2025 جىلعى 1 شىلدەدەگى مالىمەتكە سايكەس ەل ازاماتتارىنىڭ بىرىڭعاي جيناقتاۋشى زەينەتاقى قورىنداعى (بجزق) جيناعى 24 تريلليون تەڭگەدەن اسىپ وتىر. بۇل وتكەن جىلمەن سالىستىرعاندا 20,9 پايىزعا نەمەسە 4 تريلليون تەڭگەدەن استام سوماعا كوپ, دەپ حابارلايدى Egemen.kz.
جيناقتاردىڭ نەگىزگى بولىگىن – 22,85 ترلن تەڭگەنى مىندەتتى زەينەتاقى جارنالارى (مزج) قۇرايدى. بۇل باعىتتاعى ءوسىم ءبىر جىلدا 18,7 پايىزعا جەتكەن. ال مىندەتتى كاسىپتىك جارنالار (مكزج) 683,1 ملرد تەڭگەنى قۇراپ, 10,2 پايىزعا ارتقان. ەڭ جوعارعى ءوسىم ەرىكتى جارنالار (ەزج) بويىنشا تىركەلىپ وتىر – ءبىر جىلدا 35 پايىزعا ءوسىپ, 8,73 ملرد تەڭگەگە جەتتى.
2024 جىلدىڭ قاڭتارىنان باستاپ جۇمىس بەرۋشىلەردىڭ مىندەتتى زەينەتاقى جارنالارى (مزجر) ءتۇسىپ جاتىر. 2025 جىلعى 1 شىلدەدەگى جاعداي بويىنشا بۇل جارنالار كولەمى 463,98 ملرد تەڭگەنى قۇراعان.
جالپى العاندا, 2025 جىلدىڭ العاشقى جارتىجىلدىعىندا سالىمشىلاردىڭ شوتتارىنا 1,575 ترلن تەڭگە تۇسكەن. بۇل كورسەتكىش 2024 جىلدىڭ وسى كەزەڭىمەن سالىستىرعاندا 19,8 پايىزعا جوعارى.
ينۆەستيتسيالىق تابىس تا وڭ ناتيجە كورسەتىپ وتىر – جىلدىڭ باسىنان بەرى تازا كىرىس كولەمى 350,7 ملرد تەڭگەگە جەتكەن. سونىمەن قاتار, جىل باسىنان بەرى بجزق-دان تولەنگەن قاراجات كولەمى 782,87 ملرد تەڭگەنى قۇرادى. بۇل وتكەن جىلعى سايكەس كەزەڭمەن سالىستىرعاندا 71,1 پايىزعا ارتىق. ونىڭ ىشىندە 451,58 ملرد تەڭگە تۇرعىن ءۇي جاعدايىن جاقسارتۋ مەن ەمدەلۋگە باعىتتالعان.
ساراپشىلار پىكىرىنشە, زەينەتاقى سالىمدارىنىڭ تۇراقتى ءوسۋى ازاماتتاردىڭ ەڭبەك نارىعىنا بەلسەندى قاتىسۋىمەن, جۇمىس بەرۋشىلەردىڭ مىندەتتەمەلەرىن ورىنداۋىمەن جانە ينۆەستيتسيالىق كىرىستىڭ وڭ سەرپىنىمەن بايلانىستى. ەرىكتى جارنالار ءوسىمى دە قازاقستاندىقتاردىڭ زەينەت جاسىنا دايىندىق مادەنيەتى قالىپتاسا باستاعانىن بايقاتادى.