بۇگىندە ەلوردادا 481 مىڭ جاس ءومىر سۇرەدى. بۇل كورسەتكىش وتكەن جىلمەن سالىستىرعاندا 30 مىڭ ادامعا ارتقان. ونىڭ ۇستىنە قالاداعى 16 جوعارى وقۋ ورنىندا 95 مىڭنان اسا ستۋدەنت ءبىلىم الىپ جاتىر. وسى ساناتتاعى ازاماتتاردىڭ دامۋى مەن الەۋەتىن ارتتىرۋعا باعىتتالعان باستامالار, جوبالار مەن باعدارلامالار ولاردىڭ جۇمىسپەن قامتىلۋىنا, الەۋمەتتىك بەلسەندىلىگىنە جانە كاسىبي وسۋىنە سەرپىن بەرىپ كەلەدى.
استانا قالاسىندا مەملەكەتتىك جاستار ساياساتىن دامىتۋ باعىتىندا جۇيەلى جۇمىس جۇرگىزىلىپ جاتىر. جەرگىلىكتى جاستار ساياساتى ماسەلەلەرى باسقارماسىنىڭ باسشىسى سامات يبراەۆتىڭ ايتۋىنشا, بيىلعى جارتىجىلدىقتا 5 023 جاس جۇمىسپەن قامتىلعان. بۇل كورسەتكىش «جاستار پراكتيكاسى», «قوعامدىق جۇمىستار» جانە «العاشقى جۇمىس ورنى» سياقتى مەملەكەتتىك باعدارلامالار اياسىندا جۇزەگە اسقان.
– جاستار ساياساتى – مەملەكەتتىڭ بولاشاعىنا سالىنعان ينۆەستيتسيا. بۇگىنگى بۋىنعا دۇرىس باعىت بەرۋ – ەرتەڭگى سانالى قوعامنىڭ نەگىزى. وسى باعىتتا بىرقاتار ءتيىمدى جوبالار قولعا الىندى. ماسەلەن, «جاسىل ەل» باعدارلاماسى شەڭبەرىندە ەكى اي ىشىندە 3 365 جاس جۇمىسپەن قامتىلدى. ماۋسىم سوڭىنا دەيىن بۇل سان 5 200-گە جەتەدى دەپ بولجاپ وتىرمىز. ال «Joltap» جوباسى اياسىندا جاستار SMM, تارگەتينگ, كونتەنت-كرەاتور, گرافيكالىق ديزاين, ۆيدەومونتاج, ۆەب-ديزاين جانە بازالىق تسيفرلىق داعدىلار سياقتى 7 تسيفرلىق باعىتتا, سونداي-اق باريستا, تىگىنشى, ساتۋشى, دانەكەرلەۋشى سىندى 11 جۇمىسشى ماماندىق بويىنشا ءبىلىم الىپ جاتىر. جوسپارعا سايكەس, جىل سوڭىنا دەيىن 5 300 ادام جۇمىسشى ماماندىقتارىن, 2 700 ادام تسيفرلىق باعىتتاردى مەڭگەرەدى, – دەدى س.يبراەۆ.
سونداي-اق بيىل 5 مىڭنان اسا ەرىكتى World Boxing Cup Astana 2025, EcoFest, BI Marathon, Kazakhstan Machinery Fair جانە باسقا دا ءىرى قالالىق جانە حالىقارالىق دەڭگەيدەگى ءىس-شارالارعا بەلسەندى قاتىسىپ, ۇيىمداستىرۋشىلارعا جان-جاقتى قولداۋ كورسەتكەن. ولار اۋدارماشى, ۇيلەستىرۋشى, قوناقتاردى قابىلداۋ مەن الىپ ءجۇرۋ بويىنشا قىزمەتتەر اتقارىپتى.
سالاماتتى ءومىر سالتىن دارىپتەۋ, قۇقىقبۇزۋشىلىقتىڭ الدىن الۋ باعىتىندا دا كەشەندى شارالار قولعا الىنعان. «ەsirtkisiz elorda» جوباسى اياسىندا رەيدتەر, سپورتتىق جاتتىعۋلار, ترەنينگتەر, شىعارماشىلىق بايقاۋلار وتكەن.
– جاقىندا وتەمىس ۇلى اتىنداعى وقۋشىلار سارايىنىڭ اۋماعىندا ەسىرتكىگە قارسى سالىنعان مۋرال سالتاناتتى تۇردە اشىلدى. بۇل بەينە جاستاردى سالاماتتى ومىرگە ۇندەيدى. «تازا قازاقستان» اكتسياسى نەگىزىندە ەلوردالىق جاستار سەنبىلىكتەرگە قاتىسىپ, تابيعاتتى قورعاۋ مەن زياندى ادەتتەردەن اۋلاق بولۋ مادەنيەتىن ناسيحاتتاپ كەلەدى. سونىمەن قاتار «زاڭ جانە ءتارتىپ» باعىتى بويىنشا ەسىرتكىگە قارسى رەيدتەر مەن سپورتتىق ءىس-شارالار تۇراقتى تۇردە وتكىزىلىپ تۇرادى, – دەيدى استانا قالالىق جاستار ساياساتى ماسەلەلەرى باسقارماسىنىڭ باسشىسى.
جاستارعا ارنالعان اسكەري-پاتريوتتىق تاربيە باعىتىنداعى «جاس سارباز» جوباسى دا بار. ونىڭ اياسىندا 64 مەكتەپ پەن 14 كوللەدجدە 2 مىڭنان اسا تاربيەلەنۋشى قامتىلعان. ولارعا ارنايىلاپ ارداگەرلەر مەن باتىرلارمەن كەزدەسۋلەر, پاتريوتتىق ءان بايقاۋلارى, فيلم كورسەتىلىمى جانە باسقا دا ءىس-شارالار وتكىزىلەدى. ال وتباسىلىق قۇندىلىقتاردى ناسيحاتتاۋ ماقساتىندا «وتباسى – باقىت مەكەنى» جوباسى ۇيىمداستىرىلادى.
بۇعان قوسا قالادا 10 اۋلا كلۋبى جۇمىس ىستەيدى. وندا 2 500-گە جۋىق بالا مەن ءجاسوسپىرىم 130 ۇيىرمەگە تەگىن قاتىسادى. ۇيىرمەلەردىڭ 74-ءى – سپورتتىق, 56-ى – شىعارماشىلىق باعىتتا.
قازىر ەلوردادا 64 ستۋدەنتتىك جاتاقحانا بار. بيىل تاعى 3 400 ورىندىق 7 جاتاقحانا سالۋ جانە قايتا جاڭعىرتۋ كوزدەلىپ وتىر. بۇل ءوز كەزەگىندە ارمان قۋىپ كەلگەن جاستارعا ورىن تاپشىلىعىن تولىق شەشۋگە مۇمكىندىك بەرەدى. سونداي-اق استانا قالاسىنىڭ اكىمدىگى جوعارى ءبىلىم وردالارىندا وقۋ كورپۋستارى مەن جاتاقحانالار سالۋعا ارناپ جەر تەلىمدەرىن ءبولىپ وتىر.
ايتا كەتەيىك, سامات يبراەۆ «جاستار» عىلىمي-زەرتتەۋ ورتالىعىنىڭ ديرەكتورى گ ۇلىسحان ناحباەۆامەن كەزدەسىپ, بىرقاتار وزەكتى ماسەلەنى تالقىلادى. جۇزدەسۋدە جاستارمەن جۇمىس باعىتىنداعى سەرىكتەستىك, بىرلەسكەن جوبالار مەن باستامالاردى جۇزەگە اسىرۋ مۇمكىندىكتەرى, جاستار رەسۋرستىق ورتالىقتارىنىڭ تيىمدىلىگىن ارتتىرۋ, زاماناۋي فورماتتاردى ەنگىزۋ جانە وڭىرلىك دەڭگەيدە كوممۋنيكاتسيانى كۇشەيتۋ ماسەلەلەرىنە دە ەرەكشە نازار اۋداردى.