وپەرا ءانشىسى ايگەرىم التىنبەكتىڭ CLIP 2025 (Concorso Lirico Internazionale di Portofino) XI حالىقارالىق وپەرا بايقاۋىندا باعى جاندى. جاس ءانشى جاي عانا جەڭىسكە جەتكەن جوق. وانداسىمىز بايقاۋدىڭ نەگىزگى نوميناتسيالارىنان ءوتىپ, ءابسوليۋتتى جەڭىمپاز اتاندى. بايقاۋدىڭ ءبىرىنشى جۇلدەسىن, كورەرمەندەر سىيلىعىن, «ۇزدىك ايەل داۋىسى» ءۇشىن سىيلىق پەن مۋزىكا سىنشىسى, ارت-ديرەكتور جانە وقىتۋشى كارلو مايەر سىيلىعىنا قول جەتكىزدى, دەپ جازادى Egemen.kz.
بۇل تابىس ەل مادەنيەت ءۇشىن شىن مانىندە تاريحي وقيعا بولدى. بايقاۋ تاريحىندا العاش رەت ورتالىق ازيا وكىلى كوشباستادى.
«بايقاۋ تاريحىندا ايگەرىم التىنبەك بايقاۋدىڭ باسىنان-اق بارلىق قازىلار القاسىنىڭ رەيتينگىندە ءبىرىنشى بولدى – بۇل سيرەك كەزدەسەتىن جاعداي, ول كوپشىلىكتىڭ تاڭداۋىنىڭ دۇرىستىعىن راستايدى, ول وعان «ەموتسيا» جۇلدەسىن بەردى» دەدى قازىلار القاسىنىڭ توراعاسى دومينيك مەيەر.
بايقاۋعا الەمنىڭ تۇكپىر-تۇكپىرىنەن 200 ءوتىنىم جىبەرىلگەن. ونىڭ ىشىندە 92 جارتىلاي فيناليست انىقتالعان. ودان كەيىن 10 فيناليست كارلو فەليچە تەاترىنىڭ وركەسترىمەن ونەر كورسەتكەن.
بايقاۋدىڭ ەڭ ۇزدىك ايەل داۋىسى جۇلدەسىن ايگەرىم التىنبەككە الەمنىڭ تۇكپىر-تۇكپىرىندەگى جاس دارىندى ۆوكاليستتەردى ىزدەستىرەتىن جانە قولداۋ كورسەتەتىن ۇيىم يبانەس-اتكينسون قورى (چيلي) بەرگەن. قور الەمنىڭ جەتەكشى تەاترلارمەن ىنتىماقتاسادى جانە سانتياگوداعى وپەرا تەاترىمەن بىرگە جاستار باعدارلاماسىن ازىرلەيدى. وسى شىعارماشىلىق توپ ايگەرىم التىنبەككە كاسىبي ۇسىنىس جاساپ, وڭتۇستىك امەريكا كونتينەنتىندە العاش رەت ازيالىق انشىگە قولداۋ كورسەتۋدى شەشكەن. بۇل قازاقستاندىق ونەرپازدىڭ حالىقارالىق مانسابىن ورلەتۋ جولىنداعى ماڭىزدى قادام.
بۇل تاماشا تابىس ەلىمىز ءۇشىن ناعىز سەرپىلىس بولدى. بيىك باسەكەلەستىككە قاراماستان, ايگەرىم التىنبەك قازاقستاندىق ۆوكال مەكتەبىنىڭ حالىقارالىق ءىرى الاڭداردا توپ جارا الاتىنىن ايعاقتادى.
ايتا كەتەيىك, Concorso Lirico Internazionale di Portofino (CLIP) - جىل سايىن يتاليانىڭ پورتوفينو قالاسىندا وتەتىن ەڭ بەدەلدى حالىقارالىق ۆوكال بايقاۋلارىنىڭ ءبىرى. ونىڭ قازىلار القاسى جەتەكشى يمپرەساريولاردان, ەۋروپاداعى ەڭ ءىرى وپەرا تەاترلارىنىڭ, سونىڭ ىشىندە ۆەنا مەملەكەتتىك وپەراسى, لا سكالا, گليندەبۋرن, مەتروپوليتەن جانە Champs-Elysées تەاترىنىڭ ديرەكتورلارىنان قۇرالادى. فينالعا شىققاندار پورتوفينوداعى اشىق اسپان استىندا «تەاترو كارلو فەليچە» وركەسترىمەن ونەر كورسەتەدى. بۇل شارا يتالياندىق ارنالاردان كورسەتىلىپ, مىڭداعان كورەرمەن قاتىسادى.