داعىستاندىق قالام قايراتكەرى, اۆار جۇرتىنىڭ داڭعىل اقىنى راسۋل عامزاتوۆ: ء«بىزدىڭ حالىقتا قارعىس كوپ. سونىڭ ەڭ جامانى – «ۇرپاعىڭا انا ءتىلىن ۇيرەتەتىن ادام قالماسىن», دەپ كۇيىنگەنى بار.
سول سياقتى, قازاقتا دا نەشە ءتۇرلى قارعىس بار. سونىڭ ءبىرى ادامدار كوپ ايتاتىن ءارى ەڭ جامان قارعىس – «بەتىڭ تىلىڭگىر». بۇل قارعىس تۋرالى تانىمال تاريحشى تۇرسىنحان زاكەن ۇلى «Egemen Qazaqstan» گازەتىنىڭ 2020 جىلعى 28 تامىز كۇنگى سانىندا جاريالانعان «جەلدى قۋعان جوعالار, جولدى قۋعان وڭالار» اتتى ماقالاسىندا: «ەجەلگى عۇن زامانىندا مەملەكەت جانە جەكەنىڭ مۇلكىنە قول سالعانداردىڭ بەتىن تىلەتىن بولعان. قازاقتا «بەتىڭ تىلىڭگىر» دەگەن سودان قالعان» دەپ جازسا, اتاقتى عالىم, تانىمال ەتنولوگ, پاسسيونارلىق تەورياسىنىڭ اۆتورى لەۆ گۋميلەۆ قازاق تىلىندە جارىق كورگەن «حۇندار» (الماتى, 1998) اتتى ەڭبەگىندە: «ەجەلگى حۇنداردىڭ وزىندىك ادەتتەگى (ازاماتتىق) حۇقىق جۇيەسى دە بولعان, ال قىتايلار: «ولاردىڭ زاڭى جەڭىل ءارى ورىنداۋعا قولايلى» دەپ اتاپ وتەدى. اۋىر قىلمىس جاساۋ, ونىڭ ىشىندە قارۋ-جاراق جالاقتاتۋ ءولىم جازاسىنا كەسىلسە, ۇرلىق ىستەۋ – دۇنيە-م ۇلىكتى عانا ەمەس, ۇرىنىڭ وتباسىن قوسا تاركىلەۋ ارقىلى جازالانعان. ال ۇساق قىلمىس جاساعانداردىڭ بەتى تىلىنەتىن بولعان», دەپ جازىپتى (حۇندار. الماتى: «قازاقستان», 1998. – 85-ب).