, كوپتىڭ ورتاسىندا قايمىقپاي, ەركىن جۇرەدى. كورمەدە دە وسى قارقىننان تانبايدى دەپ ويلايمىن,–دەيدى س. اسىلبەك ۇلى.
كورمەگە باراتىن تازىلار قازاقستان كينولوگتار وداعىنىڭ ىشكى ىرىكتەۋ كوميسسياسىنىڭ شەشىمىمەن انىقتالعان. ىشىندە وسالى جوق, ءبارى ستاندارقا ساي. ولاردىڭ قاتارىندا «پانادان» بولەك, استانا, الماتى, وسكەمەننەن جەتكىزىلگەن «تامەرلان», «ساكۋرا», «لاشىن», «ارۋ», «كوكسەرەك», «التىن» اتتى تازىلار بار. وسىلاردىڭ قاي-قايسىسى دا بىرنەشە جارىستا توپ جارعان, ۇزدىك ەكەنىن دالەلدەگەن تازىلار.