قوستاناي. 17 قاڭتار. قوستاناي ءوڭىرىنىڭ باسشىسى نۇرلان سادۋاقاسوۆتىڭ وكىمىمەن وبلىستىق ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى بولىپ حايدار جابىقباي ۇلى قامباروۆ تاعايىندالدى. بۇل جونىندە egemen.kz ءتىلشىسى حابارلادى.
حايدار قامباروۆ بۇعان دەيىن باسقارما باسشىسىنىڭ ورىنباسارى قىزمەتىن اتقاردى. ول رۋدنىي يندۋستريالىق ينستيتۋتىن ينجەنەر-قۇرىلىسشى ماماندىعى بويىنشا بىتىرگەننەن كەيىن تۇرعىن ءۇي-كوممۋنالدىق شارۋاشىلىعىندا مول تاجىريبە جيناقتادى. مەملەكەتتىك قىزمەتتە بولدى. «كوستانايگاز», «كازترانسگاز ايماك» سەكىلدى كوممۋنالدىق قىزمەتتىڭ ماڭىزدى سالالارىندا جاۋاپتى قىزمەتتەر اتقاردى.
ەسكە سالا كەتەيىك, باسقارمانىڭ بۇدان بۇرىنعى باسشىسى اۋباكىر تايكەشەۆ قىلمىستىق ىستەر كودەكسىنىڭ 1-تاراۋىنىڭ 316-بابى بويىنشا (نەمقۇرايدىلىق) كىنالى دەپ تابىلىپ, مەرزىمى وتكەندىكتەن جازادان بوساتىلدى. ول بيىلعى قاڭتار ايىندا ءوز وتىنىشىمەن قىزمەتىنەن كەتتى.
ءنازيرا جارىمبەتوۆا.
دەرەك, سۋرەت: egemen.kz.