ەسەنگەلدى ءسۇيىنوۆتىڭ ەسىمى وقىرمان قاۋىمعا قارىمدى قالامگەر, اقىن رەتىندە بەلگىلى. ونىڭ «كۇڭگىرتاۋ قۇپياسى», «ماقپالدى كۇندەر», «ارايلى تاڭ», ت.ب. كىتاپتارىن جۇرتشىلىق جىلى قابىلداعان.
اۆتوردىڭ سىرشىل ولەڭدەرى ادامداردى مەيىرىمدىلىككە, انا ءتىلىمىزدى قادىرلەپ, ۇلتتىق قۇندىلىقتارىمىزدى قاستەرلەۋگە, وتانىمىزدى سۇيۋگە, ىزگىلىككە باۋليدى.
جاقىندا ماسكەۋ قالاسىندا, رەسەي مەملەكەتتىك كىتاپحاناسىنىڭ شىعىس ادەبيەتى ورتالىعىندا قازاقتىڭ بەلگىلى اقىنى, قوعام قايراتكەرى مارقۇم مارفۋعا بەكتەمىروۆانى ەسكە الۋعا ارنالعان شىعارماشىلىق كەشتە ەسەنگەلدى سۇيىنوۆكە رەسەي جازۋشىلار وداعى ماسكەۋ قالالىق ۇيىمىنىڭ «ورىستىڭ ۇلى جازۋشىسى جانە اقىنى, نوبەل سىيلىعىنىڭ لاۋرەاتى يۆان الەكسەەۆيچ بۋنين اتىنداعى «ورىس ادەبيەتىنە ادالدىعى ءۇشىن» ادەبي-قوعامدىق سىيلىعى ديپلوممەن جانە «ي.ا.بۋنين (1870–1953)» مەدالىمەن قوسا بەرىلدى. «بۇل ناگرادا اقىن ەسەنگەلدى سۇيىنوۆكە قازاقستان مەن رەسەي اراسىندا ادەبي بايلانىستاردى نىعايتۋعا قوسقان ۇلەسى ءۇشىن بەرىلىپ وتىر», دەدى ماراپاتتى تاپسىرعان «زولوتوە پەرو رۋسي» ادەبي دوستاستىعىنىڭ نەگىزىن قالاۋشى جانە پرەزيدەنتى, اقىن سۆەتلانا ساۆيتسكايا.