جەزقازعان قالاسىنداعى س.قوجامقۇلوۆ اتىنداعى قازاق مۋزىكالىق تەاترىندا ءى رەسپۋبليكالىق قويلىباي اۋليە اتىنداعى «قوبىزىم – قوڭىرىم» اتتى قوبىزشىلار بايقاۋى ءوتتى.
بايقاۋدى ۇيىمداستىرۋشى – وسى ءوڭىردىڭ تۋماسى, مادەنيەت قايراتكەرى, قاراعاندىداعى ق.بايجانوۆ اتىنداعى كونتسەرتتىك بىرلەستىكتىڭ «ارقا سازى» فولكلورلىق ءانسامبلىنىڭ كوركەمدىك جەتەكشىسى بايعارا حامزە ۇلى. ول وسىعان دەيىن ەردەن ساندىباي ۇلى اتىنداعى ءداستۇرلى رەسپۋبليكالىق قىلقوبىزشىلار بايقاۋىن وتكىزىپ كەلگەن. بيىل قويلىباي اۋليە اتىنداعى قوبىزشىلار بايقاۋىن قولعا الدى.
بايقاۋعا ەلىمىزدىڭ, جەتىسۋ, ۇلىتاۋ وبلىستارى, الماتى, استانا, قاراعاندى, تالدىقورعان قالالارىنان كەلگەن ون ەكى ونەرپاز قاتىستى.
قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى, قازاقستاننىڭ ەڭبەك سىڭىرگەن قايراتكەرى, قوبىزشى بازارحان قوسباساروۆ توراعا بولعان قازىلار القاسىنىڭ قۇرامىندا ونەردىڭ جىلىگىن شاعىپ, مايىن ىشكەن مايتالماندار بولدى. قۇرمانعازى اتىنداعى ۇلتتىق كونسەرۆاتوريانىڭ پروفەسسورى, قازاقستاننىڭ ەڭبەك سىڭىرگەن قايراتكەرى, كۇيشى ەرمۇرات ۇسەنوۆ قاتارلى تاعى باسقا قوبىزشىلار ۇمىتكەرلەردىڭ شەبەرلىگىن سىنادى.
قاتىسۋشىلاردىڭ ءبارى كاسىبي قوبىزشىلار. ءبىرى ماگيسترانت, ءبىرى ۇستاز, ءبىرى انسامبلدە وينايدى. ولار «قورقىت» كۇيىن ورىندادى.
قويلىباي اۋليە اتىنداعى قايىرىمدىلىق قورى, اقساقالدار قاۋىمداستىعىنىڭ توراعاسى ابۋلايس تۇسىپبەك ۇلىنىڭ ايتۋىنشا, «اتى اڭىزعا اينالعان اۋليە بابامىز اماناتى بويىنشا ۇلىتاۋ وڭىرىندەگى دۋلىعالى وزەنىنىڭ بويىندا جەرلەنگەن. 1994 جانە 2023 جىلدارى اۋليەنىڭ ارۋاعىنا باعىشتالىپ, اس بەرىلدى. قويلىباي اۋليەنىڭ باسىنا كەلىمدى-كەتىمدى كىسىلەر توقتايتىن بەس بولمەلى «تاعزىم ءۇيى» سالىندى. 2024 جىلدىڭ تامىز ايىنان باستاپ بۇرىنعى كەسەنەنىڭ ورنىنا ءزاۋلىم كەسەنە سالىنىپ جاتىر. جوشى حان, دومباۋىل, الاشاحان سياقتى قويلىباي اۋليەنىڭ باسىنا تۋريستىك ورىن جاساۋعا بولادى», دەپ ورىندى ۇسىنىس ايتتى.
جەرەبە بويىنشا شىققان ءار قوبىزشى ءتورت شىعارمادان ورىندادى. العاشقىسى ارنايى بايقاۋعا جازىلعان ءا.ءابدىنۇروۆتىڭ «دۋلىعالى وزەن», ە.ۇسەنوۆتىڭ «قويلىباي اۋليە» كۇيلەرى, ءۇشىنشىسى ءوز تاڭداۋى بويىنشا قوبىزعا ارنالعان كۇي, ءتورتىنشىسى كونۆەرتكە جاسىرعان شىعارمانى ورىنداۋ. ۇلتىمىزدىڭ كيەلى اسپابىنىڭ سىرلى دا, سيقىرلى سازى تىڭداۋشىلاردى باۋرادى.
باس جۇلدە 1 500 000 تەڭگە اقشالاي سىيلىقتى اسەن سمايل (تالدىقورعان قالاسى) ولجالادى. ءى ورىن العان ادىلەت ازباەۆ (الماتى قالاسى) 1 ملن تەڭگە, ءىى ورىن العان ولجاس قۇرمانبەك (استانا قالاسى) 500 000 تەڭگە يەلەندى. ءىىى ورىن العان جەتىسۋلىق ەراسىل تورەحانوۆ پەن قاراعاندىلىق اياۋلىم جەتپىسباەۆاعا دا اقشالاي سىيلىق بۇيىردى.
ۇلىتاۋ وبلىسى