قوستاناي. 17 اقپان. قوستانايداعى كوركەمسۋرەت گاەلرەياسىندا مەيرامگۇل ورداشەۆانىڭ «ونەر تولقىنىندا» اتتى جەكە كورمەسى اشىلدى. وندا كورەرمەندەرگە اۆتوردىڭ 32 جۇمىسى ۇسىنىلدى. بۇل تۋرالى egemen.kz ءتىلشىسى حابارلادى.
جاس سۋرەتشى مەيرامگۇل ورداشەۆا شىعارماشىلىقپەن 2012 جىلدان بەرى اينالىسىپ كەلەدى. سۋرەتشىنىڭ بەينەلەۋ ونەرىنە دەگەن قىزىعۋشىلىعى بالالىق شاعىنان باستالعان. بۇل عاجايىپ الەم ءسابي مەيرامگۇل ءۇشىن قازاقستان رەسپۋبليكاسىنىڭ مەملەكەتتىك ءا.قاستەەۆ اتىنداعى ونەر مۇراجايى تۋرالى اعاسى تالانت ورداشەۆ سىيعا تارتقان سۋرەتتى كىتاپتان باستاۋ الىپتى.
تۋعان جەرگە دەگەن سۇيىسپەنشىلىك – اۆتوردىڭ كوپ جانرلىق كارتينالار تاقىرىبىنىڭ ءبىرى. م.ورداشەۆانىڭ كارتينالارىنىڭ باستى نىسانى – تۋعان جەر, تۋعان وشاعى, جاقىندارى مەن تۋىستارى. سۋرەتشى ءوز كومپوزيتسيالارىن جادى ارقىلى, قيالى مەن ەلەستەتۋى, ناقتى وتكەرگەن قاس قاعىم ءسات پەن تىكەلەي زاتتىڭ وزىنە قاراپ سالادى. سۋرەتشى مەيرامگۇل ورداشەۆا: «مەنىڭ شىعارماشىلىعىمدا بالالىق اسەر مەن جارقىن وقيعالاردىڭ ءبارى دە توعىسقان» دەدى.
مەيرامگۇلدىڭ تۋىندىلارىنا قازاقستاننىڭ بەلگىلى سۋرەتشىلەرى شىعارمالارىندا ءجيى كەزدەسەتىن, ماسەلەن, «بايگە», «كۇرەس», «كوكپار», «جايلاۋ» سەكىدى ۇلتتىق سيۋجەت سارىندارى ءتان. تاڭداعان تاقىرىبىنان عانا ەمەس, كومپوزيتسيالىق شەشىمىنەن, «كلاسسيكالىق» پاليترانى تاڭداۋىنان ۇلكەن ونەرمەن ۇندەستىك بايقالادى.
سۋرەتشىنىڭ پورترەتتىك كورىنىستەگى تۋىندىلارى دا تارتىمدى. «ءراۆيلدىڭ پورترەتى», «قىزىم», «دايانانىڭ پورترەتى» سياقتى كوبىنەسە ءوزىنىڭ جاقىندارى بەينەلەنەدى. «مۋزىكانتتار» جانە «سكريپكاشى» سيۋجەتتىك كومپوزيتسيالارىنان اۆتوردىڭ جاڭالىعى ايقىن اڭعارىلادى.
بۇگىندە مەيرامگۇل ورداشەۆا – قوستاناي مەملەكەتتىك پەداگوگيكالىق ينستيتۋتىنىڭ «ونەر» كافەدراسىنىڭ وقىتۋشىسى. وسى از عانا شىعارماشىلىق كەزەڭىندە اۆتوردىڭ ەكى دەربەس كورمەسى ءوتتى. ءبىرى قوستاناي قالاسىنداعى ل.تولستوي اتىنداعى وبلىستىق امبەباپ عىلىمي كىتاپحاناسىندا, ەكىنشىسى چەليابى قالاسىنداعى (رەسەي) «سولنەچنىي دوم» جەكە گالەرەياسىندا ءوتتى. 2013 جىلى جاس سۋرەتشىلەردىڭ وبلىستىق «جاس تولقىن» سايىسىنا قاتىسىپ, «كەسكىندەمە» نوميناتسياسى بويىنشا 2-ورىنعا يە بولدى.
ءنازيرا جارىمبەتوۆا.
دەرەك, سۋرەت: egemen.kz.