جانتۇرشىگەرلىك وقيعا ورال قالاسىندا بولعان. ۆەرونيكا ناۋموۆا پوليتسياعا وتباسىنداعى التىنشى بالاسى بەس جاسار دالەر بوبيەۆتىڭ جوعالىپ كەتكەنى تۋرالى ارىزدانعان. ول پوليتسياعا بالانىڭ ءوز بەتىمەن ۇيدەن شىعىپ كەتىپ, ورالماعانىن ايتقان, دەپ جازادى Egemen.kz.
پوليتسيا بىرنەشە كۇن ىزدەپ, بالانىڭ ءمايىتىن وتباسىنا تيەسىلى سارايداعى سومكەدەن تاپقان. Gazeta.Ru مالىمەتىنشە, جالپى وقيعا 2023 جىلدىڭ ماۋسىمىندا باستالعان.
تەرگەۋ بارىسىندا ايىپتالۋشى بالانىڭ جۋىنۋ بولمەسىندەگى ىدىستاعى سۋعا باتىپ كەتكەنىن ايتىپ اقتالماق بولعان.
«ۆەرونيكا ناۋموۆا دالەر بوبيەۆتىڭ جوعالىپ كەتكەنىنە قاتىستى ءتۇرلى نۇسقا ايتا باستادى. ونىڭ سوزدەرى بىرىمەن ءبىرى قابىسپاي جاتتى. ونىڭ سوڭعى كۇندەرى نە ىستەگەنىن ناقتى ايتىپ بەرە الماعان. سودان كەيىن بالا ءولىمى مۇقيات تەكسەرىلدى», دەپ ءتۇسىندىردى تەرگەۋشى سەرگەي كيباردين.
تەرگەۋ كەزىندە ۆەرونيكا ناۋموۆا بالانى ءوزى ۇرىپ-سوعىپ, سۋعا باتىرعان. ول 5 جاسار بالانى تاماقتى رۇقساتسىز العانى ءۇشىن جازالاماق بولعان. كۇدىكتىنىڭ بالانى اش قالدىرىپ, بۇعان دەيىن دە سوققىعا جىعىپ كەلگەنى انىقتالعان.
ال بۇل وقيعادان قامقورشىنىڭ كۇيەۋى حاباردار بولىپ شىققان.
ايىپتالۋشى ەندى عانا 24 جىلعا سوتتالعان. كۇيەۋى دە بەس جىلعا باس بوستاندىعىنان جانە سەرجانت شەنىنەن ايىرىلعان.
قىلمىسقا قاتىسى بار ناۋموۆانىڭ جيەنى بەس جىلعا, قورعانشىلىقتا جۇمىس ىستەگەن ايەل ەكى جىلعا باس بوستاندىعىنان ايىرىلعان.
سونداي-اق دالەر بارعان بالاباقشانىڭ بۇرىنعى مەڭگەرۋشىسى دە سالعىرتتىعى ءۇشىن ءبىر جىل 10 ايعا قامالعان.