ورتالىق كوممۋنيكاتسيالار قىزمەتى الاڭىندا وتكەن بريفينگتە قارۋلى كۇشتەردىڭ تسيفرلىق ترانسفورماتسيالاۋداعى ەلەۋلى جەتىستىكتەرى تانىستىرىلدى. مۇنداي باستامالاردىڭ ماقساتى – اكىمشىلىك ۇدەرىستەردى جەڭىلدەتۋ, اسكەريلەر قىزمەتىنىڭ تيىمدىلىگىن ارتتىرۋ ءارى ساپاسىن جاقسارتۋ.
قورعانىس ءمينيسترىنىڭ ورىنباسارى دارحان احمەديەۆ قورعانىس مينيسترلىگى اسكەري ءبىلىم بەرۋ جانە مەرزىمدى اسكەري قىزمەتكە شاقىرۋ جۇيەسىنە تسيفرلىق شەشىمدەردى بەلسەندى ەنگىزىپ جاتقانىن حابارلادى.
«Smart ۆوەنكومات» – اسكەري ەسەپتە تۇرعان شاقىرىلۋشىلاردىڭ جالپى سانىنان اسكەرگە شاقىرۋ جاسىنداعى ازاماتتاردى ىرىكتەۋ. جاساندى ينتەللەكت بەلگىلى ءبىر كريتەريلەر مەن بۇرىن اسكەرگە شاقىرىلعانداردىڭ مالىمەتتەر بازاسى نەگىزىندە جەدەل اسكەري قىزمەتكە شاقىرىلۋعا ءتيىس ازاماتتاردى عانا حاباردار ەتپەك.
ەندى اسكەري وقۋ ورىندارىنا ءتۇسۋ ءۇشىن قۇجاتتاردى ونلاين – e-Gov پورتالى ارقىلى تاپسىرۋعا بولادى. بۇگىندە پىسىقتالعانى – 22 مەملەكەتتىك قىزمەت. ودان بولەك, بۇل سەرۆيس ارقىلى بۇرىن شىعىپ كەتكەن وقۋىن قايتا قالپىنا كەلتىرۋ قىزمەتى دە قولجەتىمدى (16 مەملەكەتتىك قىزمەت). الدىن الا مەديتسينالىق كۋالاندىرۋ جويىلدى, ارنايى تەكسەرۋ قاشىقتان جۇرگىزىلەدى.
قورعانىس مينيسترلىگىنىڭ تسيفرلىق ترانسفورماتسيا شەڭبەرىندەگى نەگىزگى جەتىستىكتەرىنىڭ ءبىرى – بارلىق اسكەري وقۋ ورىندارىنا ارنالعان «Askeri Ziyat» اسكەري-ءبىلىم بەرۋ كوپفۋنكتسيونالدى پلاتفورماسىن قۇرۋ. بۇل پلاتفورما اسكەري مامانداردى دايارلاۋدى جۇزەگە اسىراتىن اسكەري جوعارى وقۋ ورىندارى مەن اسكەري كوللەدجدەردى بىرىڭعاي تسيفرلىق كەڭىستىككە بىرىكتىرەدى, قاراۋ رەجىمىندە سىرتقى ۇيىمدار ءۇشىن دە قولجەتىمدى ۆەدومستۆوارالىق ەلەكتروندىق كىتاپحاناسى دا بار. مۇندا 20 باعىتتا دايىندىق كۋرستارى وتكىزىلەدى. بۇگىندە مىڭنان اسا اسكەري قىزمەتشى تىركەلگەن. 300-دەن استامى وقۋدى ويداعىداي اياقتاپ, بەلگىلەنگەن ۇلگىدەگى سەرتيفيكاتتارعا يە بولدى.
ءۇشىنشى جىلى ىسكە اسىرىلىپ جاتقان «Sarbaz 2.0» جوباسى بويىنشا جۇمىس جالعاسىپ جاتىر. جوبا اياسىندا مەرزىمدى قىزمەتتىڭ اسكەري قىزمەتشىلەرى مەملەكەتتىك ءبىلىم بەرۋ گرانتتارى ارقىلى تەگىن وقي الادى. جىل باسىنان بەرى ونلاين-تەستىلەۋ وتكىزىلدى, تەستكە قاتىسۋعا 10 مىڭنان اسا سارباز نيەت ءبىلدىردى. بيىل مامىر ايىندا 2 010 سارباز ەلىمىزدىڭ جوعارى وقۋ ورىندارىندا وقۋ ءۇشىن مەملەكەتتىك گرانتتار الدى.
مەملەكەت باسشىسىنىڭ جاساندى ينتەللەكتتى كەڭىنەن ەنگىزۋ تۋرالى تاپسىرماسىنا سايكەس قورعانىس مينيسترلىگى Armia.kz سەرۆيسىن ازىرلەدى. بۇل كىرىكتىرىلگەن جي قازىردىڭ وزىندە 2 مىڭنان اسا سۇرانىستى وڭدەپ, اسكەري قىزمەت تۋرالى اقپاراتتىڭ امبەباپ كوزىنە اينالدى. مەملەكەتتىك ورگاندار اراسىندا العاشقىلاردىڭ ءبىرى بولىپ قورعانىس مينيسترلىگىنىڭ ماماندارى ۇلتتىق جاساندى ينتەللەكت پلاتفورماسىنا نەگىزدەلگەن Armia.kz سەرۆيسىنىڭ جي-اسسيستەنتىن قۇردى. بوت كەڭ كولەمدى ءبىلىم بازاسىنا يە جانە زاڭناماداعى وزگەرىستەرگە جەدەل بەيىمدەلە الادى. ول اسكەري قىزمەتكە قاتىستى سۇراقتار بويىنشا «تسيفرلىق كەڭەسشى» رەتىندە جۇمىس ىستەيدى.
بۇعان قوسا قورعانىس مينيسترلىگى اسكەرگە شاقىرۋدى, قورعانىس قابىلەتىن جاقسارتۋدى جانە جاۋىنگەرلىك دايىندىقتى وڭتايلاندىرۋدى كوزدەيتىن, قورعالعان سەگمەنتتە جاساندى ينتەللەكتتى قولداناتىن بىرقاتار جوبانى جۇزەگە اسىرىپ جاتىر.