پەريزات قايرات ىسىندە جان-جاقتى زەرتتەلگەن بارلىق دالەلدەمەلەر جاريالاندى

پەريزات قايرات ىسىنە ءادىل ۇكىم شىعارىلدى

بۇگىن پەريزات قايراتقا قاتىستى سوت پروتسەسى اياقتالدى. سوت پەريزات قايراتتى 10 جىل باس بوستاندىعىنان ايىردى. ونىڭ اناسى – گايني الاشباەۆاعا جاسى ۇلكەن بولعانىن ەسكەرە وتىرىپ, 7 جىل جازا تاعايىندالدى.سوتتالعاندار سونداي-اق 10 جىلعا دەيىن قايىرىمدىلىققا قاتىستى قىزمەتپەن اينالىسۋ قۇقىعىنان ايىرىلدى. ۇرلانعان قارجىعا ساتىپ الىنعان م ۇلىك تاركىلەندى: «Vela Village» كوتتەدج قالاشىعىنداعى جەكە ءۇي, «Akbulak Riviera», «Sensata Plaza», «Highvill Ishim Gold», «كوك جايلاۋ» تۇرعىن ءۇي كەشەندەرىندەگى پاتەرلەر, اۆتوتۇراق ورىندارى, «Mercedes-Benz S450» (2024 ج.), «Lexus LX 600» (2024 ج.), «Mercedes-Benz EQE 500 4matic» (2023 ج.), «Haval H6 GT» (2024 ج.) كولىكتەرى, «Rebel Flowers» جشس-ءنىڭ 100% جارعىلىق كاپيتالى, 97 ملن تەڭگەدەن استام جانە 22 مىڭ اقش دوللارى. جابىرلەنۋشىلەردىڭ ازاماتتىق تالاپتارى قاناعاتتاندىرىلدى. پەريزات قايرات پەن گايني الاشباەۆانىڭ الاياقتىق, الدىن الا ءسوز بايلاسۋ ارقىلى, توپپەن جانە اسا ءىرى كولەمدە جاسالعان قىلمىس, سونداي-اق قىلمىستىق جولمەن الىنعان اقشانى زاڭداستىرۋ ارەكەتتەرى جينالعان دالەلدەرمەن تولىقتاي دالەلدەندى: جابىرلەنۋشىلەر مەن ولاردىڭ وكىلدەرىنىڭ, كۋالاردىڭ جاۋاپتارى, بانكتىك ءۇزىندى كوشىرمەلەر, زاتتاي دالەلدەمەلەر. جاسالعان قىلمىستار ەرەكشە تسينيزممەن ەرەكشەلەنىپ, قازاقستاندىق قوعامنىڭ نەگىزدەرىن شايقالتتى. جاۋاپكەرشىلىكتى جەڭىلدەتەتىن ءمان-جايلار انىقتالعان جوق. كۇشەيتەتىن فاكتور رەتىندە – قىلمىستار توتەنشە جاعداي رەجيمى كەزىندە جاسالعانى تانىلدى.

ولاردى نە ءۇشىن سوتتادى؟

سوتتا 2021 جىلى پەريزات قايرات جالعان قۇرىلتاي قۇجاتتارىن جاساۋ ارقىلى «Biz Birgemiz Qazaqstan 2030» قوعامدىق بىرلەستىگىن تىركەگەنى انىقتالدى. اتالعان اتاۋ زاڭدى تۇردە ارەكەت ەتەتىن «Biz Birgemiz Qazaqstan» قورىنا ۇقساس ەتىپ تاڭدالعان. ول اناسىمەن بىرگە حالىقتى قايىرىمدىلىق ماقساتىندا, سۋ تاسقىنىنان جانە پالەستيناداعى جاعدايدان زارداپ شەككەندەرگە كومەكتەسۋ سىلتاۋىمەن اقشا اۋدارۋعا شاقىرىپ وتىرعان. 2021 جىلدىڭ قاراشاسى مەن 2023 جىلدىڭ قازانى ارالىعىندا ولار وڭالتۋ ورتالىعىن سالۋ, مۇمكىندىگى شەكتەۋلى بالالارعا كومەك كورسەتۋ جانە قوعامدىق ءىس-شارالار ۇيىمداستىرۋ دەگەن جەلەۋمەن 126,7 ملن تەڭگە جيناپ, ۇرلاعان. 2023 جىلدىڭ قاراشاسىنان 2024 جىلدىڭ ساۋىرىنە دەيىن پالەستينا حالقىنا كومەك كورسەتۋ جەلەۋىمەن 559,1 ملن تەڭگە يەمدەنگەن. 2024 جىلدىڭ 1 ءساۋىرى مەن قاراشاسى ارالىعىندا ەلدە توتەنشە جاعداي رەجيمى كۇشىندە بولعان كەزدە, سۋ تاسقىنىنان زارداپ شەككەندەرگە كومەك كورسەتۋ دەگەن جەلەۋمەن 2,8 ملرد تەڭگە ۇرلاعان. جالپى ۇرلانعان قاراجات سوماسى – 3,5 ملرد تەڭگە. اقشالار پەريزات قايرات پەن گايني الاشباەۆانىڭ جەكە شوتتارىنا اۋدارىلعان. ولار بۇل قاراجاتتى گۇل بيزنەسىن اشۋعا جانە جالعان مامىلەلەر جاساۋ ارقىلى زاڭداستىرعان. سونداي-اق بۇل اقشانى قىمبات جىلجىمايتىن م ۇلىك, كولىك, اشەكەي, كيىم, جيھاز, ساياحات پەن ءتۇرلى قىزمەتتەرگە جۇمساعان.

پەريزات قايراتقا قوعامنىڭ نازارى كەزدەيسوق اۋدارىلعان جوق

وعان سەبەپكەر بولعان تىكەلەي ءوزى. ول ۇزاق ۋاقىت بويى الەۋمەتتىك جەلىدە قىمبات كولىكتەر, ەليتالىق جىلجىمايتىن م ۇلىك, برەندتىك اكسەسسۋارلار مەن ساياحاتتاردى كورسەتىپ, ءسان-سالتانات ءومىر سالتىن جارنامالاپ ءجۇردى. كاسىپكەر ءرولىن سومداۋ ءۇشىن الەۋمەتتىك جەلىدە شەتەلگە ەت ونىمدەرىن ەكسپورتتايتىن وتباسىلىق بيزنەسى بار ەكەنىن, بەدەلدى شەتەلدىك ۋنيۆەرسيتەتتەردە ءبىلىم العانىن ايتىپ, جالعان اقپارات تاراتقان. سونىمەن بىرگە ول وتە اگرەسسيۆتى تۇردە حالىقتان قاراجات جيناۋ ناۋقانىن جۇرگىزگەن. الەۋمەتتىك باستامالار مەن گۋمانيتارلىق كۇن ءتارتىبىن بۇركەنىپ, ءوز پايداسىنا اقشا جيناۋدىڭ ارناسىن جاساعان. سوتتا مەملەكەتتىك ايىپتاۋشى كەلتىرگەن قوسىمشا دەرەكتەر پەريزات قايراتتىڭ بەينەسىن تولىقتىردى: ونىڭ جوعارى ءبىلىمى جوق, تەك اياقتالماعان ارناۋلى ورتا ءبىلىمى بار. كەيبىر مالىمەتتەرگە سۇيەنسەك, كوللەدجدەن ۇيالى تەلەفون ۇرلاعانى ءۇشىن شىعارىلعان. سوتتا ونىڭ جالعان ديپلوم جاساۋ ءۇشىن قۇربىسىنا جۇگىنگەنى بەلگىلى بولدى. سوعان قاراماستان, 2024 جىلعى شىلدەدە پەريزات قايرات ءوزىنىڭ الەۋمەتتىك جەلىسىندە كەمبريدج ۋنيۆەرسيتەتىنە تۇسكەنى تۋرالى مالىمدەگەن.

سوت پەن قۇقىق قورعاۋ ورگاندارى نەگە ءىستى سوزا بەردى؟

پەريزات قايرات ءىسىنىڭ نەگە ۇزاققا سوزىلعانى ءالى دە تۇسىنىكسىز. ايىپتاۋلار قاراپايىم ءارى تۇسىنىكتى: كۇردەلى الاياقتىق سحەمالار نەمەسە زاڭ تۇرعىسىنان داۋلى جايتتار بولعان جوق. مۇنداي ىستەر قۇقىق قورعاۋ ورگاندارىنىڭ تاجىريبەسىندە ءجيى كەزدەسەدى. قاراپايىم مەحانيزم: تانىمال ء«بىز بىرگەمىز» ۇرانىن جامىلىپ, سوعان ۇقساس اتاۋمەن ۇيىم تىركەۋ, وزىنە جانە جاقىندارىنا ەسەپشوت اشۋ, سودان سوڭ قايىرىمدىلىق دەگەن جەلەۋمەن اقشا جيناپ, ونىڭ ءبىر بولىگىن كورنەكى كومەك كورسەتۋگە جۇمساپ, قالعانىن قولما-قول اقشاعا اينالدىرىپ, جەكە قاجەتىنە پايدالانۋ. كۇردەلى جوسپار بولعان جوق. ءبارى تىكەلەي جۇزەگە استى: ادەمى ۇران,  اقشا جيناۋ, ونى قولما-قولالۋ, جەكە تۇتىنۋ. حالىقتىڭ, سونىڭ ىشىندە بيزنەس وكىلدەرىنىڭ سەنىمى ءىستىڭ ۇزاق ۋاقىت بويى كۇمان تۋعىزباي وتۋىنە مۇمكىندىك بەردى.

سوت پروتسەسى نەگە ءىشىنارا جابىق ءوتتى؟

پەريزات قايراتتىڭ سوتى ءىشىنارا جابىق تۇردە ءوتتى. باستاپقىدا ول ءىستى تولىق جابىق فورماتتا قاراستىرۋدى سۇراعان. سوت بۇل ءوتىنىشتى قاراپ, تەك قۇپيا مالىمەتتەر قارالاتىن كەزەڭدەردە باق وكىلدەرىن شەكتەۋگە شەشىم قابىلدادى. بۇل – زاڭدا كوزدەلگەن, جەكە مالىمەتتەردى قورعاۋ ءۇشىن قولدانىلاتىن ستاندارتتى شارا. شەكتەۋلەر تەك كەيبىر ەپيزودتارعا قاتىستى بولدى. ايىپتاۋ قورىتىندىسى, نەگىزگى دالەلدەردى زەرتتەۋ مەن قورىتىندى سوزدەر باق پەن قوعام ءۇشىن اشىق تۇردە ءوتتى. ءىس قولدانىستاعى زاڭناماعا ساي قارالىپ, جاريالىلىق ءپرينتسيپى مەن جەكە مالىمەتتەردى قورعاۋ ەسكەرىلدى.

مۇندايعا اياۋشىلىق تانىتۋعا بولمايدى

پەريزات قايرات سوعىس پەن گۋمانيتارلىق اپاتتاردان زارداپ شەككەندەرگە, سونىڭ ىشىندە گازاداعى تۇرعىندارعا كومەك كورسەتەمىن دەگەن سىلتاۋمەن ادامداردىڭ قايعىسى ارقىلى پايدا تاپتى. مۇنداي سۋىققاندى الداۋ – قوعامدىق سەنىم مەن ءوزارا كومەكتەسۋ يدەياسىن جويادى. ول سوت بارىسىندا ءوزىن قۇربان رەتىندە كورسەتۋگە تىرىستى. ايىپتاۋلارعا جاۋاپ بەرۋدىڭ ورنىنا, مورالدىق شارشاۋ, ادۆوكاتپەن بايلانىس بولماۋى, تەرگەۋ يزولياتورىنداعى قيىندىقتار تۋرالى ايتتى. بىراق تەكسەرىستەر, سونىڭ ىشىندە بەينەباقىلاۋ جازبالارى, وعان قاتىستى كۇش قولدانىلعانىن راستامادى. بۇل – ەموتسيا ارقىلى جاناشىرلىق تۋدىرىپ, جاۋاپكەرشىلىكتەن جالتارۋدىڭ كلاسسيكالىق ارەكەتى. الايدا پەريزات قايرات كىناسىن مويىنداۋدان باس تارتىپ وتىر. كەيبىرەۋلەر ونىڭ اناسى گايني الاشباەۆاعا جاناشىرلىق تانىتادى. بىراق ونىڭ تەلەفونىنان تابىلعان جازبالار بۇل جاناشىرلىقتى جوققا شىعارادى: 37 ملن – كولىككە, 10 ملن – تۇركيادا ەمدەلۋگە, 3 ملن – باد الۋعا, 10 ملن – سەرۋەندەۋگە, 1 ملن – قىتاي استرولوگياسىن وقۋعا, تاعى دا سەرۋەندەۋگە, 3 ملن – شوپپينگ, 3 ملن – التىن الۋعا, 3 ملن – فەنشۋي, 5 ملن – ءتىس ەمدەۋگە جوسپارلانعان. بۇل اقشالاردىڭ ءبارى حالىقتان ۇرلانعان. بۇل قىلمىستىق ءىس – ازاماتتاردىڭ سەنىمىن اسىرا پايدالانۋدىڭ ايقىن مىسالى جانە قايىرىمدىلىقتى زاڭسىز ارەكەتتەردى بۇركەمەلەۋ ءۇشىن قولداناتىندارعا قاتاڭ ەسكەرتۋ بولۋى ءتيىس.