قازاق تازىسى حالىقارالىق كورمەگە قاتىسادى

7–10 تامىز ارالىعىندا وتەتىن كورمەدە قازاق تازىسى العاش رەت FCI مويىنداعان, حالىقارالىق دەڭگەيدە تا­نىلعان يت تۇقىمى رەتىندە رەسمي تانىستىرىلادى. جول شالعاي, ۇيىمداستىرۋشىلار شامامەن 8 مىڭ شاقىرىم جولدى ەڭسەرىپ, 5 كۇندە جەتەمىز دەپ وتىر. تازىلار جارىستىڭ العاشقى كەزەڭىنەن ءوتىپ جاتسا, فينال­دىق باسەكەگە شىعادى. كورمەدە تازى­لاردىڭ ءوزىن-ءوزى ۇستاۋىنا, ءجۇرىس-تۇرى­سىنا دا ءمان بەرەدى. جىل سايىن كورمەگە 100-دەن استام ەل 25 000-نان استام يت الىپ كەلەتىنىن ەسكەرسەك, باسەكە بارىنشا جوعارى بولاتىنى ءسوزسىز.

كورمەگە الىپ باراتىن تازىلاردىڭ دايىندىعى تۋرالى قازاقستان كينولوگتەر وداعىنىڭ پرەزيدەنتى باۋىرجان سەرىكقاليدان سۇرادىق.

– تازىلاردىڭ ىشىندە وسالى جوق, ءبارى ستاندارتقا ساي. ولار كينولوگتەر وداعىنىڭ ىشكى ىرىكتەۋ كوميسسياسىنىڭ شەشىمىمەن انىقتالدى. جالپى, وسىنداي ءىرى كورمەلەرگە اپاراتىن تازىلارعا تالاپ قاتاڭ. ەۋروپالىق وداقتىڭ ۆەتەري­نارلىق تالاپتارىنان ءوتۋدىڭ ءوزى قيىن. كەلەشەكتە وسىنىڭ بارلىعىن ەلەپ-ەسكەرىپ, ءىرى جارىستاردىڭ الدىندا ىرىكتەۋ تۋرنيرلەرىن ۇيىمداستىرۋ جوس­پاردا بار. وسى جولى كورمەگە اپاراتىن تازىلاردىڭ بارلىعى ءتۇرلى جارىس­تاردا چەمپيون بولعان نەمەسە جۇلدە العان. اتاپ ايتقاندا, استانا, الماتى, وسكەمەن, سەمەيدىڭ «ازات», «تامەرلان», «ساكۋرا», «پانا», «لاشىن», «ارۋ», «كوك­سەرەك», «التىن» اتتى تازىلار, – دەدى ب.سەرىكقالي.

كورمە اياسىندا «قازاقستان كينولوگتەرى وداعى» قوعامدىق بىرلەستىگى قا­زاقى تازى تۇقىمىن رەسمي تۇردە حالىق­ارالىق قاۋىمداستىققا تانىستىرادى. بۇل وقيعانى تازى تۇقىمى­نىڭ الەمدىك تۇساۋكەسەرى دەسەك تە بولادى. قوناقتار تازىنىڭ شىعۋ تاريحى, ەكستەرەرلىك ەرەكشەلىگى مەن اڭشىلىق قابىلەتى تۋرالى جان-جاقتى اقپارات الادى.

قازاقى تازى مەن توبەتتى قورعاپ, جاھانعا تانىتۋ ماسە­لەسى مەملەكەت باسشىسى قاسىم-جومارت توقاەۆتىڭ تاپسىرماسىمەن ىسكە اسىپ كەلەدى. بىلتىر حالىقارالىق كينولوگيا وداعى (FCI) قازاق تازىسىن بولەك تۇقىم رەتىندە «شارتتى تۇردە» تىركەدى. قا­زاقى تازىنىنىڭ تولىق مويىندالۋىنا كەمىندە 10 جىل ۋاقىت قاجەت. وسى ارالىقتا بۇل باعىتتاعى جۇمىستى جۇيەلى, تاباندى تۇردە جال­عاستىرا بەرۋ كەرەك.